Intestin crasso

L'intestin crasso, anca dito grosso intestin parché el costituisse la parte de le buele de diàmetro mazor (ma de longhessa menor, in gènere no la sùpara 1,5 m, sirca un quinto de quela del'intiero intestin), el xe n'òrgano parte del'aparato degerente, catà squasi a la fin del canale alimentare. Alcuni auturi de anatomia i consìdara na so parte anca el canale anale, che el mete in comunicasion el so lume col fora regolando l'espulsion de la caga. Sta qua la xe el prodoto de scarto de la degestion del magnar e la se forma a livelo del'intestin crasso par, prinsipalmente, condensamento del materiale lìquido che el ghe riva dal'intestin tenue. traverso la vàlvola ìleo-cecale. Anca se'l deriva dal nome doparà par inténdare solo na de le so parte, par quanto la più longa, l'ajetivo còlico' el se riferisse al'intiero intestin crasso; se invesse sto qua vien considarà in conpagnia al pìcolo intestin, se usa el tèrmine intestinale.

Vision in colonscopia del colon trasverso: se poe recognossare de èssare rivai a sto trato par l'aspeto a triàngolo de le pieghe che le separa le austre, mentre inte le altre parte del vìssere le ga più na forma a sercio.

L'intestin crasso el ga na particolare desposision a cornise che, al drento de la cavità adominale, la sirconda la mazor parte del intestin tenue e de la so raisa mesentèrica, cavando l'ecesion rapresentada dal'inissio del duoden. Oltra che par sta posission, xe fàssile da recognóssare al tajo cerùsego e autòptico par do caraterìsteghe anatòmiche destintive: le austre (formasion a tasca visìbili par fora e par drento a sto tubo, che el toe na forma a colana) e le tenie, (necessarie par l'austradura del vìssere) che le xe fassi longitudinali de la parte esterna de la tònega de muscolaura lissa e le toe el nome dal stesso parassita elminta che el ghe someja.

L'anatomia microscòpica del'intestin crasso la presenta le sòlite quatro statificasion del'intiero canale degestivo. Vegnendo da fora, soto l'aventissia/sierosa, particolare xe la za nomenada desposision de la mazor parte de la tònega muscolare esterna in tenie, mentre quela interna la resta sircolare co ndamento trasversale al'asse del tubo. La sotomucosa, rica de vasi, linfàtissi e de nervi (anca qua ghe xe el plesso sotomucoso de Meissner e anca qua el xe tacà funsionalmente a quelo mioentèrico de Auerbach), la xe separada da la mucosa da na muscularis mucosae. Conpagna a la làmina propia (a sto livelo no la presenta vasi linfàtissi, caraterìstega inportante parché un càncaro invasivo a sto livelo xe considarà logalizà e varìbile co na sola remosion de la mucosa) la muscularis la forma la mucosa, sormontada da n'epitelio de tipo colonare monostratificà. A sto livelo ghe se alterna colociti, soratuto ativi in te'l assorbimento de aqua e eletroliti dal silindro fecale, e sèlule caliciformi, che le buta fora muco par jutarghe la progression.

Parte

L'intestin crasso, cussì come l'intestin tenue, vien par convension diviso in tre porsion:

