Matteo Giovanni Bragadin (Venesia 1689 - 1767) el xe sta on patrisio venesian.

Fioło cadeto de Andrea Bragadin, el faxeva parte de una de łe quatro fameje, cosidete evangełiche (Bembo, Bragadin, Corner, Giustinian) de più vecia nobiltà de Venesia. Insieme al fradeo magior Daniele (1683-1755, Procuratore de S.Marco inte el 1735) el ga eredità łe fortune de ła fameja, de orixine dalmata, e el ne xe sta ł'ultimo disendente.

Matteo (o Mattio) III Giovanni (Zuanne) Bragadin de Santa Marina el xe nato inte el 1689 e el xe morto el 14 de otobre 1767. El xe sta senador de ła Republica e menbro del Consejo del Doge (o Consejo Minor) che el gera composto de siè menbri, uno par ogni sestiere. In st'ultima quałità el xe sta anca dexignà Inquixidor de Stato, in quanto uno dei siè consijeri el vegneva destinà a ricoverzare tałe carica e vegneva denominà Inquisidore roso.

Inte el 1735 el xe sta acuxà davanti al Consejo dei Diexe, dal fradeo majore, de aver tentà de coparlo col vełen ma el xe sta prosiolto dopo na longa indaxine durà oto mexi.

Omo tanto pio, ma incurioxio da łe arti magiche, insieme ai nobiłi Marco Dandolo e Marco Barbaro el xe sta uno dei protetori de Giacomo Casanova. Ł'incontro intrà i du el xe suceso el 29 de apriłe 1746, durante na festa de noze a palazzo Soranzo de San Polo, a cauxa de małor che gaveva colpìo el Bragadin: el xe sta infati Casanova a riaconpagnarlo a caxa e a curarlo, a dispeto de łe indicasion del dotore de fiducia del Bragadin, tałe Ludovico Ferro, che pare el ne avese pejorà łe condision co medicamenti inaproprià. Esendose in seguito ristabiłìo, el nobiłomo el se ga convinto de esare sta salvà dal tenpestivo intervento del Caxanova e di doverghe ła vita.

In seguito, a xe sta ła cabała a sementare el raporto intrà el pio devoto e el sanguigno aventuriero. Ła rełasion intrà i tre nobiłi e Casanova ła ga susità on scandało intrà i benpensanti, che i acuxava el Casanova de carpire ła bona fede del Bragadin atraverso pratiche magiche. A xe restà parece riferte (raporti de łe spie dei Inquisidori de Stato) che i documenta quanto i magistrati i seguise co preocupasion ła vicenda che co ogni probabiłità a xe sta uno dei motivi de ł'aresto e de ła carcerasion del Casanova.

A xe serto che Bragadin el xe sta sinceramente afesionà al Casanova, che el considerava a ła stregua on fioło, e el ne xe sta fin a ła morte el pì fedełe benefator.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Matteo_Bragadin&oldid=1054192"