Sant'Antonio da Padova

Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Sant'Antonio da Padoa

Sant'Antonio de Padova, al secoło Fernando Bulhão (Łisbóna, 15 de agosto 1195 - Pàdoa, 13 de zugno 1231) xe stà un frate francescan, e el xe un santo de ła Céxa Catòłega. Ła data de nàsita ła xe tramandà par tradision.

Afresco de Simone Martini in te ła baxełega Inferior de Asisi, che mostra Sant'Antonio insieme con San Francesco

El jéra de fameja de nobiłì portoghexi, disendenti dal cavałiere croxà Goffredo di Buglione.

Prima co ì Canonici regolari agostiniani de Coimbra (1210), dopo co ì francescani (1220), el gà predicà dapartuto, 'ntel Portogało prima, e dopo in Itałia; le sò parołe le jéra piene de dotrina de łe Sacre Scriture.

'Ntel 1221 el gà incontrà, a ła Porziuncola, San Francesco de Asisi, che el ło gà mandà a l'èremo de Montepaolo, tacà Forlì, sità dove el gà scuminsià a predicar.

Profesor de teołogia e a ło steso tenpo predicator, el gà conbatù l'erexia catara, soratuto in Fransa, co tanta fòrsa e co tanta convinsion. Dopo el xe stà trasferìo anca a Bułogna e in fin a Pàdoa, sità dove el xe patron.

El xe morto el 13 de giugno del 1231, a l'età de 35 ani, visin de ła cexa de l'Arceła (Ara Coeli), frasion nord de Padoa, de ritorno dal convento de Canpo San Piero indove ch'el se jera ritirà. Dopo ła so morte i tanti miracołi i gà fato in modo che el fuse invocà dai devoti come un infaticabiłe guaritor, e tuti i lo dixeva santo.

'Ntel 1232, l'ano dopo de ła so morte, papa Gregorio IX el lo gà fato santo.

Pio XII in tel 1946 el gà eleto Sant'Antonio tra i dotori de ła Cexa Catołica; in particołàre ghe xe stà dà el titoło de dotor evangełico', parché el jèra sołito sostegnere łe so afermasion co łe çitasion del Vanxeło.

Ła granda Basiłica de Padoa ła xe dedicà a Sant'Antonio, e in çità ła xe cìamà "El Santo". Ghe xe anca un dito su Padoa, ligà anca al Santo: ła sarìa difati ła çità col cafè sensa porte, el santo sensa nome, el prà sensa erba, che sarìa el cafè Pedrochi, sant'Antonio apunto, e el Prà de ła Vałe.

Sant'Antonio el se festeja el 13 de giugno; a Padoa, par l'ocaxion, se fà na inponente çełebrasion co ła proçesion.

Controło de autoritàVIAF (EN51659098 · ISNI (EN0000 0001 2279 812X · SBN (ITIT\ICCU\CFIV\023816 · LCCN (ENn50051888 · GND (DE118503510 · BNF (FRcb12111694w (data) · BNE (ESXX4660189 (data) · ULAN (EN500342642 · NLA (EN36461894 · BAV ADV10233315 · CERL cnp01259886 · NDL (ENJA00620269 · WorldCat Identities (ENn50-051888
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Sant%27Antonio_da_Padova&oldid=957402"