Giovanni Battista Belzoni

Giovanni Battista Belzoni (Padoa, 15 novembre 1778 - Nizeria, 3 dicembre 1823) el xe sta un esploratore veneto e pioniere de l'archeoeogia. El xe ritegnuo uno dei più importanti egitoeogi del mondo.

Belxoni vestìo aea maniera araba

BiografiaCànbia

Infansia e gioventùCànbia

El zera nato a Padoa al tenpo dea Republica Veneta, el zera ncora un bocia col ga tacà lavorare nea botega de barbiero de so papà. A sedex' ani el se ga trasferio a Roma pa farse frate e studiare idraulica[1]; col ga visto e rovine dea caitae el ga comincià a apasionarse de archeoeogia[2][3]. I francesi gaveva intanto conquistà l' Italia e i gaveva abojo l' ordine dei frati dove che zera Belxoni. E eora eo el ga rinuncià ai voti e el ga comincià a viajare, che zera stà ła so pasion fin da toxeto[1].

Ea pasion pa i viajCànbia

El primo viajo xe stà a Parigi, dove che nol ga vuo tanto suceso come venditore de ogeti sacri. El xe tornà a Padoa e dopo un fià el xe ripartio pa l' Oeanda, e qua, frequentando e trupe francesi de ocupasion, el ga aprofondio i so studi de idraulica. Co el xe tornà Padoa, forte dee so esperiense al' estero, el ga vuo un bon suceso,ma questo ghe ga creà dee inimicisie. Coinvolto inte el caos poitico che xe vignuo fora dopo ła ocupasion napoeonica el se ga inguaià e inte el 1803, par evitare de finire in gaera[4], el xe scampà co so fradeo in Oeanda e da eà in Inghiltera.

Ea InghilteraCànbia

El se ga trovà cusì ben che el ghe xe restà nove ani, ciapando anca ła citadinansa britanica[5]. Ea xe diventà ła so seconda patria. A Londra el se mantegneva faxendo l'"uomo forzuto" in un circo (l'era un mauton grando e grosso, alto do metri e forte come un toro) e el se ga sposà co Sarah Banne, na toxa inglexe de Bristol[5], che dopo eo gavaria compagnà in quasi tute e so aventure[3]. Sicome che anca ła gaveva ła pasion pa i viaj i ga organixà un spetacoeo ambueante che ga vuo un bon suceso e che i ga portà in giro pa tuto el regno. El numero principae zera queo de caricarse sue spae na piramide umana de diexe persone e portarle in giro pal palco[4][5]. Oltre che al numero dell' uomo forzuto el mostrava un sistema de fontane che creava un originae xugo d' aqua generà da na machina idraulica de so invension.

Da novo in viajoCànbia

Dopo tanto girovagare in Inghiltera ghe xe vegnua ła nostalgia dei grandi viaj, e co so mujere el xe partio pa portare el so spetacoeo anca in altri paexi. Ea turnè ga tocà ła Spagna, el Portogaeo, ła Sicilia e aea fin i xe sbarcai a Malta. Qua el ga conosuo un emisario del pascià del' Egito, che a chei tempi zera na provincia del' Inpero Otoman, e el xe vegnuo savere che in chel paexe i zera drio cominciare un novo programa agricoeo che comprendeva grandi lavori de irigasion[5]. El xe partio subito, convinto che i so progeti idraulici ghe gavaria verto e porte del suceso.

 
El busto de Ramesse II al British Museum

L' EgitoCànbia

Col xe rivà in Egito el ga fato amicisia co un saco de personaj importanti. Uno de questi xe stà Bernardino Drovetti, un piemontese ex soldato napoeonico che zera diventà consoe generae de Francia oltre che coesionista d' arte e egitoeogo. Questo eo ga introdoto aea corte del pascià[5]. Altri tre personaj che el ga conosuo saria stai importanti pa eo: el grande esploratore svisero Johann Ludwig Burckhardt, che ghe ga dà un mucio de consigli che ghe gavaria fato da guida nee so inprexe[6], el novo consoe generae britanico Henry Salt, n' altro egitoeogo e coesionista che saria diventà gran rivae de Droveti nea corsa ae scoperte archeoeogiche, e un esploratore genovese, Giovanni Battista Caviglia, famoso par ver disoterà ła sfinge de Giza. El carisma e ła forsa persuasiva de sto omo eo gaveva afasinà e e ghe xe stae de esempio[7].

