Gràfia Vèneta Clàsega

La grafia veneta classega la xe la grafia istorega, doparada par scrivar in veneto, in particolar in la varianza veneziana. La xe comunque adatàbiłe a tute le varianze de la lengua, senza cambi de grafia, ma solo de pronunza.

La xe la prima grafia veneta a essar stada normalizada, inte el 1829 da Giuseppe Boerio, inte el so Dizionario del Dialeto Venezian.

Unquò la xe stada parzialmente sbandonada, in favor de grafie che le se adata megio al italian. La xe oncora doparada par la toponomastega de la cità de Venezia e de altre località de la laguna.

Grafia

Alfabeto

El alfabeto classego normalizà dal Boerio el se compone de vinti e un carateri:

A B C D E F G H I L M N O P Q R S T U V X Z

Qualche autor el doparava anca la letara Ç. Le letare J, K, W, le xe stae zontae par grafie difarenti o par parole foreste.

Pronunza de le vocali

El veneto el ga mantegnuo le sete vocale del latin volgar, come el italian e el furlan.

a el ga el valor de [a]
e el ga el dopio valor de [ɛ] (es. belo ['bɛo]) e de [e] (es. pévare ['pevaɾe])
i el ga el valor de vocal [i] e de consonante [j]
o el ga el dopio valor de [ɔ] (es. òstrega ['ɔstrega]) e de [o] (es. ortiga [or'tiga])
u el ga el valor de [u] e de consonante [w]

	anterior	central	posterior
alte	i		u
medioalte	e		o
mediobasse	ɛ		ɔ
basse		a

Pronunza de le consonanti

El veneto el ga un numaro de fonemi consonànteghi che el va, a segonda de le variante, intra i vinti e i vinti tre, in un nùmaro complessivo stimà de vinti nove, che tutavia no li pole coesìstar tuti quanti inte la istessa variante.

b el ga valor de [b].
c el ga valor de [s], [ts], [θ], [t] (a segonda de le variante), co che el xe davanti a e o i. El ga valor de [k] co che el xe davanti a na consonante o a a, e, u. A esempio: ceola ['seoɰa], cinque ['siŋkwe], cristian [kris'tjaŋ], cuculo ['kukuɰo].
d el ga valor [d], qualche variante la ga na pronunza dental [ð] infra vocale. A esempio: fredo ['fredo] (ma anca ['freðo])
f el ga valor [f], qualche rara variante la ga na pronunza pi spirada [ɸ]. A esempio: femana ['femana] (ma anca ['ɸemana])
g el ga valor de [j], [dʒ] a segonda de le variante, co che el xe davanti a e o i. El ga valor de [g] co che el xe davanti a na consonante o a a, o e u. A esempio: geri ['jɛɾi] (o [dʒɛɾi]), giasso ['jaso] (o ['dʒaso]), gamba ['gaŋba].
h no el ga valor fonetego, el se usa inte digrafi e trigrafi.
l el ga sempre valor [l] solo in poche variante. En la magior perte de le variante el ga el valor:
- [l], vicin na consonante (compreso i co che el val [j]) o a fin de parola. A esempio: malta ['malta], Italia [i'talja], ninziol [niŋ'sjol].
- [ɰ], intra do consonante oclusive (a, o, u). A esempio: tola ['tɔɰa], balon [ba'ɰoŋ], luse ['ɰuze] (ma anca ['ɰuze]).
- nissun, co che la xe inframezo a do vocali de le qual al manco una e o i. A esempio: celegheta [see'geta], caligo [ka'igo], limega [i'mɛga] (ma anca [li'mɛga]).

Altri alofoni de [l] li xe [j], [e̯], [r] e [ʎ].

m el ga valor [m], trane co che el xe davanti p o b, che el se pronunza [ŋ]. A esempio: magion [ma'joŋ], amor [a'mor], tempo ['teŋpo].
n el ga valor [n], trane co che el xe a fin silaba, che el se pronunza [ŋ]. A esempio: nosa ['noza], intanto [iŋ'taŋto], can ['kaŋ].
p el ga valor [p].
q el ga valor [k].
r el ga valor [ɾ], qualche variante la ga na pronunza retroflessa [ɽ] o anca vibrante [r]. A esempio: 'naranza [naɾaŋsa] (ma anca [naɽansa]).
s el ga valor [s] co che el xe prima de na vocal a inizio de parola, o co el xe vicin na consonante sorda. El ga valor [z] co che el xe infra do vocale, o co el xe vicin na consonante sonora. A esempio: suto ['suto], aspro ['aspro], rosa ['roza], sbarufar [zbaru'far].
t el ga valor [t].
x, che el se dopara solo par la vose verbal xe e par i so derivai, el ga valor [z].
z el ga valor sordo [s], [ts], [θ], [t] (a segonda de le variante), o sonor [z], [dz], [ð], [d] (a segonda de le variante). Infra do vocale el ga sempre valor sonor. A esempio: 'nasion [na'sjoŋ] (ma anca [na'tsjoŋ], [na'θjoŋ], [na'tjoŋ]), ànzolo ['aŋzoɰo] (ma anca ['aŋdzoɰo], ['aŋðoɰo], ['aŋdoɰo]).

