Verxi el menu prinsipałe

Lunardo Loredan (Venesia, 16 de novenbre 1436 - Venesia, 21 de giugno 1521) el xe sta el setantasincueximo doxe de ła Repùblica de Venesia.

Stema del doxe Lunardo Loredan
Lunardo Loredan

Fioło de Gerolamo e Donata Donà. El scominsia ła so cariera pułitega inte'l 1455 co l'elesion a avogador dei xudexi de petision. Inte'l 1461 el se marida co Moroxina Giustinian co cui el gavarà nove fiołi: Lorenso, Girolamo, Alvixe, Vicenso, Bernardo, Donata, Maria, Paola, Elixabeta. Inte'l 1473 el vien eleto camarlengo de comun, e inte'l 1479 proveditor al sałe. Inte'l 1487 el vien nominà podestà de Pàdoa. Inte'l lujo del 1492 el vien eleto procurador de San Marco de citra. El 2 de otobre 1501 el vien eleto doxe.

El so dogado el scominsia co'l rinovo de ła pase co'l turco, e co'l conpletamento de ła concuista del litorałe romagnoło. Intanto, a Venesia, vien inviai dei laori de ristruturasion de ła xona de Rialto 'ndove ghe jera sta un groso incendio: vien ricostruio el Fontego dei Todeschi e costruio el Pałaso dei Diexe Savi. Inte'l 1508 vien concuistai anca i teritori asburgisi de Trieste, Gorisia e Fiume. A chel ponto łe potense eoropee łe se mete insieme inte ła liga de Cambrai par contrastar ła Serenisima, e inte'l 1509, dopo ła vitoria inte ła bataja de Agnadeło, łe scominsia a invadare el stato da tera. 'L 8 de lujo al Major Consejo el Loredan el fa un apeło al patrisiato parché el se inpegne de pì inte ła difexa de ła libartà de Venesia e inte i mexi sucesivi el da 'l exenpio finansiando a so spexe un grupo de armai guidà da do de i so fiołi par difendare Pàdoa. Intanto vegneva portà vanti łe tratative co'l papa e, dopo el ritiro del interdeto, vien proclamà ła Liga Santa in funsion anti fransexe. Pochi ani dopo Venesia ła se mete co i fransexi e inte'l 1517 finise ła guera.

Durante el so dogado el Loredan el ga vudo speso problemi de sałute, ma cuesto, almanco fin al 14 de giugno 1521, no ghe inpediva de partesipar a łe riunion del goerno. El 19 de giugno, senpre del 1521, ghe vien troncà un deo del pie che romai el jera in gangrena. El di dopo łe so condision łe pegiora e 'l 21 ghe vien data ła strema onxada. El 22 de giugno el more, ła so salma ła vien portà a San Xanipoło. Al funeral l'orasion funebre ła vien leta da Andrea Navagero.

Dopo ła morte del doxe i incuixitori sora el doxe defonto i ga invià un proceso par insolvibiłità: i eredi del doxe, pochi ani dopo, i sarà costreti a pagar na multa de 2700 ducati.

Altri projetiModìfega

  •   Su Commons ghe xe dei file multimediałi su Lunardo Loredan

  • Doxe de Venesia

     
    Cuel prima Cuel daspò
    Agostin Barbarigo 2 de otobre 1501 - 21 de giugno 1521 Antonio Grimani