Quando che el pascià eo ga ricevuo el se ga dimostrà interesà al so progeto de na machina paea irigasion, ma co xe stà el momento dea dimostrasion no ła ghe ga comodà e el ga rifiutà l' oferta. Belxoni el ghe xe restà tanto mae, ghe gaveva vusuo un ano e un mucio de schei pa organixare ła dimostrasion.

Primo viajo archeoeogico (30 giugno 1816 - 15 disenbre 1816)Cànbia

E eora el ga acetà ła oferta de Henry Salt de trasportare el busto de na statua del re Ramesse II, che el pesava più de 7 toneate, dal tempio Ramesseum tacà Luxor (nea antica Tebe) fin sua sponda del fiume Nieo che zera distante 1200 metri. Ver acetà ła oferta de Salt ga vusuo dire rompare i raporti co Droveti[5]. El xe partio el 20 majo 1816 e dopo ver sorpasà un mucio de dificoltà el ga meso insieme 80 lavoradori locai e el ga comincià. El ga costruio na xlita rudimentae e iutandose co 4 leve el xe riusio nea imprexa meténdoghe soeo do stimane[2]. Prima ghe gaveva provà parfin e trupe de ocupasion francexi sensa riusirghe[5].

Questo zera stà soeo un lavoro da trasportadore, ma ła vicinansa co sti caoeavori e e noti pasae inte el tenpio ghe gaveva fato aumentare ła pasion a dixmixura.

 
Un particoeare dea stupenda tonba de Seti I ciamà anca tonba Belxoni

Burckhardt ghe gaveva contà dea so scoperta del tenpio de Abu Sinbel nea Nubia a sud, dove che parò nol zera stà bon entrare, e el ga decixo de provarghe eo. Spetando che rivase a barca che doveva portare el coeoso de Ramesse II, el xe partio verso sud e dopo ver afrontà un lungo viajo co el xe rivà el gaveva quasi finio i viveri, e eora el ga fato na perlustrasion e el xe tornà indrio.

Tornando a Luxor el se ga fermà su l' ixoea de Philae inte el Tenpio de Iside e el ga ciapà poseso de un importante obeisco par conto del consoeato britanico, sensa portarlo via.

Co el xe rivà a Luxor el xe ndà scavare a Karnak, dove che el ga trovà un pasto de roba, e dopo nea Vae dei Re sua riva oposta del Nieo, e qua el ga verto ła so prima tonba, quea del faraon Ay, che ani dopo ła saria stà cataeogà col codice KV23, dove che el ga inciso ła scrita in inglese :"scoperta da Belxoni-1816".

Finalmente ła barca co sora el busto enorme ła xe partia, e ła zera compagnà da na seconda barca co dentro tuti i reperti che gaveva trovà eo[5]. El xe rivà al Cairo el 15 disenbre 1816. L' imenso busto invese el ga continuà el so viajo fin Londra, dove oncora uncó el xe conservà al British Museum

Secondo viajo archeoeogico (20 febraio 1817 - 21 disenbre 1817)Cànbia

El 20 febraio el xe ripartio suito par Karnak e el ga trovà da novo un mucio de roba, tra cui el sarcofago de Ramesse III,che Salt ghe venderà al re Luigi XVIII de Francia e che deso el se trova al museo Louvre de Parigi, e na beisima statua in calcare dea regina Ahmose Meritamon. A chel punto el goernatore locae, istigà da Droveti, ghe ga proibio de continuare i scavi.

E eora el xe partio pa Abu Sinbel dove che dopo un fià el xe riusio verxere el tenpio. El fato xe stà ecesionae ma dentro nol ga trovà gninte de vaeore, cusì el ga perso un mucio de schei[5].

Co el xe tornà a Luxor el xe ndà scavare nea Vae dei Re, dove che el ga scoperto un mucio de tonbe, tra e quai ła favoeoxa tonba del faraon Seti I (KV17), una dee più bee de tuto l' Egito. Dentro ła zera tuta decorà co beisimi afreschi e basorilievi tanto da esere ciamà ła capea Sistina egisia. Ea xe ncora conosua come ła Tonba Belxoni.

Più tardi el gavaria provà vendarghe el beisimo sarcofago de Seti I in aeabastro traslucido a Droveti e al British Museum ma tuti do i ga rifiutà dixendo che el zera masa caro. Aea fin eo gavaria conprà inte el 1824, dopo ła morte de Belxoni, el coesionista privato John Soane che eo ga meso nea cripta dea so abitasion-muxeo a Londra, dove che el se trova oncora deso[5].

