Suca

Col tèrmano suca i vien ciamai i fruti de difarenti piante che fa parte de ła fameja de łe Cucurbitaceae, in partegolare racuante spece del zènare Cucurbita (Cucurbita maxima, Cucurbita pepo e Cucurbita moschata) ma anca spece che fa parte de altri zènari, cofà par ezénpio ła Lagenaria vulgaris o suca paribon. El perìodo de rancura de łe suche in Vèneto ła va da Setenbre a Novenbre. Rancurarle da Zunjo a Setenbre invese ze pusìbiłe, magnàndosełe cofà sucateło.

Suche

Stòria

Ła suca ła xe orixeària de ła Amèrica Sentrałe. In Mèsego a xe sta catà samese de suca del 6 - 7000 vanti Cristo. Ła suca ła xera el magnar baxe dei pełerosa finmente i ani prima che rivase i pełegrini dal'Eoropa so ła costa atlantega.

Produsion

I 10 mejo produtori de suca inte el 2018
Stato	Produsion (tonełae)
Cina	8.133.734
Ìndia	5.569.809
Ucràina	1.338.000
Rùsia	1.189.539
Mèsego	776.073
Spagna	717.645
Stati Unii de l'Amèrica	683.038
Turchia	616.777
Itàłia	596.397
Małaui	480.233

Proverbi

• Łe suche vode vien senpre a gała vol dir "ła ignoransa no ła se sconde, se uno no sa łe robe, no el xe informà, no el sa ben cheło che el dixe, prima o dopo salta fora".
• o prima o dopo se fa anca łe suche vol dir "co ła xente bexogna ver pasiensa: prima o dopo i ghe riva anca łori a inténdare chel che ghe xe da inténdare".

Na suca

Proprietà

Ła suca ła ga tanta vitamina A, C, calcio, potàsio e fòsforo. I so anti-osidanti nadurałi i fa ben par ła prevension del cancro.

Par 100 g de suca ghe xe:

• 0,60 g de proteine totałi
• 0 g de lipidi totałi
• 3,40 g de glucidi totałi
• 0,70 g de amido
• 2,70 g de glucidi sołubiłi
• 1,30 g de fibra
• 20 mg de calcio
• 0,90 mg de fero
• 1 mg de sodio
• 202 mg de potasio
• 40 mg de fosforo
• 0,03 mg de vitamina B1
• 0,02 mg de vitamina B2
• 599 mcg de vitamina A
• 0,50 mg de vitamina PP
• 9 mg de vitamina C
• 94 g de acua

Magnari co ła suca

Rixi e suca

Par 4 persone ghe vol:

• 500 g de polpa de suca
• 240 g de rixo Vialone nano de Grumoło de łe Badese
• 1 sioła picoła
• 50 g de buro
• 4 cuciari de ojo de oliva veneto
• 3 cuciari deformajo grana padano gratà
• sałe
• pevare

Tritare fina fina ła sioła e desfrisarla in na farsora dove gavemo xa scaldà ł'ojo. Tajare a tocheti ła suca cavando łe semense e versarli 'nteła farsora, xontando 2 - 3 cuciari de aqua, sałe e pevare. Dopo 15 minuti versare drento el rixo e mis-ciare de continuo, xontando aqua sałada quando che el rixo se suga masa. Quando che el xe coto el rixo, se xonta, al bisogno oncora sałe e pevare e dopo el buro e el formajo gratà, mis-ciando tuto. Vin che ghe va ben insieme: Custoza, Pinot bianco dei Cołi Berici.

Subioti co ła suca

Par 4 persone ghe vol:

• 320 g de subioti
• 500 g de polpa de suca
• 1 sioła
• 50 g de butiro
• ojo de oliva veneto
• 1 ciufo de timo
• 4 - 5 foje de salvia
• formajo Aziago stravecio

Metare in na pignata ł'ojo e ła sioła trità scaldando finchè no ła diventa bionda. Xontare metà de ła suca tajà a cubeti, mis-ciare pian pian bagnando co vin bianco. Far sfumare e versarghe sora mexo minestro de aqua calda e regołare de sałe e pevare. cuxinare par altri 10 - 15 minuti. con un mixer frułare el paston finchè no'l diventa beło fiso. Ł'altra metà de ła suca vien tajà a bastonsini e fata desfrizare in na farsora col buro, ł'ojo e łe foje de salvia, prima co fogo alto e dopo baso, par 10 minuti e dopo spolverare de timo fresco, regołare de sałe e stuare el fogo. Intanto se ga coto i subioti e i se versa 'nteła farsora. Se fa saltar tuto versàndoghe sora el paston de suca fato prima. servire co na gratada de formajo Axiago stravecio.

Védarse anca

• Lista de suche e sucati

Altri projeti

Altri progetti

• Wikimedia Commons

• Wikimedia Commons el detien imàjini o altri file so Suca

Linganbi foresti

• zuccaTreccani.it – Enciclopedie on line, Istituto de ła Ençiclopedia Italiana.
• (EN) pumpkinEnçiclopedia Britannica, Encyclopædia Britannica, Inc.

Controło de autorità	NDL (EN, JA) 00564366