Montel

El Montel el xe na cołina alta 371m. su ła destra de ła Piave.

Montel

Sorte	Cołina
Posto
Rejon aministrativa	Provincia de Trevizo (Itàlia)

Storia

Le Prealpi viste dal Montel

Fin da tenpi assae remoti l'homo ghe ga abità. La prova ła vien da veri e propri depositi de tochi de selce che se trova lavorada in gran quantità par ponte de frece, lame, manère etc. de l'epoca del "paleolitico".

Par ła Serenisima se tratava de un bosco publico (o, mejo dito, de proprietà de 'a Republica) che parò a jera intrà tute ła reserva de legname più vezina par distansa geografega, co tuto quel che questo vol dir dal punto de vista strategico. La Republica ła podeva farghe conto par far rivar a l'Arsenal legname in tenpi da record in momenti de emergenza pa' łe nave e anca pa łe fondamente de la cità. I tronchi i rivava in laguna via àcua su ła Piave (fluitasion) e diretamente davanti a l'arsenal.

Naturalmente jera proibìo, pa' łe popołasion de ła zona, de tajar łe àlbare, e ansi l'arsenal gaveva veramente un catasto dei tronchi segnai par ordene de carateristica del tronco de modo che el Proto, el diretòr generàl, podeva senpre ordinar esatamente el tajo dei tronchi precisamente pìù adati al lavoro da far. Gnanca dirlo, a stesa roba vałeva pa' i altri boschi publici. Sensa questo tipo de difesa, cativisima e parfin crudel, quasi de seguro el bosco sarìa stato meso a sachejio tanto prima de la fin de ła republica.

Logico che la Serenissima no la podeva far de manco de sta riserva a costo anca parfin de meter in piè na contesa infinita coi abitanti del logo. Par meterghe sora łe man, ła ga dovesto sforsar un pochetin le so stesse lege che le 'ndava famoze da quanto scrupolo che de solito se ghe meteva a farle rispetar da tuti. Pena dopo la conquista de la Marca Trivigiana, Venessia ła ga imediatamente messo in fursi i diriti dei abitanti che fin da tempi sensa memoria i sevitava el dirito coletivo de sfrutamento de la foresta. Se jera senpre savesto che sto dirito el vegneva da concesion dei inperatori. Che 'l fusse fondà o no da cualche concesion o privilegio feudal o imperial, "de facto" da senpre i abitanti i tajava legna, i pascolava ecc. I venessiani invesse, obligando a l'inversion de l'onere de ła prova, i pretendeva che le comun le portasse łe prove dei so diriti. Par (se dise) che i cai-comun i ghe 'vesse dato colpa a łe femene de 'ver rovinà łe pergamene par farghe sù la lana, e de verghe fato de sto modo smarìr la scritura. Perso łe cause, donca, a łe comun ghe ga tocà ritirarse de fronte al Leòn ma da cuel momento xe nato un sentimento anti-venessian mai più smorsà.

La Serenissima la ga ordenà subito de rader al suolo conpletamente qualsiasi costrussion, casa o altro, salvo i edifici ecclesiastici (ex. l'Abbassia de S.Eustachio, e ła certosa de San Gerołamo) co l'obligo dei abitanti de spostarse ai marzeni del bosco.

Seben che che ła Serenissima stesa, co la so' sajesa proverbiàl, a gavese pensà ben de reservarghe i inpieghi de lavoro, co esclusiva, ai ex abitanti e ai so dissendenti, l'odio ga sevità a viver soto le bronse par senpre. L'unico ogeto de sfogo de sto rancòr el bosco steso, soto forma de furti continui de legname e altre atività prohibìe; roba che nessun xe più sta' bon de frenar. Ghe ne sà chelcossa i foresti (n.d.r.: Trevisani, Venessiani) che inte i ani '60-'70 i ga vesto l'idea de farse o comprarse a viłeta pa starghe i dì de festa e che regołarmente i ga subìo danejamenti e furti, ma no da parte dei stracomunitari. Par no parlar de łe samàe de canpagnołi e de sitadini che in stajon ghe dà l'asalto sensa tregua in serca de fonghi, erbe, e de cualsiasi altra roba, convinti se vede che no eséndoghe pì ła Serenissima ałora el sachejo ga da sevitàr.

