Julius Nyerere
Julius Kambarage Nyerere (Butiama 13 aprile, 1922 – Londra14 otobre, 1999) el xe stà el primo presidente de la Tanzania. Nyerere el xe diventà presidente del Tanganyika en tel 1962, e de la Tanzania en tel 1964. Nyerere el se sa ritirà en tel 1985. Fiol de Nyerere Burito, cao de i zanaki, el xera conosù come Mwalimu, na parola swahili che vol dir maestro, sia par la so profesion prima de entrar en politega, che par el so esenpio de vita da presidente del paexe.
.jpg)
.jpg)
Studi
canbiaNyerere el ga studià a Musoma e Tabora. Dopo le scole superiori el xe ndà a l’università a Makerere (Uganda) do el ga otegnù on diploma en educasion. Tornà en Tanganyika, el ga laorà par tri ani come maestro en te la scola St. Mary’s de Tabora do che el insegnava biologia e inglexe. En tel 1949 el xe ndà a Edinburgh. A quel tenpo el xera el primo tanzaniano a studiar en te n’uninversità inglexe e el secondo a ciapar on dotorato fora da l’Africa. En tel 1952 el ga finio i so studi de economia e storia. El xe stà a Edinburgh che Nyerere el ga scominsià a programare na politega de socialismo africano. Al so ritorno en Tanganyika, Nyerere el ga insegnà storia, inglexe e swahili al collegio St. Francis’ de Dar es Salaam. En tel 1953 el xe stà eleto presidente de la Tanganyika African Association - Asociasion Africana del Tanganyika - (TAA). Nyerere el xera stà ono de i fondatori de la TAA co chel studiava a Makerere. En tel 1954, el ga canbià la TAA en te l’Union Nasionale Africana del Tanganyika (Tanganyika African National Union) – TANU. Dopo nianca on ano, el TANU el xera el partio politego pi inportante del Tanganyika.
Nyerere el ga dovù lasar l’insegnamento par poder girar tuto el Tanganyika par parlar co i cai locali e la zente. La so abilità a spiegar le so idee e la so integrità lo ga jutà a portar el paexe a l’indipendensa senza dover conbatar na guera de liberasion. Nyerere el xe diventà membro del Consilio Egislativo en tel 1958, el xe stà eleto primo consiliere en tel 1960, e primo ministro del Tanganyika auto-governato en tel 1961. En tel 1962 el Tanganyika el xe diventà indipendente e Nyerere proclamà presidente. En tel 1964 on colpo de stato el ga parà via el sultan Jamshid bin Abdullah. Nyerere el ga proposto l’union co el Tanganyika par formar la Tanzania. El partio unico al governo el xe stà ciamà Chama cha Mapinduzi, partio rivolusionario.
Socialismo
canbiaDopo la conferensa de Arusha, el TANU el ga aprovà la Dichiarasion de Arusha che la scelieva el socialismo. El nome swahili del programa politego de Nyerere el xera l’Ujamaa, che vol dire costruir na fameja. Anca se l so politega la xera ciamada socialista, Nyerere el xera prima de tuto on african. La so idea politega la xera quela de costruir on paexe che podese caminar co le so ganbe, dàndoghe a la zente el progreso, ma on progreso che i podea gestir co le so forse. La so sielta de sinistra lo ga portà a esar considerà on paria da i paexi ocidentali che i ga boicotà la Tanzania. En tel 1985, Nyerere el ga anuncià che el se ritirava da la vita politega ativa a favor de el novo presidnete Ali Hassan Mwinyi. Inte el so discorso de adio el ga dito: “Mi no so riusio a portar el paexe a l’autosuficenza. Bisogna dir la verità!”. Nyerere el xe restà el cao del partio fin al 1990 e el xe considerà da tuti come el Pare de la Nasion.
Politega estera
canbiaNyerere el ga sostegnù el movimento d ei paexi non alineadi, mantegnendo raporti cordiali sia co l’Est che co l’Ovest durante la Guera Freda. A livel continentale, el xe stà ono de i fondatori de l’Organizasion de l’Unità Africana en tel 1963. El ga sostegnù vari movimenti de libarasion come l’ANC e el PAC del Sudafrica, el FRELIMO del Mozanbico, el ZANLA de la Rodesia. Co el presidente de lo Zanbia Kenneth Kaunda, Nyerere el xe stà ono de i leader de i Stati de la Linea del Fronte, l’organizasion che sostegneva el governo basà so la magioranza en Sudafrica. En tel 1978, en risposta a l’ataco de i ugandexi de Idi Amin Dada, Nyerere el ga proclamà la guera contro l’Uganda, sconfito Idi Amin e verto la porta par la ricostitusion de la democrasia en Uganda.
Vita privata
canbiaNyerere el xera on catolego e el no ga mai nascosto la so fede. El ga de frecuente domandà a i vescovi de esar profeti e de jutarlo en te la so mision a la guida del paexe. En tel genaro 2005 la diocexi de Musoma la ga verto el proceso par la causa de beatificasion. Nyerere el ga senpre sostegnù la lengoa swahili e el ga tradoto varie opere eoropee en swahili. Le pi inportanti le xe el Giulio Cesare e el Marcante de Venesia de William Shakespeare.
Wikimedia Commons el detien imàjini o altri file so Julius Nyerere
el detien schemi gràfeghi so
| Controło de autorità | VIAF (EN) 39382046 · ISNI (EN) 0000 0001 2100 7568 · LCCN (EN) n79056334 · GND (DE) 118735748 · BNF (FR) cb11917965t (data) · BNE (ES) XX1477130 (data) · NLA (EN) 36219407 · WorldCat Identities (EN) n79-056334 |
|---|