Truzo

Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Stìngoło

El truzo o fusto o anca trozo el ze ła strutura portante de łe piante. El ze on òrgano caraterizà da ła alternansa de sistemi de gropi, i ponti a liveło dei cuałi se inserise łe foje, e intergropì', łe parte de fusto conprendeste intrà do gropi consecutivi. El fusto el liga raize e foje traerso i tesuti condutori che i ga ła funsion de portar àcua e sałi minerałi da łe raize a łe foje e ła linfa da st'ùlteme a tuto el cormo.

Inte el truzo ghe ze difarenti tipi de tesuti: epidèrmide, parenchimi, tesuti de pozamento, tesuti condutori.

El fusto el połe èsar sudividesto in difarenti zone corispondenti a àree difarenti de ła pianta e a tenpi difarenti de crésita de l'òrgano.

L'àpeze vezetativo canbia

Ła ze ła zona andove ghe ze i tesuti meristemàteghi.

Inte łe Pteridofite l'àpeze el ze fato da na soła sèłuła maristemàtega de forma piramidałe, che ła se divide par piani parałełi a tuti i muzi, determenando on cresimento de łe sèłułe del strato pì esterior e anca l'incresimento del nùmaro dei strati. I buti de łe foje i se forma a poca distansa da l'àpeze.

Inte łe Spermatophyte (Gimnosperme e Angiosperme) l'àpeze el ze formà da on grando nùmaro de sèłułe che i òcupa insieme 100÷200 micron termenałi del truzo. In eło se ghe troa sèłule inisiałi che łe restarà senpre meristemàteghe e sèłułe derivae che inte l'àpeze łe ze oncora bone de divìdarse, ma łe ze destinae a ła diferensiasion man man che łe ze pendeste lontan da l'àpeze da ła formasion de nove sèłułe.

El meristema apegałe in zènare el ga na forma a cùpoła, e el ze formà da sèłułe che łe se divide in manjiera ordenada. I ze stai proponesti vari vodełi par interpretar ła strutura de l'àpeze vezetativo inte łe piante superiori:

  • Tunica corpus

L'àpeze el ze fato da na tùnega, on manteło meristemàtego dato da una (fin a trè) fiłe de sèłułe, le cuałe łe se divide anticlinalmente fazéndoghe crésar ła superfise esterna e dando orìzane ai tesuti tegumentałi esterni. No ła aumenta el nùmaro de strati. Ła ga ła funsion de sostegner ła crésita de vołume del corpus. Da sta cuà riva i buti de łe foje che i sirconda e proteze l'àpeze. Dal scajo (lezena) de łe fojete nase i primordi de łe rame, organizai in manjiera conpagna a ła zema apegałe, che sviłupàndose ła da orìzane a łe rame laterałi (orìzane ezòzena).

  • Pro-meristemi

Inte l'àpeze vezetativo ghe ze trè difarenti strati de sèłułe meristemàteghe: el protoderma che el darà orìzane a l'epidèrmide, el meristema fondamentałe che el costituirà i tesuti parenchimàteghi e el procanbio che el se difarensierà inte i tesuti de condusion. Inte el partegołare el meristema fondamentałe el połe èsar destìnguesto in protoscorsa e protomidoło.

Zona de difarensiamento o de distension canbia

In sta àrea, ponesta soto de l'àpeze, łe sèłułe łe scumìsia a difarensiarse:

  • el aumenta ła vacuołizasion, considerada ìndaze de madurasion de łe sèłułe
  • łe aumenta de dimension par distension
  • finia ła distension, la sèłuła ła perde ła capasità de divìdarse: ła podarà solché finir ła so trasformasion inte el tipo de sèłuła adulta che ła sarà pròpio in baze a ła so pozision inte el organismo vezetałe
  • in sta zona ghe resta solché racuante sèłułe co capasità de divìdarse: łe forma i cordoni procanbiałi, cadauno dei cuałi el organizarà on faso cribrovascołar, formà da libro e legno primari.

Da ła strutura primària a ła secondària canbia

 
Sesion de truzo de Lino. Ep = epidermide; C = scorsa; BF = fibre sclerenchimàteghe; P = floema; X = xilema; Pi = midoło sentrałe.
  1. Le sèłułe indiferensiae a l'interno del faso (procànbio) łe scumìsia a prołiferare;
  2. Racuante sèłułe dei raji parenchiàteghi i scumìsia a divìdarse formando on meristema segondàrio (cànbio);
  3. Le sèłułe del cànbio łe se divide prevałentemente segondo piani tanzensiałi produzendo libro secondàrio verso l'esterno e legno secondàrio verso l'interno. El libro primàrio el vien pendesto verso l'esterno, el legno primàrio verso l'interno;
  4. Altre sèłułe canbiałi łe se divide formando sèłułe de tipo parenchimàtego che łe costituise i novi raji parenchimàteghi;
  5. anca inte i tesuti esterni al libro se ga dei canbiaminti: se difarénsia el fełòzeno che produze sùgaro a l'esterno e fełoderma verso l'interno (sùgaro, fełozeno e fełoderma i forma el periderma). El fełòzeno el połe difarensiarse a diverse profondità: soto l'epidèrmide, inte ła scorsa o par fin inte el libro, ma mai pì internamente del libro. El fełòzeno (difarentemente del cànbio cheel vive cuanto la pianta) el dura in zènaro un ano soło. L'ano dopo se ghene fa n'altro novo, partendo da tesuti pì interiori;
  6. El conpleso de tesuti che se mùcia a ła periferia del fusto dopo de ła formasion del sùgaro se dize ritidoma o scorsa o cortécia;
  7. El fełòzeno el połe no formar un aneło contìnuo, determenando ła formasion de archi de sùgaro che i se intèrsega provocando el destaco de ła scòrsa in scaje, strise etc.;
  8. El pasajo a strutura secondària el połe no èsar contenporàneo inte ła zona esterna e interna del fusto;
  9. L'aumento de ła masa legnoza ła ze pì rełevante de cheła liberiana e ła pròvoca na presion sia inte el midoło sentrałe sia inte ła zona cortegałe, fasiłitando el destaco dei ritidomi;
  10. El sviłupo de ła strutura secondària el porta al desfo dei tesuti primari.

