Sełeno de Verona

El sełeno de Verona el xe na varietà de sełeno (Apium graveolens rapaceum), dito celeriac in inglexe, Zeller in todesco e sedano rapa in tałjan, 'ndove ła parte ke conta de pi e ke se magna xe ła raixa, grosa anca 15 cm de diametro, maron fora e bianca drento, tonda come na bała. Łe foje łe xe verdi, i pecol cavi. El sełeno de Verona el ga poco podere całorico (soło 23 kcal/100 g), tanto sełenio, vitamina C e E. El xe un bon antiosidante, ma ocore magnarlo cruo in sałata o coto al vapore par conservar ste proprietà. El tenpo par tirarlo su dal canpo va da metà agosto ałe prime giaxade (novenbre).

Sełeno de Verona
Sorte
Invension	}

Magnari col sełeno de Verona

Sopa al sełeno de Verona

Par 4 persone ghe vol:

• 200 g de sełeno de Verona
• 100 cl de brodo
• 150 de pastina da minestra
• 50 g de buro
• formajo grana gratà
• sałe
• pevare

Spełare e netare ła raixa, tajarla a toketi e mis-ciarla co mexo litro de brodo col frułatore finkè no vien fora na crema. Versare in na pignata, xontare el brodo ke resta e sbołentare par 10 minuti. Xontare ła pastina e cuxinare par 10 minuti, metarghe drento el buro e 2 pugni de grana, regołare de sałe e pevare, mis-ciare e servire.

Purè de sełeno de Verona

Par 4 persone ghe vol:

• 750 g de sełeno de Verona
• 40 cl de late
• 40 g de buro
• sałe
• pevare

Spełare e netare ła raixa e tajarla a toketi. Metare i toketi in na tecia, coverxerli de late, farli cuxinare par 15 minuti, finkè no i diventa ténari. Quando ke i xe ténari, se mete i toketi inte el mixer insieme col so sugo de cotura e se fa 'ndare finkè no vien fora el purè.Se rimete el purè 'nteła tecia, se ghe xonta sałe e pevare e se lasa rafredare. Se xonta un poco ała volta el buro, mis-ciando co un frułin. Sto purè el va ben col połastro e el cavreto rosto.

Cervo in tocio al sełeno de Verona

Par 6 persone ghe vol:

• 1 kg de spała cervo
• 4 cl de ojo de oliva veneto
• sałe
• Pevare bianco
• 1 sculièr de concentrato de pomodoro
• 200 g de funghi
• 20 g de buro

Par ła marinada:

• 120 g de carote
• 60 g de sełeno de Verona
• 200 g de sioła
• 10 grani de pevare
• 1 foja de doraro
• 8 perle de xenevro
• 2 rameti de timo
• 1 spìgoło de ajo
• 100 cl de keno

Cavarghe i toketi de pełe e ła cartiłagine da ła carne e tajarla a kubeti de 3 cm de lato. Metare i kubeti de carne in na grosa pirofiła e xontarghe łe verdure de ła marinada tajà a dadeti. Versare sora łe droghe, col timo e ł'ajo skisà. Versare el keno, sarare ła pirofiła co na pełicoła trasparente e far marinare ła carne par na note intiera. El dì dopo, pasare ła marinada par un criveło e metare el liquido in na tecia. Co un piron, cavare i toketi de carne e metarli a sugare su na carta asorbente da cuxina. Scaldare ł'ojo in na tecia e rosołarghe drento ła carne finkè no ła ciapa cołore. Sałare, xontare łe verdure de ła marinada sgiosà e rosołare tuto par 4-5 minuti. Quando ke łe verdure łe taka a ciapar cołore, se ghe xonta el pomodoro e se lasare, mis-ciando senpre. Se xonta el liquido de ła marinada e, se bisogna, anca aqua par tegner coverto tuto. Far bojere e cavar ła spiuma. continuare a cuxinare a fogo mèdio par un'ora col covercio suła tecia. Roversare tuto su un criveło e rancurare el fondo de cotura in na tecia. Scaldare el fondo, regołare de sałe e pevare, xontare ła carne divìsa da łe verdure, far bojere e servire insieme ai funghi, netà e tajà a metà e rosołà col buro in na farsora par 15 minuti.