I Monteliani, insoma se pol dir che i xe restai sempre anti: anti-venessiani, anti-francesi, anti-todeschi, e anca infin anti-italiani.

El sbando e el sachejo

Le cronache łe riporta che dopo ła fin de ła Republica aristocratica, a partir dai tenpi de la conquista sabauda, el Montel el jera za stato despojà dai abitanti stessi de łe comun limitrofe. La povera zente par tuto el periodo de l'alterna dominassion francese e todesca ła gaveva dovesto subir na serie continua de carestie e de sacheji dei eserciti de na parte o del'altra dei contendenti francesi e austro-ungareschi. E parò inte un modo o inte naltro i governi, pì che sia quel austriaco i jera stati boni de salvar in parte el bosco come risorsa publica. Col Regno d'Italia l'arzene aministrativo se rompe. In tel giro de 20-30 ani el bosco xe devastà. A cuesto senpio gaveva partecipà anca i stesi dissendenti dei abitanti antichi i "bisnenti" (forse da bis-gnente, do' volte gnente) e parfin i dissendenti de le guardie del bosco mese là da la Republica (de solito schiavoni o foresti).

Più o meno a l'epoca de ła lege Bertołini (un pèr de mesi dopo, vedi soto), Paładini in tel so libro “Asolo e il suo territorio” descrive el Montel cussì:

”Povera selva! Era una gran bellezza della nostra provincia: la si vedeva da ogni altezza, come una lama bruna sulla destra del Piave. Ciascuno di noi, credo, sentisse par essa una viva simpatia ché certo tutti avevamo inte el sangue qualche effluvio dei suoi fortificanti aromi. Il suo carattere di grandiosità, di forza, di mistero, seduceva la fantasia: aveva del ciclope e del negromante. Venti chilometri di estensione, querce secolari enormi, burroni inesplorati, foschità paurose. E ci balenava alla immaginazione in un velo di leggenda e di tradizioni tragiche: santi, romiti, maghi, streghe, grassatori, lupi, viperai. Ad essa inoltre mettevan cao le fila di gentili ricordi: tutti avevano passato dentro essa, qualche bella giornata di gioventù, o gite sollazzevoli, o in caccie squillanti, terminate da cene e balli indimenticati. Ma a chi si sente degnamente della patria era anche un ricordo superbo e sacro: da essa Venezia aveva tratto copia di legname par le sue gloriose galee. Povera selva! Quante mani unghiute acciuffarono la tua magnifica chioma, prima che tu mostrassi calva , la nuca! Povera selva! Io penso che dal tuo tetro grembo uscirono forse le galee di Dandolo, di Morosini, di Venier, unici lampi di valore, di gloria, in una lunga agonia di servitù e miseria…. Io penso all'aria imbalsamata che diffondevi inte i paesi intorno, ove le tempre degli uomini son forti e soave ze la beltà delle fanciulle…. Io penso a questa nuova specie di farisei che ha sempre sul labbro la patria, e poi si mangerebbe le sue memorie, le sue glorie, le sue bellezze in un pasto solo, e avrebbe fame ancora”.

Le cronache łe riporta che el suolo nudo del Montel, a un certo punto, gabia conportà dei canbiamenti climateghi: pare che la risałita de łe corente de aria calda provocàe da l'inpato del sol łe atirase aria freda dal Feltrin cussì scatenando tenpeste mai viste e tronbe de aria.

Dopo cualche ano da l'anesiòn al Regno Sabaudo, in tel 1892 par opera del Senatòr Bertolini de Montebełuna, l'area del bosco Montel ła xe stata parcełizada e concesa in proprietà ai bisnenti. L'intenzion ła jera de incorajar el sfrutamento agricoło o pastoral de ła zona. I risultati no i podeva che essar deludenti. L'acqua, de fati, ła xe senpre stata el problema più grando e ła so' scarsità ga seriamente compromeso se no inpedìo un sfrutamento vantajoso dal punto de vista agricoło. Cussi ła xe 'ndada a finir che el "Bosch" come che el vien ciamà da łe so' parti, el xe restà altro che un bosco, dato che sołamente ła flora boschiva ghe prospera, co ła difarensa che łe albare grande e monumentałe (rori, castagneri, qualche frassene etc.) łe xe del tuto sparìe. Al so posto ghe xe na parensa de bosco che in realtà el xe pì che altro un bosco da tajo a basso fusto de robinee infestanti prinçipalmente par legna da fògo a sfrutamento familiar.

