Belun

**Belun**
	; ;
Pozision
	46°08′27″N 12°12′56″E
Stato	Itàłia
Rejon	Vèneto
Provinsa	Bełun
Cavedałe de	Bełun
Popołasion
Totałe	35 529 (2023)
Densità	241,33 hab./km²
Zènaro
Demònemo	bełunezi ,
Zeografia
Àrea	147,22 km²
Altitùdene	390 m
Rente a	Limana ; Alpago ; Ponte inte łe Alpe ; Sospiroło ; Longaron ; Sèdego ; Vitòrio
Dati istòreghi
Dì festivo	Festa patronałe(11 de novenbre)
Patrono	Martin de Tours
Còdazi de identifegasion
Còdaze postałe	32100
Còdaze de matricołasion	BL
Fuzo oràrio	UTC+1 ; UTC+2
Prefiso tełefònego	0437
ID ISTAT	025006
Còdaze catastałe de Itàlia	A757
	Premi (1999) Sità Alpina de l'An; Medaja de Oro al Vałore Miłitare ;
Sito web	comune.belluno.it

Belun (na olta ciamada anca "Sividal de Belun", o "Bełun") a l'è an komun de 36.112 abitanti, kaologo de provinzia, e el pi gros zentro abità de la Valbeluna.

Zeografia

La zità vecia de Belun la se kata su na ponta de sas vesin de indè ke la Piave e l'Art i se donta. Drio de la zità ghe n'è la Sciara (2531 m s.n.m.) co la Gusela del Vescovà, al monte Serva (2133 m s.n.m) ko la so pansa grosa e el monte Talvena, vense a sud ghe n'è le Prealpi ke le tira na riga tra el Belumat e la Trevisana. Senper a sud, tel Kastionese, el se kata l'alpe del Nevegal ko i so inpianti de resalita e le piste siisteghe.

Storia

Al nome de la zità al gnen dal celtego belo-dunum ke ol dir konkol ke slusega, propio parké el se kata ten posto de oro in medo a la Valbeluna. La zità l'è nasesta atorno al 200 – 220 a.K. e dal 181 a.K. la ze devegnesta na base militar dei romani e el municipium Bellunum al temp de Augusto l'è vegnest a aver an rolo de granda inportansa un te la X Regio Venetia et Histria.

Al posto indè ke la se katea, al kontrolo par grazia de la prima tor del kastel de Zumele, te la strada pi granda verso el nord, la Klaudia Augusta Altinate, la ha fasest in visa ke la diventese na rokaforte inespugnabile. Taca a rivar i barberi e Belun la se kamina verso un lent e trist tramont par kuel ke interesa l'età romana. Par an bel tok Belun la resta sot al dominio longobardo (VI sec. D.K.) e karolingio (VII sek.), e tel finir del nono sentener al mete radis al goerno aristokratego del Veskovo Konte, nas kosì la zità medieval kol kastel, i murajoi, porte e torioi.

A l'è sto kuà al temp de brute guere foreste kontro i trevisani, specie kuando ke goerna al veskovo konte Giovanni ke l'à ingrandì i domini belumat fin a la grasa piana de Montebeluna, ma presto la grandesa de Venezia la obliga al goerno belumat a kogner de sielier, no sensa grosi rabagas interni, a la dedision spontanea a la zità de la laguna tel 1404 an, so kuà, kuando le se finis le guere kontro i Trevisani e le lote interne intrà le varie fasion. La zità la se fa nova un tel tesuto urbano in visa anka alla kostrusion di kase e palas dei nobili e dei novi siori borghesi, te sti tempi de "vake grase" anka par grasia dei streti raporti ko Venezia, infati se ghe vendea legne e spade. La Piave la era, te sti sekoli navigada da i sater ke i portea do al legnan ke dai bosk del Kadore i andea a rifornir la Serenisima e alimentea l'atività ekonomega dei artisani, dei marangoi, dei porti. Riva pò i burti ani de Napoleon (1797-1815), e al nas ko lù al Departimento de la Piave, Belun al pasa sot i muk strieghi e po dopo longhi ani al pasa sot al Regno d'Italia.