Prima de tornare el se ga meso fare ła mapatura dea tonba, l' inventario de queo che zera dentro e dei calchi in cera dei basorilievi che i ghe saria servii pa ricreare l' ambiente in dee mostre da fare in Europa[3]. Ea tonba ła xe talmente inportante che ła xe sarà al publico.

Inte el corso dei ani ła xe stà tanto danegià, par esenpio i ghe ga portà via un mucio de basorilievi, e questo ga costreto el goerno egisian a permetare l' entrata soeo in caxi ecesionai, come quando che vien dei cai de Stato in vixita in Egito.

 
Ea firma de Belxoni dentro a piramide de Chefren

Inte el disenbre 1817 el xe tornà al Cairo dove che el ga savuo che zera morto Burckhardt. El ga decixo de metarse in proprio e farse imprestare dei schei pa xvincoearse da Salt e poderse godere da soeo i fruti dee so scoperte e gestire el lavoro in autonomia.

Xe stà cusì che durante sto sogiorno el ga fato n' altra scoperta clamoroxa: el ga catà l'ingreso dea piramide de Chefren a Giza visin al Cairo, el ghe xe riusio studiando co cura ła strutura interna dea visina piramide de Cheope. Anca qua dentro nol ga trovà gninte de vaeore, se gavaria scoperto dopo na iscrision in arabo che ła piramide zera xa stà vioeà 600 ani prima da so fioeo del famoso Saeadin[5].

Sta scoperta xe stà comunque acolta a Londra co un gran entuxiaxmo e pa ceebrarla xe stà conià in so onore na moneda de bronzo che ła gaveva el so profio stampà da na parte e ła piramide da staltra[3].

Terso viajo archeoeogico (28 aprie 1918 - 18 febraio 1819)Cànbia

El xe ripartio conpagnà da Alessandro Ricci, un dotore e artista de Siena che ghe gavaria fato e ilustrasion del viajo e dei reperti par dee mostre da fare in Europa e par el libro dei so viaj che el gaveva in mente de scrivare. Co el xe rivà a Tebe el ga scoperto che Salt e Droveti i se gaveva spartio e xone de scavo più bee.

 
Mapa del' Egito dove a sud-est se vede Berenice

Confinà ne na xona secondaria el xe stà fortunà trovare qualche bon reperto tra cui na beisima statua del faraon Amenofi III. Dopo ver finio insieme co Ricci el lunghisimo lavoro de descrision e dei calchi nea tomba de Seti I el xe ndà aea riserca de Berenice, un antico porto del mar Roso scoperto da poco da un mineraeoeogo francese.

Dopo ver risaio a sud el Nieo el ga traversà el dexerto e co el xe rivà sul posto el se ga reso conto che el francexe gaveva scoperto i resti de na miniera, e eora ndando più a sud el xe riusio scoprire par primo ła vera Berenice. Co el xe rivà parò el gaveva finio i viveri e ghe ga tocà tornare indrio a man vode. Pa ła enesima volta el gaveva fato na gran scoperta che invese de arichirlo eo gaveva disanguà[5]. I raporti co Ricci no i zera stai boni fin dal principio, questo no ghe piaxeva el caratere vulcanico de Belxoni e co i xe rivai a Tebe i se ga separà.

 
L' obeisco de Philae nea so attuae locasion a Kingston Lacy inte el Dorset in Inghiltera

Tornando a Tebe el ga incontrà Salt che el ghe ga oferto de ndare tore a Philae chel obeisco che el gaveva ciapà in poseso inte el primo viajo, e portarlo a Luxor. El saria sta examinà inte el 1822 dal egitoeogo francese Champollion che confrontando e iscrision greche e i geroglifici che ghe zera sora el ga vuo ła verifica decisiva dea so decifrasion dei gerojifici[5].

Belxoni ga acetà, e quando qualche mexe dopo el xe rivà a Tebe co l' obeisco, Droveti eo ga visto, e, sicome che in Europa el voeva portarlo eo, el se ga inbestià e el ghe ga meso anca e man doso. Droveti zera masa influente, el zera parfin el consijiere miitare del pascià. Co sta barufa Belxoni gaveva caio che ła so cariera de esploratore in Egito zera finia[5].