El XX secoło

Durante ła Prima Guera Mondial, dopo ła disfata de Caoreto, ła linea del fronte la s'avéa fermà su ła Piave, coi Tałiani su ła destra, e i Austriachi su ła zanca: el Montel el jera de gran inportansa strategica, e sede de fortificasion taliane (ancora deso se pol visitar diversi monumenti, come el Oservatorio del Re a Croseta del Montel, na costrusion blindada che varda da l'alto la val de ła Piave). Contrariamente a quel che se pol pensar la division in "prese" no la xe de origine militar, ma pitosto na sudivision fata da l'aministrasion Venessiana par far de modo che el sfrutamento forestal el fusse più agevole. Le "prese" bisogna intendarle come strisse de teritorio o, mejo, de fasse larghe da na strada de presa a l'altra. Le strade de presa łe core apunto sul bordo de ogni presa.

La cołina ła xe divisa in senso longitidinal in do' parti sul crinal su ła linea Est-Ovest(avendo pì o meno ła forma de na ciopa de pàn longa)da queła che dèso ła xe ła strada provincial, e in senso traversałe da un serto numaro de strade paralele che łe va da na parte a l'altra non perpendicołarmente ma spostae de cualche grado (a ocio circa 45°) su ła linea Nord-Sud. Quasi tute ste strade łe xe note come "strade de presa" e no łe ga veri nomi; se łe distingue ciamandołe co un numaro ex.: presa 11, 5, 10, etc. Solamente qualcheduna ła porta nomi de generałi, ex. "General Vaccari" evidentemente a scopo de propaganda del regime unitario post bellico de la prima gran guerra.

Poco se sa in genere de l'antiga Abasìa de San Eustachio, a Nervesa. Prima abandonada e desvodada par vołontà dei ocupanti francesi e po' messa a l'asta par tirar su anca l'ultimo scheo. A l'epoca el se a ga acaparada un certo homo de afari che el ga pensà ben de sfrutarla come cava de material da costruir e cussi la xe finìa desmantelada completamente; e pensar che proprio là xe el posto dove che Monsignor de La Casa el ga scrito el so' famoso Galateo e altro. Ormai xe restà solamente i ruderi che se pol vedar sora de Nervesa. Naltra de łe costrussion łassae in piè dałea Republica jera ła Certosa de San gerolamo, inte i pressi de Javera ma atualmente no ghe xe restà in piè gnanca na piera. Ghe jera un çimitero, ma dal 1863 i gà cavà anca łe lapide e i ossi dei frati i xe stai portai in tel çimitero de Javera.

Uncuò el Montel l'è na zona famosa pa' i fonghi (i ciodet del Montèl) pa' łe patate e par i agriturismi. L'è diviso tra i comuni de Montebełuna, Croséta del Montèl, Volpago del Montèl, Javera del Montèl e Nervésa.

Geologia

Par pacifego che ła cołina del Montèl ła sia de natura morenica, o sia che ła se gapia formà durante na 'grande glaciazione' soto ła incredìbiłe pression de un enorme ghiacciaio. Le so' crode, de fati, łe xe conglomerati de sassi conpressi e calcificài insieme. Sòra el strato rocioso se trova un spessor primigenio de terén conpato e argiłoso co forte contenuto de minerałi ferrosi, che el pòl andar da pochi centimetri a diversi metri, del carateristego cołor rosso dei ossidi ferosi. In cuesto senso se nota na somejansa assae forte col terén de l'Istria. La strutura geologica ła xe tipicamente carsica co na notevołe scarsità de aqua in superfice.

Paesagistega

Par efeto de na połitica bastansa justa de salvaguardia, i insediamenti urbani i xe restai scarsi e vincołai col risultato che oncora al dì de un cuò se pol gòderse na (rełativa) pase, paesaji e vedùe fassinose e fresche piene de luce. Insoma el Montèl ga oncora el so' fascino, a despeto de tuto, e el resta na atrativa ançestral pa' i vesini abitanti de Treviso ma anca de ła teraferma Venessiana. In fin dei conti Treviso fin dal 1339, se sà, ła xe senpre stata stretamente ligada co Venessia, praticamente na Venessia in teraferma.

Note

• el detien schemi gràfeghi so