Cieco, quela prossimale, co lìmite superior posto propio da la vàlvola ìleo-cecale, catà in basso a drita de la cavità adominale. El toe el nome (orbo) dal fato che el xe a fondo sarà, in basso, a la convergensa de le tre tenie presenti a sto livelo, se cata piutosto la base del'apendice vermiforme. Sta qua la xe na so parte, streta e slongada, de dimension e desposision assè variàbili, co probàbile funsion imunitaria, cognossesta par de più pa' la malatia del'apendicite acuta, causa frequente e famosa de dolor adominale. Xe a livelo del cieco che l'intestin el ga el so diàmetro màssimo, intorno ai 8 cm, manman che se va vanti sto qua el se reduse. El cieco de sòlito el ga un meso che elo sospende in drento a la cavità peritoneale e ghe dà un fià de motilità, anca se sta qua no la xe na caraterìstega costante: visinandose su al colon assendente, la tendensa xe quela de na retrasion in spassio retroperitoneale.
Colon propiamente ciamà, xe solo la parte intermedia e più longa. El se formà da varie parte a so volta, ciamade colon assendente, colon trasverso, colon dessendente e l'ùltima che la xe el colon sigmoideo: sti nomi i se referisse a la desposision del respetivo toco de colon. I colon assendente e dessendente, logalizai respetivamente e drita e a sanca, i xe de sòlito retroperitoneali, mentre el colon trasverso, messo in mezo a sti do, el se buta in cavità retroperitoneale co na piega de sierosa tacada drio ciamada mesocolon trasverso, oltra a èssare coligà a la granda curvaura del stómego traverso la piega peritoneale ciamada grande omento. El colon trasverso el scomensa a la flessura còlica de drita o epàtica (soto al figà) e'l fenisse a la flessura còlica de sanca o lienale o splènica (soto de la spiensa). Anca el colon sigmoideo el xe intraperitoneale e'l ga el so mesosigma. Manman che se va vanti longo el colon se varda na serie de canbiamenti struturali, dei quali i più evidenti xe: a livelo macroscòpico el diàmetro se reduse e'l fato che le tenie da tre le deventa do; a livelo microscòpico l'epitelio, al inissio rico de colociti, se inpiena senpre de più de sèlule caliciformi. Sta evolusion de la mucosa la xe n'adatamento funsionale al fato che al'inissio del colon, come in te'l cieco, la funsion più inportante la xe l'assorbimento, mentre verso la fin la caga la xe bastansa sòlida e, co la so propulsion, la podaria danejare la parede intestinale se sta qua no la fusse proteta da un film de muco.
Reto, parte distale, la sèvita el sigma e la continua in te'l canale anale. Intrando inte la pìcola pelvi, el xe n'òrgano sotoperitoneale: i tessudi de conetivo lasso intorno i xe ciamadi mesoreto e i elo tien separà dal osso sacro che el ghe sta drio e ùtero (in te la fémena) o vissiga (in te'l màscolo) che i ghe sta vanti. Drento el reto el ga de le pieghe de parede a desposision trasversale che elo divide in segmenti. La parte finale la vien ciamada anpola retale e la xe quela che ghe mete un sforso più grando de propulsion al momento de la defecassion, ato conplicà de coordenasion de la contrasion retale e'l relassamento dei sfinteri anali e dei mùscoli pèlvici de la continensa.

Fisiologia

Na distinsion funsionale co na base de enbriologia, la destingue in tel'intestin crasso el colon de drita (dal cieco fin ai 2/3 prossimali del colon trasverso) che el xe vascolarizà dai vasi mesentèrici superiori (i stessi del intestin tenue) e'l ga come prinsipale funsion l'assorbimento de aqua e eletroliti. Dopo de sto qua ghe xe el colon de sanca (da la fin del colon trasverso al reto), che invesse el risseve i vasi mesentèrici inferiori e'l ga na funsion de propulsion del contenuto fecale, senpre più sòlido a sto ponto.

L'intiero intestin crasso se poe considerare come un magazin, dove che i processi degestivi più inportanti i xe za fenidi da assè tenpo. No ghe xe infati a sto livelo particolari secresion enzimàtiche a scopo degestivo, l'ugnola atività de sto tipo la vien fata da la inportante microbiota flora batèrica, che la rende sto posto la sede del organismo de gran longa più contaminada (anca se da bateri e altri microorganismi, de sòlito, comensali miga patògeni). Dal metabolismo del microbiota còlico se forma, par esenpio, na bona parte de la vitamina K che ghe gavemo bisogno.

La motilità del grosso intestin la xe particolare, parché oltra a le onde de peristalsi catae da altre parte del trato gastro-intestinale, ghe xe movimenti più rari (qualche volta al dì) che i core longo tuto el vìssere, ciamadi aponto movimenti de massa, che i sposta grandi volumi de materiale fecale dal colon de drita a sanca e i prepara a la defecassion.

Wikimedia Commons el detien imàjini o altri file so Intestin crasso
Scholia el detien schemi gràfeghi so Intestin crasso

Controło de autorità	LCCN (EN) sh85067571 · GND (DE) 4124782-6 · BNF (FR) cb12302334k (data) · NDL (EN, JA) 00987673