Ea causa penae che xe seguia xe sta lunga e ghe ga tocà restare in Egito un bel toco, invese de tornare in Europa come che el gaveva previsto. E eora el se ga meso in viajo da novo, stavolta in serca dea oaxi de Siwa, inte el nord-ovest del paexe, dove che ghe xe el tenpio del oracoeo de Amon, famoxo nea antichità pa verghe predio el futuro a Alesandro Magno. Aea fin el ga scoperto n' altra oasi, quea de Bahariya, credendo che ła fuse quea de l' oracoeo[5], anca qua nol ga trovà gninte de speciae e el xe tornà al Cairo.

Aea fin dea so aventura egisiana, oltre ae varie altre scoperte, el gaveva verto oto tonbe nea soea Vae dei Re ( dove in totae fin ai dì nostri ghe ne xe stà scoperte 63):

Ritorno in EuropaCànbia

 
El medajon comemorativo fisà sora l'ingreso orientae del Paeaso dea Raxon che dà sul coridoio che porta in municipio

El proceso co Droveti, grasie al juto de Salt, el xe ndà finire in gninte, e eora el ga xbrigà e ultime formaità e el ga easà l' Egito inte el setenbre del 1819 rivando a Padoa i primi de disenbre. Qua ła acojensa xe stà granda. L' eco dee so imprexe e e do statue che el ghe ga regaeà al comune ga spinto e autorità a farghe grandi onori, tra cui el conio de un medajon comemorativo. E statue zera do sfingi che deso e xe al Paeaso dea Raxon in sità.

Inte el Muxeo Archeoeogico ghe xe stà dedicae do sae egisie in dove che ghe xe dei reperti sui. A Padoa el ga conosuo l' architeto Giusepe Japei, dàndoghe ła ispirasion pal progeto dea saea egisia del cafè Pedrochi[5]. Dopo do soi mexi el xe partio par Londra, dove che el xe rivà a fin marso del 1820.

Anca qua l' acojensa xe stà speciae, el zera diventà famoxisimo e el xe stà invità a frequentare i saeoti più importanti, el xe parfin entrà nea logia masonica del' arca reae, dove che zera afilià anca el duca del Sussex[5]. El se ga meso scrivere el libro dee memorie dei so viaj, ilustrà da beisimi aquarei sui e de Ricci. El libro xe stà publicà in inglexe aea fin del 1820 col titoeo :"Raconto dee Operasion e dee Recenti Scoperte nee Piramidi, Tenpli, Tonbe e Scavi in Egito e in Nubia, e de un Viajo nea Costa del Mar Roso, in serca dea antica Berenice, e n' altro nel' Oaxi de Jupiter Ammon".

El ga vuo un gran suceso, ghe ne xe stà stanpà diverse edision e el xe stà tradoto anca in italian, tedesco e francexe. Sempre a Londra el ga organixà na mostra dei so reperti e dea riprodusion dea tonba de Seti I che el ga reaixà coi calchi che el gaveva tolto. anca ła mostra xe ndà benon, tanto ch el ga deciso de replicarla a Parigi. Inte el 1822 el xe stà invità in Rusia, dove a San Pietroburgo el xe stà ricevuo co grandi onori dal Xar Alesandro I in persona, che el ghe ga regaeà un aneo co un topasio.

Ea vendita dei reperti e el suceso del so libro e dea mostra no ga compensà tuti i debiti che el gaveva acumueà co tute chee scoperte dove che nol gaveva trovà gninte[5]. El bixogno de schei e ła so nostalgia pai viaj ghe ga fato acetare ła oferta dea asociasion africana de Londra par sercare e fonti del Nizer. Sto fiume centroafrican el zera quaxi sconosuo esendo stà scoperto soeo pochi ani prima dal grande esploratore scosexe Mungo Park, che nee so vicinanse el gaveva trovà ła antica Tinbuctu.

El viajo in Africa ocidentae e ła morteCànbia

El xe partio inte el 1823 par Tinbuctu, el voeva ragiungerla pasando dal Maroco. Rivà a Fes el re ghe ga dà el permeso de traversare e so tere e na scorta, ma co el xe rivà sul dexerto el se ga reso conto de quanto ostii che fuse i locai e el xe tornà indrio decidendo de rivare a Tinbuctu dal sud.

