Monte Ortigara

Monte Ortigara
	;
Sorte	Montagna
Liogo
Continente	Eoropa
Rejon aministrativa	Provincia de Vicensa (Itàlia)
Caena montagnoza	Altipian dei sete comuni
Dati SOIUSA
Gran parte	Alpi Orientałi
Gran setore	Alpi Sud-orientałi
Sesion	Prealpi Vènete
Sotosesion	Prealpi Visentine
Supergrupo	Grupo dei Altipiani
Grupo	Altipian dei sete comuni
Sotogrupo	Dorsal Sima Dodexe-Ortigara
Còdaze	II/C-32.I-A.3.b
Dati e sifre
Altitùdene	2 106 m

El Monte Ortigara el xe alto 2105 metri e el xe postà suł'orlo nord de l'Altopian de Asiago, a strapionbo suła Valsugana, 1000-1500 metri pi in baxo.

Zeografia

Scrita sul troso ke vien su dal Valon deł'Agnełiza

A est el casca xo sul Vałon deł'Agnełiza, ke ło destramesa da ła Sima de ła Caldiera (2124 metri), a sud el Coston dei Ponari e ła Val deł'Agneła i ło divide dal Monte Canpigołeti (2052 metri). A ovest, dopo el Paxo de Val Caldiera, se va verso Sima Undexe e Sima Dodexe (2336 metri).

Caratteristiche

Ł'Ortigara ła xe na montagna calcarea, de tipo carsico, co crepe e busi dove ke se versa tuta l'aqua ke piove. Ghe crese el pino mugo e fiori come ła steła alpina e el rododendro.

Batałja deł'Ortigara

Monumento tałjàn

Ła batałja deł'Ortigara xe sta combatua 'nteła prima guera mondiałe, intrà l'Esercito Tałjàn e l'Esercito Austro-Ungarico, intrà el 10 e el 29 zugno del 1917. Par ła tremenda strage de Alpini ke ghe xe sta, l'Ortigara xe sta ciamà anca el 'Calvario dei Alpini'.

Batałjoni

Da na parte ghe xera 20 batałjoni Alpini (52.ma Division), el 9. Regimento Bersaglieri e la 29. Division de Fanteria, par un totałe de 54 batałjoni. Come artijeria ghe stava 428 canoni e 220 mortari. Da kel'altra parte, i Austriaci gaveva ła 6. Division de Fanteria, co 24 batałjoni, e 150 canoni e 75 mortari.

Incomiçio

Dove ke xera el posto de primo socorso austriaco, drio ła sima deł'Ortigara, proprio sul bordo del buron.

Ła batałja xe incominçià a łe 5.15 del diexe de zugno quando ke l'artijeria tałjàn ga tacà a bonbardare el Monte Ortigara ke xera tegnù dai Austriaci. Łe bonbe łe ga continuà fin a łe 3 del dopomesodì. A kel punto, vegnendo da sud e da est (Sima Caldiera), xe partii a l'asalto i batałjon Alpini Mondovì, Ceva, Val Stura, Vestone e Bicocca.

Butandose xo de corsa par el Valon deł'Agnełiza, rivando da łe postaxion tałjàn de Sima Caldiera, xe rivà anca i batałjon Alpini Bassano, Monte Baldo, 7 Comuni, Val Ellero e Monte Clapier. Vien ciapà el Monte Ciesa, el Corno de ła Segała, quota 2003 e quota 2101 (ke i Austriaci ciama Sima Le Pozze).

El 20. batałjon austriaco Feldjaeger vien soprafato e a fadiga tien duro el 7. Feldjaeger; vien mandà rinforsi e, anca se vien copà subito el comandante del 20. Feldjaeger e queło del batałjon de fanteria de rinforso, i Alpini no i xe boni de ciapar ła Sima deł'Ortigara (2105 metri), ke resta ai Austriaci.

Dał'undexe al quindexe piove e anca nevega; i scontri i xe de patułje e de plotoni. Xe inpiegà i batałjoni Alpini Verona, Val Arroscia, Monte Mercantour, Tirano e Monte Spluga. Ałe 0.30 del 15, 3 batałjoni de Kaiserjaeger i taca e riese a ciapar de novo quota 2101, ma pochi dì dopo i Alpini del Valtellina, del Saccarello e del Monte Stelvio i ocupa oncora Sima Le Pozze.

18 zugno

Monumento austriaco.

Ŀa matina del 18 de zugno ł'artijeria tałjan taca de novo a bonbardar el monte e łe vie de rifornimento; riva anca ł'aviaxion, co 145 aerei (conpresi 26 bonbardieri pesanti Caproni). I Austriaci risponde co 26 aerei da cacia. El 19, finalmente, in 45 minuti, 7 batałjoni Alpin, guidà dal 7 Comuni, i taca e i ocupa ła Sima deł'Ortigara, ciapando pi de 1000 prigionieri, 5 canoni e 15 mitrajatrici. Pi vanti, parò, i soldà tałjàn no i riese a ndare.

22 zugno

El 22 de zugno, taca un bonbardamento austriaco ke scarica sui do kiłometri quadri in sima al monte tegnù dai Alpini 250 tonełate de bonbe, de łe cuałi 90 'nteł'ultima ora soło suła Sima deł'Ortigara. El 25, a łe 2.30, coi lanciafiame, parte 7 batałjoni de Kaiserschuetzen ke i taca quota 2105. Vien mandà in socorso łe riserve de ła 52. Division e el regimento de Fanteria Regina. Xe na strage: i se copa cołe piere, coi piconi, coi cortełi.

I Austriaci i riese a vegner vanti e i buta xo i Tałjàn anca da quota 2101, 2003 e dal Paxo Deł'Agneła. I pochi Alpini ke no xe sta copà i core xo pal Vałon deł'Agnełiza par torna su da keł'altra parte, a Sima Caldiera, ma i Austriaci i ga butà granate a gas sul fondo del Vałon e così i ultimi i more o copà dal gas in fondo o sparà dał'alto. Pi de 1000 morti tałjàn e 1000 feridi o prigionieri.

El 26 un contrataco dei do batałjoni Cuneo e Marmolada riporta i Alpini sul Paxo deł'Agneła e su quota 2003, ma el 29 tuti e do i batałjon vien çircondà e ciapà prigionieri.

Fin de ła batałja

Ała fin de ła batałja, ke ga lasà łe robe come ke łe stava, i Alpini de ła 52. Division ga avudo 12 633 perdite su 15 000. El totałe de łe perdite tałjan (morti, feridi, dispersi, prigionieri) xe sta de 25 199. I Austriaci ga avudo 8 828 perdite.

Wikimedia Commons el detien imàjini o altri file so Monte Ortigara
Scholia el detien schemi gràfeghi so Monte Ortigara

Controło de autorità	LCCN (EN) sh2010003074