La Lesìnia l'è na zona ziogràfega che la se tróva par la majior parte in teła provincia de Verona e un tochetìn anca in cueła de Vicensa. L'è praticamente un tòco de łe Prealpi Venete quasi par conto suo:
a Nord l'è serà da ła Val dei Ronchi, beła fonda e selvajia, e dal maestoso grupo del Carega, a Est da ła Val Leogra, a Sud dal corso dell’Adexe e dal'alta pianura veronese e a Ovest da ła Val d'Adexe. L'è solcà da un saco de vałi che dai pascoli piassé alti le va zó e le se destende a ventajio verso Verona e la pianura. Andando da Ovest verso Est, catémo le vałi de Fumane, de Maran e de Negrar (che tute insieme le fa la Valpolesela, che parò l'è na definision storica pitòsto che ziogràfega), e dopo la Valpantena, el vajo de Squaranto, la val de Mezàne e cueła de Illasi, la Val Tramegna, la Val d'Alpone, la Val del Cianpo e la Valdagno. Le cime a Nord-Ovest le va dai 1500 ai 1800 metri, el grupo del Carega a Nord-Est invese el supera i 2200, mentre la zona centrałe la stà tra i 1000 e i 1300 metri.
El nome Lesinia vien dal dialeto bavarese che se parlaa su l'altopian. Lietzsen - valigian o omo dei monti - l'è diventà Lesinia. I abitanti de la Lesinia vien da la Baviera. El vescovo de Verona, inte el secolo XII, ga domandà al vescovo de Monaco de la gente par colonizar l'altopian che l'era udo. Quando i studiosi veronesi ga volesto saver l'origine de sta gente i ga domandà 'voialtri, ci sio', e lori i ga rispondio Tzimber, che volea dir tajaboschi. I abitanti de la Lesinia no i ze mia latini, i ze de origine todesca, ma no i ze cimbri. Che i sia cimbri se trata de na legenda che tanti voria far creder vera.
Ligadure forèsteCànbia
rimandamento da Monti Lesini
