Giuseppe Zampieri

Giuseppe Zampieri

Giuseppe Zampieri (Bepi Sampieri, Vicensa 6 novembre 1893Vicensa 13 aprile 1976) el xe sta un omo politico vixentin, Sindaco de Vicensa dal 1948 al 1958 e dopo Senatore deła Republica par do legislature, dal 1958 al 1968. El gà anca ricoverto - nei primi ani '20 - altri incareghi de aministrasion publica pał Comun e pała Provincia de Vicensa, ma anca pał Partito Popołare Itałian (Partito Popolare Italiano - PPI); dopo el '45 el gà milità neła Democrasia (Democrazia Cristiana - DC).

El gavea studià prima in Seminario a Vicensa e dopo all'Università de Padova, Facoltà de Lege. Nel 1915 i ło gà ciamà sotto łe armi par fare l'uficiałe de complemento in tel 141° Rgt. de Fanteria "Catansaro" ("Catanzaro"). El combatè suła fronte deł'Isonso, sindo ferìo e ciapando una medaja de bronso al Valor Miłitare, che dopo la guera ghe vene riconosuta come medaja de argento, senpre al V.M.

El se laureava in Lege a Padova nel 1922, scominsiando a fare el notaro prima in teła Provincia de Verona, dopo in vari paesoti del vixentin per ciapare infin posto a Vicensa nel 1926. El continuarà così a fare el notaro fin al 1963.

Dopo la Grande Guera, nel 1919 el xe stà un dei fondatori del Partito Popołare Itałian (Partito Popolare Italiano - PPI) a Vicensa, stando neła Diresion provinciałe de sto partito. Nel 1920 el 'ndava su in Provincia, vegnendo anca nominà asesore provinciałe.

Quando xè andà su i fasisti ghe gà tocà mołare; el gà continuà parò - intanto che el faseva el notaro - a dare 'na man ai preti: el ghe tegneva łe carte al Vescovo Ferdinando Rodolfi, ghe dava 'na man ała San Vincenso, ai Frati de Santa Lusìa, al Paroco de San Felise, ecetera.

Dopo el '45, el gà riciapà coła połitica, fasendo el Segretario Provinciałe deła Democrasia (Democrazia Crsitiana - DC). El 'ndava anca su in Comun a Vicensa (1946) fasendo prima el Consigliere, dopo l'Asesore ałe Finanse e infin Sindaco nel 1948. El vengneva riełeto Sindaco in tel 1953 fin al 1958, quando el xe stà candidà al Senato deła Republica pał Cołegio de Vicensa. Eleto Senatore neła III Legislatura 1953-1958, el xe confermà pał secondo mandato pał periodo 1963-1968 (IV Legislatura).

No ghe garbava parò l'aria che tirava in teła Democrasia - specie coel che faseva el Segretario nasionałe Amintore Fanfani - che secondo lu gaveva perso l'ispirasion cristiana originaria de Don Luigi Sturzo, e in tel 1968 el se ritirò dała połitica.

El xe stà definìo "el Sindaco deła ricostrusion" parché el gà tirà su Vicensa dopo łe distrusion deł ułtima guera. El gavea l'idea dła "Granda Vicensa": na forte sità vero e propio sentro de tuta la Provincia, no come deso che tuti i ciacoła e tuti i tira pał suo (Thiene, Schio, Basan, Valdagno, ecc.) e se combina poco o gnente de strade, ferovie, aereoporto e tante bełe altre cose 'ncora.

Infati serte so idee dełi ani sinquanta le xe andà ben par meso secoło: via el trafico dal sentro (Corso Paładio), portar fora ufici, el novo mercà, i magasini generałi, costruire strade torno ała sità, ecc.

Ma xe stà propio pa ste idee nove che i can grosi dea sità i gà vosuto pararlo fora da i pie; io ło gavea candidà al Senato propio par stare in paxe.

Ma Zampieri - che gaveva ła testa dura - in Senato el gà continuà a lavorare pa' łe autonomie locałi e pa' ła xente: el xe stà lu - pa' esempio - che el gavea seguìo la lege costituzionałe che faseva nasare - in teł 1964 - la Region Autonoma del Friuli-Venesia Giulia.

El xe stà un gran pasionà de latin e de greco, el gà fato tante tradusion che deso el xe nełe carte deła fameja.

El gà publicà in teł 1967 na racolta de poesie, Dal mio Diario (Tip. G. Rumor, Vicensa). In teł 1967 el Comun de Vicensa el gà publicà dełe so carte del 1962 che el jera restà inte on caseto, Appunti a ricordo d'un concetto e d'un metodo applicati all'amministrazione della Comunità vicentina.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Giuseppe_Zampieri&oldid=855659"