El xe ndà a Gibiltera, dove che el ga ciapà na nave pa e Canarie[1], e da queste n' altra nave par el Regno del Benin, che el se trovava nea odierna Nizeria. El voeva ndare dal re nea caitae Benin, che deso ła se ciama Benin City, par domandarghe i permesi e na barca par risaire el Nizer.

Ma poco dopo che el xe sbarcà in Africa el xe morto de disenteria el 3 disenbre 1823 inte el porto fluviae de Gwato, 40 kiometri prima de Benin City.[3][8][9]. El signor Houtson che eo compagnava nea spedision eo ga fato sepeire pena fora de Gwato e el ghe ga meso na epigrafe sua tomba col nome e ła data de morte. El ghe ga anca fato scrivare:"el signor che ga meso sta epigrafe sua tomba de sto famoxo e intrepido viajador, el spera che ogni europeo che vixita sto posto el tegna neta ła tera e el fasa riparare ła recinsion che ghe xe intorno, se xe necesario". Circa quarant' ani dopo un viajador che xe rivà fin là nol ga trovà altro che l' albaro[8].

Giudisi criticiCànbia

 
Un ritrato de Belxoni in abiti egisiani

Ghe xe stà chi che eo ga criticà pa ła rudesa dei so sistemi de scavo, in efeti ai dì nostri ghe xe più atension a salvaguardare i reperti, ma i so detratori no i ga tegnuo conto del contesto storico inte el cuało el ga operà[5]. A chei tenpi in Egito ła archeoeogia no zera gnancora rafinà come che ła xe deso. Quei che ndava furegare nee rovine più che archeoeogi i zera aventurieri al servisio dei muxei o dei coesionisti privati, e i zera disposti a tuto pur de fare i schei, rovinando un pasto de tochi pregiai. Belxoni xe stà tanto difarente e el se ga distinto pa l' ordine e el metodo dei so scavi[7]. El steso ceebrà Champollion el ga cavà un mucio de basorilievi daea tonba de Seti I, dove che invese Belxoni el se ga limità a fare i calchi in cera[5].

El xe stà apresà pa ła so profesionaità, col doveva vaeutare un reperto el ghe ndava pian prima de stabiire ła data de quando che el zera stà fato e e so descrision e zera sempre precixe e particoearegiae[3], anca quee dee tombe dove che nol ga trovà gninte.

Uno dei segreti de Belxoni xe stà de eserse guadagnà el rispeto dei locai, i ga tratà co umanità, el ga imparà ła so lingua e el se vestiva da arabo, el se ga parfin fato cresere na barba eonga come quea che ga eori. In sta maniera i ga convinti a lavorare duro, che noi zera bituai, là dove che tuti i so coeghi del tenpo no ghe zera mai riusii[5].

El so caratere vulcanico e indipendente eo ga portà a rompare amicisie influenti (Droveti, Salt, el consoe svedese). El voeva briare de luce propria e no ghe piaxeva esere considerà un agente dei consoi[6]. Se da na parte questo ghe ga consentio de autogestirse el lavoro e de goderse ła fama dee so scoperte, che altrimenti sea gavaria ciapà eori, da staltra eo ga ixoeà. Droveti e Salt gaveva ae spae i potenti mexi dea Francia e de l' Inpero Britanico e eo, stacandose da eori, ghe ga tocà domandare un mucio de prestiti che i eo ga rovinà. Ghe zera in baeo tanti schei coe rovine egisie, e i do consoi i eo ga talmente tanto ostacoeà che el ga dovuo ndare via.

Influensa culturaeCànbia

Malgrado ła gran quantità de scoperte che el ga fato el so nome nol xe ceebrà come che el se meritaria e pochi xe stà i libri a eo dedicai. Inte el campo dea archeoeogia egisia el xe stà considerà par tanto tempo un modeo da imitare dai esploratori che xe vegnui dopo de eo e tanti esperti de egitoeogia i eo ga stimà e ritegnuo un esempio[5][7].

El regista american George Lucas el se ga ispirà a Belxoni col ga creà el famoso personajo de Indiana Jones definendoeo un archeoeogo ecesionae ma dotà de un caratere duro e rude.[10]

El poeta inglexe Percy Bysshe Shelley el ga vuo ła ispirasion pa scrivere el so soneto "Ozymandias" dal grande busto de Ramesse II al British museum.

Na cità del Stato american del Mississippi ła se ciama "Belzoni" in so onore.

L' atore inglese Matthew Kelly inte el 2005 el ga interpretà Belxoni par el docudrama dea BBC Egypt.