La sità

Andando in su ko la scala mobile se pol veder an gran bel panorama su la Valbeluna, se riva un tel kor de sità vecia e se riva in piasa Domo inde ke ghe n'è al gran kampanil projetà inte el '700 da Filippo Juvarra, e andove ke se afacia i palas de kuei ke komendea na olta, al palas dei Retori del 1491 (ankoi prefetura), al palas ros del municipio e al palas dei veskovi ankoi sede de l'Auditorium, mes sù tel 1190 dal veskovo-konte Gerardo de' Takoli. Palas inde ke al stile nordiko ben al se misia ko el stile arkitetoniko venesian ko bifore e polifore a sesto akuto, porteghi kornicioi e ornamenti di tanto bei, anka ankoi kuel ke tira meio i oci l'è la fontana central fata tel 1411, la statua nova mesa in zima al pilastro l'è stà fasesta da pok e la rapresenta San Joatà (la statua oriunda la ze konservada tel vesin Museo Civiko). Al domo l'è stà fà su tel 1400 al se svilupa su tre navade ko l'abside girà verso ocidente, al projet del domo de ades l'è atribuì a Tullio Lombardo, arkitet venesian, ke l'è gnest a Belun tel 1517 kuando ke i lavori de kostrusion i era bel ke scominziadi sot la direzion de un kapomastro del posto, an certo Nikolò Tagliapietre, ke l'è kuel ke l'a fà anka l'Orolojo del palas dei Retori. Andando par via Medatera (al vecio dekumano masimo de la sità romana), inde ke se facia desine de Palas fati su tra 1300 e 1600 se riva a la cesa de San Piero takada a un dei ciostri del vesin Seminario Gregoriano, kome ke l'è scrit te na iskrision entro te l'atuale Kapela Fulcis, la cesa de S. Piero l'è stà finida tel 1326, dopo pi de kuaranta ani de laori, kuando ke ghe n'era al Jubileo del 1300 olest da Bonifacio VIII. La cesa, fata su dai frati minori in stile gotico, ankoi la ze in stile baroko ko tante opere d’arte: ben sinkue piture de Andrea Skiavone (San Pietro, San Paolo, l’Anunsiasion …), tre kapolaori de Sebastiano Rici tela Kapela Fulcis (fata inte el 1704 tra la cesa e la sagrestia): na Sakra Konversazion, su tola, mesa te l’abside, e i do afreski: “Dekollazione di San Giovanni Batista” e “Kiamata di San Pietro” e sin maniera speciale le do meraviliose pale de lenk de Andrea Brustolon. In zima, sora al presbiterio, ghe n'è un dei pokisimi esempi de organo fonokromego a do tastiere de Giovan Batista De Lorenzi (1860). Te i do kantoi estremi de la sità vecia se pol veder, onkora intere, le do porte majori, l'inponente porta Dojona a nord e, ko i so merlet in piera e matoi, porta Rugo a sud indè ke vesin se kata al Palas del Kapitano e la sinkuesentesca cesa de Santa Maria dei batuti.

Poki sas i ne dis ke ghe n'era un kasel te ka sità vecia, da drio apena fora da le mura se verde in tuta la so belesa e grandesa la piasa Kampedel ke ancoi la se ciama Piazza dei Martiri in ricordo de kuei ke i è stadi pikadi dai muk su pa i pai de la piasa. Sta piasa la ze konsiderada al saloto dei belumat kol so liston (paseggiata) ko la cieza de San Rok dove ke ghe n'è kuadri de Padre Santo da Venezia e Luigi Cima. Andando verso est e paza ia pisa Tojo Lele (Vittorio Emmanuele), inde ke se afacia al teatro Komunale, se riva in via Roma e da là se riva al la cesa de Sant Stefen.

La cesa de Sant Stefen, la pi bela Ceza de Bełun, la ze stata fata su tel 1463, al posto de la vecia ceseta de la Madona de le Grazie. Tel 1480, ko i era drio scavar i a katà al sarkofago de Flavio Ostilio, ke inkoi l'è stat mes tel kortivo de palazzo Krepadona. A cener su le volte a krozera, e konsideradi tra le opere d'arte pi interesanti konservade inte la ceza, ghe n'è doi angioli de Andrea Brustolon ke al a fat anca na kros - tacà sul mur a sinistra); un te la Kapela Ceza (1485) a manca del presbiterio: un altar de lenk intajà, e se pensa ke lo epie fat al belumat Andrea di Foro (XV sek), ko i afreski picenini un te la kornis ke se pensa i epie fati Matteo Cesa; afreski de Jacopo da Montagnana, ko su al martirio de Sant Stefen e la konversion de Paolo, la vita del Signor, i e saltadi fora da sot le malte dopo del taremoto del 1873. Bel anka al tabernakol de lenk de frà Francesco de ła Dia; tele del la skola de Vecelio, na "Adorasion dei Magi", fursi de la botega de Tiziano; kuindese formele de ram e una in tela de Francesco Frigimelika te la kapela de sinistra; tele de Cesare Vecelio e del Frigimelika sui mur del batistero. Vesin de la Ceza ghe ne al konvento dei Serviti kol bel kiostro gotiko ankoi sede dell'intendensa di finansa. Inde ke finis le "skalete" l'uniko esempio de Cesa in stile romaniko de la zità dedikada a San Biagio.