Tipołozie de truzo canbia

Dipendendo dal portamento se połe reconósar difarenti tipi de trozi, par ezénpio:

  • reto: volto verso alto. (majoransa de fiori e piante)
  • strisante o prostrà: pozà in tera. (fràgoła - frołe)
  • ranpegante: bone a ranpegarse so muri o piante arenti a eła. (èdera)
  • vołùbile: no el tien el so pezo se no co on sostegno andove pozarse. (vigne, sucare)
  • ranpante: prima parałelo al teren e dopo reto. (racuante erbe)

Truzo legnozo canbia

In baze a ła consistensa i fusti i vien destinguesti in erbàsei e legnozi. I fusti erbàsei e chełi legnozi i se difarensia intrà de lori sia par morfołozia (védarse portamento de ła pianta) sia par anatomia.

El fusto legnozo de łe piante el ga on incresimento segondàrio, o sia in diàmetro. Anałizando ła sesion se połe catar fora, partendo da ła zona sentrałe, na sèrie de strati:

El stùdio de ła sesion del trozo el ne spiega come che l'àlbara ła sìpia cresua inte el tenpo. Par ogni stajon vezetativa, se forma on aneło de incresimento, gràsie al cuało ne ze pusìbiłe ła determinasion de l'età de l'àlbara, senplegamente contando i anełi.

Truzo erbàseo canbia

Inte i fusti erbàsei se cata solché ła strutura primària, che ła resta par l'intiera durada del siclo vitałe de ła pianta, mentre inte i fusti legnozi ła strutura primària ła muda inte na strutura segondària. I fusti erbàsei i ze tènari e verdi, cofà łe foje, e i òpara ła fotosìntaze clorofiliana.

El fusto erbaceo de łe monocotiledoni no el ga on incresimento segondàrio. Inte ła parte esterna el ze verdo parché no eséndoghe el cànbio sùbero-fełodèrmego (fełòzeno), e no eséndoghe de consevensa mudasion secondàrie del fusto (lignifegasion o prezensa de ritidoma suberifegà), el tesuto parenchimàtego cortegałe el riese a portar vanti ła funsion fotosintètega. Inte el silindro sentrałe i fasi vascołari (de condusion de łe sostanse nutritive) i ze de aparensa ponesti in órdene sparso (atactostełe), łe ze destinguìbiłi in sti cuà 2 zone formae da legno e libro (sensa cànbio intrafasałe), che i parmete la condusion e, gràsie a ła prezensa frecuente de na guàina sclerenchimàtega (co funsion mecànega) intorno ai fasi condutori, i ga anca ła funsion de sostegno de ła pianta.

Inte łe dicotiledoni invese, la dispozision dei fasi cribro-vascołari ła ze de tipo eustèłega, de consevensa co on aneło de fasi cołaterałi verti (prezensa de canbio intrafasałe, che in incresimento segondàrio el divegnarà cànbio cribro-legnozo); i fasi i ze dividesti da raji parenchimàteghi, co funsion tròfega, che i se slonga dal sentro in continuità co i vazi condutori. El fusto el połe èsar verdo anca inte łe dicotiledoni se łe ze zóvani.

Se destingue trè tipi de fusto erbàseo: ganbo o stìngoło, culmo, scapo.

Tipi de trozo erbàseo canbia

Ganbo - Stìngoło canbia

  Dezanbìgua – Se te serchi altri signifegari, védarse Ganbo


 
Sesion trasversałe del ganbo de na Magnoliopsida al microscòpio

El ganbo o stìngoło el porta fiuri e foje e, inte łaso parte interiora, el ze pien de midoło (margarita, legumenoze da graneła, oleìfare ecc.).

Culmo canbia

El culmo el ze vodo drento par ła mancansa de midoło, parò el ze tanto rezistente par ła prezensa de fibre e de menbrane minerałizae. I ze pieni solché inte i gropi andove i se inserise foje e fiuri (formento, rizo).

Scapo canbia

El scapo el ze on fusto sensa rame andove i fiori e le foje łe se cata inserite inte łe do estremità oposte (tulipan). Inte el tulipan l'ase fiorìfaro (scapo) el ze sensa foje e inte ła parte sora el ga on fioro ùnzoło.

Notasion canbia


Altri projeti canbia


Linganbi foresti canbia





Controło de autoritàLCCN (ENsh85127927 · GND (DE4182592-5 · BNF (FRcb12340856m (data) · NDL (ENJA00566958
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Truzo&oldid=1058155#Ganbo_-_Stìngoło"