Pronunza dei digrafi e dei trigrafi

Un certo numaro de fonemi el xe indicà da digrafi e trigrafi.

gn el ga valor [ɲ]. A esempio: sgnacar [zɲa’kar], gnente [‘ɲeŋte], magnar [ma’ɲar].
ss el ga valor [s]. A esempio: massa [‘masa], sassin [sa’siŋ], pesse [‘pese].
zz el ga valor [s], [ts], [θ], [t] (a segonda de le variante). A esempio: scoazze [sko'ase], tazza ['tasa], pezza ['pɛsa].
ch el ga valor [k] davanti a e e, al manco che no se crei el trigrafo chi, anca davanti a i. A esepio: cheba [‘kεba], zochèra [so’kεra], schiribizo [skiri’biso].
gh el ga valor [g]. A esempio: gheto [‘geto], amighi [a’migi], celegheta [see’geta].
chi el ga valor [tʃ] o [tʃi]. A esempio: chiave [‘t͡ʃave], schiopo [‘st͡ʃɔpo], chiocolata [t͡ʃoko’ɰata]. En una minoranza de casi el se pronunza [ki].
qu solo in poche ecezioni se pronunza [k]. A esempio: quel [‘kel], qualchedun [kalke’duŋ], quieto [‘kjeto], quatordese [ka'tɔrdeze]. De solito se pronunza [kw].

Segni diacriteghi

La grafia classega la dopara tre segni diacriteghi:

el acento grave (`) el se mete sora tute le vocale. Sora e e o, el indica na vocal verta [ɛ], [ɔ].
el acento guo (´) el se mete solo sora e e o. El indica na vocal serada [e], [o].

Tuti e do li acenti li se mete solo co li casca so l'ultima letara, o par evitar omografi. Quindi se gavarà magnar (mia magnàr), ma cità, pescà, schiopà, ecetera. Resta a discresion del autor la decision de metar altri acenti par rendar el testo pi chiaro.

el apostrofo (') el se dopara co le scompar da na parola una o de pi letare. A esempio, el el se pol troncar in 'l, una el se pol troncar in na.

Difarenze infra le varianze

La grafia classega la se adata a tute le principali varianze, par la so flessibilità de pronunza. A ogni simbolo el pol corispondar un solo sono par tute le varianze opur un grupo de soni omografi che li cambia a segonda de la varietà de la lengua.

Alofoni del fonema [l]

La letara l la xe una de le pi carateristeghe de la lengua. El fono el pol dipendar da la vicinanza de la letara a na vocal o a na consonante. Uno dei fenomeni pi comuni el xe la "ele velar", par cui [l] el muta in na aprossimante velar che la tende tanto a [e], pronunzada [e̯] o [ɰ], o anca palatal [j]. de frecuente la sparisse anca completamente. Nei dialeti coloniali (come el udinese e el triestin) e inte el chiozoto, sto fenomeno no el ghe xe mia e, anzi, la pronunza la vien acentuada qualche volta in [ʎ]. Xe pi limità el rotacismo, par cui l el se pronunza [r] prima de na consonante.


Esempio	Pronunza co [l]	Possìbiłi pronunze alofone
tola	['tɔla]	['tɔɰa], ['tɔe̯a], ['tɔʎa]
lori	['loɾi]	['ɰoɾi], ['e̯oɾi], ['joɾi], ['ʎoɾi]
saltar	[sal'tar]	[sar'tar]
cavelo	[ka'velo]	[ka'veo], [ka'veʎo]

Flutuazioni [ts],[t̪],[θ],[s] e [dz],[d̪],[ð],[z]

En alcune parole, el xe possìbiłe predir le variazioni de pronunza infra na parlada e quelaltra parché la esiste na certa regolarità determinada dal fenomeno de le flutuazioni. Le flutuazioni le reguarda le letare c e z.


Esempio	Pronunza flutuante
zente	[‘zeŋte], [‘d̪eŋte], [‘dzeŋte], [‘ðeŋte]
pacienza	[pa’sjeŋsa], [pa’t̪jeŋt̪a], [pa’tsjeŋtsa], [pa’θjeŋθa]
cesto	[‘sesto], [‘t̪esto], [‘tsesto], [‘θesto]

Coligamenti foresti

Dizionario Venezian del Boerio