Inte el 2009 el grupo italian de jazz rock "Arti e Mestieri" ga publicà un Ep intitoeà Il grande Belzoni composto da 4 canson. Sta opera xe na parte del concept album "Piramidi - Quadri di un'esplorazione" de prosima publicasion, che el gavarà 17 tochi tuti dedicai aea so vita.

NoteCànbia

  1. 1,0 1,1 1,2 Viaggi in Egitto e Nubia seguiti da un altro viaggio lungo la costa del Mar Rosso e all'Oasi di Giove Ammone (prefazione di L.Menin), Milano, Sonzogno, 1825. URL vardà il 5-11-2010.
  2. 2,0 2,1 Giovanni Battista Belzoni, Emuseum @ MSU. consultà el 3-11-2010
  3. 3,0 3,1 3,2 3,3 3,4 3,5 Giovanni Battista Belzoni (1778-1823), Treccani. consultà el 3-11-2010
  4. 4,0 4,1 Giovanni Battista Belzoni, sito web dea università de Stato del Minesota, 2009. URL vardà il 5-11-2010.
  5. 5,00 5,01 5,02 5,03 5,04 5,05 5,06 5,07 5,08 5,09 5,10 5,11 5,12 5,13 5,14 5,15 5,16 5,17 5,18 5,19 5,20 5,21 European interest in Egypt, www.ancient-egypt.co.uk, 2009. URL vardà il 5-11-2010.
  6. 6,0 6,1 Viaggi in Egitto e Nubia seguiti da un altro viaggio lungo la costa del Mar Rosso e all'Oasi di Giove Ammone, Milano, Sonzogno, 1825. URL vardà il 5-11-2010.
  7. 7,0 7,1 7,2 IL GRANDE BELZONI DI MARCO ZATTERIN ,presentaxion del libro de cui aea bibliografia, coaloalab.splinder.com, 2008. URL vardà l'11-11-2010.
  8. 8,0 8,1 The Gentleman's magazine, Volume 135, (in inglese) pag. 462, 1824
  9. Travellers in Egypt, (in inglese) pag. 49, I.B.Tauris, 2001
  10. "Raiders of the Lost Ark", (in inglese) Tim Dirks 1996-2008.

BibliografiaCànbia

Scriti de BelxoniCànbia

  • (EN)'Narrative of the Operations and Recent Discoveries Within the Pyramids, Temples, Tombs and Excavations in Egypt and Nubia and of a Journey to the Coast of the Red Sea, in search of the ancient Berenice; and another to the Oasis of Jupiter Ammon, Londra, John Murray, 1820 (edision inglexe del 1835 consultabie online)
  • (EN)Description of the Egyptian Tomb, Discovered by G. Belzoni, Londra, Murray, 1821
  • Viaggi in Egitto e Nubia contenenti il racconto delle ricerche e scoperte archeologiche fatte nelle piramidi, inte i templi, nelle rovine e nelle tombe di questi paesi seguiti da un altro viaggio lungo la costa del Mar Rosso e all'Oasi di Giove Ammone, Milano, Sonzogno, 1827 (edision italiana del 1827 consultabie online)

Altri scriti a eo dedicaiCànbia

  • (EN)Sarah Atkins, Fruits of enterprize exhibited in the travels of Belzoni in Egypt and Nubia, Londra, Harris and son, 1821 (edision inglexe del 1821 consultabie online)
  • Luigi Montobbio, Giovanni Battista Belzoni — la vita i viaggi le scoperte, Edision Martello, Padoa, 1984
  • Gianluigi Peretti, Belzoni: viaggi, imprese, scoperte e vita, Edision GB, Padoa, 2002
  • Marco Zatterin, Il gigante del Nilo, Mondadori, 2000
  • Marco Zatterin, Il gigante del Nilo.Storia e avventure del Grande Belzoni, Il Mulino, Boeogna, pagg. 388, 2008 (edision amplià del libro presedente).

Altri progetiCànbia

Coegamenti esterniCànbia

Controło de autoritàVIAF (EN61541642 · ISNI (EN0000 0000 8140 2642 · LCCN (ENn87869660 · GND (DE118658093 · BNF (FRcb118911242 (data) · BNE (ESXX1535738 (data) · ULAN (EN500099434 · CERL cnp01262022 · WorldCat Identities (ENn87-869660
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Giovanni_Battista_Belzoni&oldid=1051118"