Da pensarse: palas Barceloni Korte, palas Doglioni, palas Piloni, palas Barpo, le Cese de Santa Maria de Loreto, la Seisentesca Cesa di San Gervasio, la cesa di San Nicolò do a Borgo Piave ke lambis le sponde dell'omonemo fiume e la Ceza de San Giuseppe "marangon" (falegname) a Borgo Prà ke fin a la fin del medioevo fu la kapitale de la produsion de spade da bataglia. La zità po la continua verso i kuartieri residensiali de Kavarzan, Baldenik, Musoi e San Lorenso.

La kultura

Sebastiano Ricci Diana e Endimione, 1714, Londra, Chiswick House

Tante le manifestasion kulturali organizade in ambito citadino. Palazzo Krepadona in 'sti ultimi ani l'è gnest al centro kulturale citadino par antonomasia ko le so numerose importantisime mostre da Vincent Van Gogh a Pablo Picaso, da Jean-Baptiste-Camille Corot a Claude Monet, Ippolito Caffi, Sebastiano Ricci e tanti altri. La sità la ze sede de n'orkestra da kamera, de numerosi kori polifonici e popolari, La stajon teatrale de prosa la ciama spetatori da ogni sità del Veneto. Ogni an, in okasion de la festa patronale di San Martin, gnen organizada l'ex tempore di skultura su lenk dove ke decine de artisti de fama internazional e se fa guera a kolpi de skalpel sparsi par tuti i kantoi pi bei de la sità. Ogni an inte la manifestasion "Oltre le Vette" gnen fati tanti inkontri, koncerti, konvegni ecc.. dedikadi a la montagna.

Kusina

Piati tipici de la tradiẑion belumata:

formai skiz
torsela
pastin a la piastra
polenta e kaoriol,
kasunziei
polenta e osei
pendole
risi co i bruskandoi
risi e bisi
fasoi de Lamon
kodinzòn
skorzinciole
pom noselà
pan de Belùn

Fiere

La "sagra dei fiŝciòt" lè segur la più grosa fiera de la žità e la gnen in primavera, dò domeneghe prima de Paskua. Ghe n'è la mesa e na longa procesion 'nde ke se porta in giro la statua de la Mazona dei sete dolori ke la è cenesta 'n te la kapela piciola de la Ceza de Sant Stefen. Ghe ne an mucio de roba da magnar, zughi par i boce e traghene varie de artigianato lokale. Ko riva sera i fa i foghi de artificio ke i sluseghea in siel ke imbarlumea tuta la sità.

In sto periodo inte la piaza se fà an vecio sogo tipiko ko i ovi sodi, ke se ciama Ròlo.

La Fiera de San Martin, patrono de la žità, la ze a novembre e ghe nè, oltre a la già mensionada ex tempore internasional de skultura su lenk, an bel markà de la roba vecia te pol snisar i prodoti lokali e serkar le kanstegne kol vin novo. Tut finis a la sera ko un koncerto de musika sinfoniko-korale entro te el Domo.

Sport

A Belun ghe ne na starnera de impianti sportivi, na pisina olimpionika ko kuatro vaske, an palas del gias, an stadio polisportivo, un palaset de lo sport e vesin del zentro su sul Nevegal an komprensorio siistiko ko piste da sci alpino de varie difikoltà e pendenze e un pista di sci nordico su ai Pianlonghi.

File:Hockhey goal cmd 2004.jpg

Hockhey so jaso

File:Schipck.JPG

Scating in salita

L' Associazione Kalcio Belluno 1905, la porta i kolori gial e blu.