An canpanil (dito a Venesia Canpanièl) al ze an edificio a forma de tór colegà ala česa o a un palas aonde ke ghe n'è inte le canpane, ke le gnen sonaze al scopo de convocàr la sent a la funsion relijosa, de scandir al tenp, de nunsiar na festa o na desgràsia. Se al canpanil no el ze ligà a na funsion relijosa ma sivìl, alora al gnen ciamà tor civica.

al canpanìl del Domo de Belun de nòt

Tipi de sonada, funsion e segnaiCànbia

Canpanii de cese

  • bot: bot singoi par sonar le ore
  • meridiana: sonada a tre canpane fata a manca an quart a meodì te la Ceza de Vilabruna (Feltre)
  • sonada a na canpana: in ocasion de qualunque celebrasion se al canpanil al ga na unica canpana, sonar le avemarie se al canpanil al ga pì de na canpana
  • sonar a mort: se sona solche do canpane par nunsiar an mort e par conpagnarlo al cimitero dopo al funeral
  • sonar dopio: se sona a tre canpane par nunsiar la messa (an quart de ora prim) e co se lede al Gloria; 'te un serti posti anca par conpagnar al mort al cimitero
  • sonar ugnol: se sona co na unica canpana te un canpanil a pì canpane par nunsiar la messa, dopo de er sonà dopio
  • canpanò: se sona le canpane a concerto qualche dì prim del santo patrono secont le tradision del posto par nunsiar la festa
  • canpane a martel: se sona a martel par avisar che ghe n'è an incendio o na aluvion, in modo che tuti i core a jutar
  • sgreole: da' che de Vendre Sant na olta no se podea sonar le canpane, se ndea su te el canpanil e se sonea le sgreole par ciamar la zent a la procession

Canpane de tor civiche

  • Convocasion consiljo comunal
  • Mort particolari
  • Aniversari locai e\o nasionai (4 novenber, 25 aprile, 1 majo, 2 zugno e altri)
  • Ore
  • Scola
  • Altre robe

ArchiteturaCànbia

la prima distinsion dei canpanii se pol farla in base a come ke al edificio al se inserìs te el contesto de la česa o del palas al qual al ze colegà. Se ghe n' trova difati de quei conpletamente destacàzi da la česa (tipici de l'Italia), altri tacazi ma comunque dotai de na so porta de aceso e de fonde, e serti conpletamente inglobai 'te la česa, tanto da no aer fonde soe (tipici de le cesete pì cèe).

An nantra distinsion la pol eser fata in base a la idea de costrusion: ghe n'è canpanii fati come na vera e propria tor, co un bus inte par ndar sù e te un serto senso na càsa de risonansa, e altri, i cosideti canpanii "a vela", fati solke da un suporto a mo' de cavalét par čener sù le canpane.

I primi i ze carateristici de quasi tute le Ceze de dimension medie, grande e pisole. Al canpanil al pol eser frequentà da zent (se la so dimension la lo permet) e le canpane se le sent da distante parkè la strutura serada sù la costituis na specie de casa de risonansa.

I canpanii a vela invese i ze tipici de le ceséte pì cèe, pì ke sia 'te el passà 'te la zona alpina, ma anca 'te n serte ceséte in stile francescàn. Incói la gran part de le čese nove le ga an canpanil a vela de cimento armà; la assensa de na strutura serada no la assa ke la canpana la rinbonbe 'te i mur dintorn, sichè se sent na sonada pì linpida ma smorsada.

Controło de autoritàLCCN (ENsh85013025 · GND (DE4157644-5 · BNF (FRcb11934126d (data)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Canpaniłe&oldid=1070725"