Storia de l'Etiopia

La Storia dell’Etiopia la va ndrio de tanti secoli, co na documentasion scrita tra le pi vecie del mondo. Ma se pol andar ndrio fin a i primi omeni, che da l’Etiopia i sa disperso in tel mondo.

Mapa de l'Etiopia

PreistoriaCànbia

En tel Museo Naxional de Adis Abeba ghe no scheletro de na dona ciamada Lucy. Se trata de lo scheletro pi vecio mai catà da i studiosi de on esare umano. Lucy l’è stà trovà da dei antropaleologi ne laregion de l’Afar. El nome se deve a la canson che i studiosi scoltava a la radio (Lucy in the sky with diamonds) al momento del ricatamento. En tel Afar, i studiosi ga catà altri sceletri de ominidi e de i primi omeni, se pensa che l’esare umana se sia svilupà propio in stà zona.

PuntCànbia

 
Le rovine del tempio de Yeha, Tigray, Etiopia.

No xe sempre facile tradur i veci testi che parla de l’Etiopia. Etiopia xe on nome Greco che vol dir ‘la tera da le face brusà’. Sto nome xe stà usa solo dal III secolo a.C. in poi, e no sempre se riferise a l’Etiopia de ancò. I egisiani parla de la tera de Punt e la tera de Yam a sud de la Nubia. Se sa che fin dal 3000 a.C. ghera conesion comerciali tra sti teritori e l’Egito. El nome Kush, che se cata anca ne la Bibia, se riferise a olte a l’Etiopia, e a olte a la Nubia. La strada carovaniera la seguia el corso del fiume Nilo, fin su i altipiani etiopici. La prima spedision via mare la xe stà fata da la faraona Hatsheput in tel 1495 a.C. e la xe registrà inte i geroglifici de Deir el-Bahri.

I primi testi etiopici che se conose (500 a.C.) parla del regno D’mt, con la cavevdal a Yeha. Se sa che sto regno l’è nato inte el XI secolo a.C. e che probabilmente xera stà influensà da l’arivo de zente da lo Yemen (i sabeani, che gavea on regno in Yemen). Sta cultura xera sofisticà. La zente usava canali d’irigasion, l’aratro, e armi de fero, e savea scrivar, utilizando on alfabeto de origine semitica. En sto periodo, ghe stà n’influenza ebraica. No ghe testi precisi che parmete de ricostruir la storia esata de sta influenza, ma el tempio de Yeha el riproduse el tempio de Gerusaleme, e sul lago Tana, se cata oncora ogi de i altari de piera simili a quei descriti inte la Bibia. El xe posìbiłe che amrcanti ebrei xe rivà qi da lo Yemen, che xe sempre stà in contato co Israele. Da sto primo regno D’mt se sà svilupà el regno de Aksum, anca se no ghe testi che spiega sto pasagio.

AksumCànbia

 
La stele del Re Ezana a Aksum.

EL regno de Aksum, el nome vien da quelo de la cavedal su i altipiani del nord de l’Etiopia, xe el primo regno conosù grasie a i testi che se conserva. Inte el I secolo a.C., i re de Aksum xe stà boni de scominsiar l’unificasion de i altipiani etiopici. De sto periodo xe un testo persin che indica Roma, la Cina, la Persia e Aksum come le grandi potense del tempo. El regno de Aksum controlava le trate comerciali che da la costa oriental de l’Africa rivava al mediteraneo. Oro, avorio, mira, animali esotici, pepe e altra marcansia pasava da l’Etiopia che fasea pagar el dasio.

N’altro fator de uificasion xe stà la religion. Frumentius e on so companio xera cristiani siriani. Rivà in Etiopia inte el 330 d.C. circa, i xe stà boni de convertir el re Ezana. Da le monete conià da stò re se vede che a l’inisio del so regno el credea in divinità locali, par poi pasare a la fede in Cristo. Ezana xe anca el re che ga conquistà el regno de Meroe, in Nubia, e almanco parte del regno sabeano del Yemen. El cristianesimo xe stà acolto da i nobili. Inte el V secolo, l’arivo de nove monaci ga dato vita a l’evangelizasion de la popolasion e a la forte influensa che el monachesimo gavù – e oncora el ga – su la popolasion etiopica.

En tel 523, el re yemenita Dhu Nuwas, ebreo, ga scominsià la persecusion contro i cristiani che vivea in Yemen. Quando el ga atacà i soldati etiopici a Zafar – su la costa yemenita – el imperator Giustino I ga domandà al re Kaleb de Axum de tacar guera contro Nuwas. En tel 525, le trupe etiopiche ga invaso lo Yemen, deposto el re e meso un vice-re al so posto. La vitoria contro el re yemenita xe stà el pico del regno de Axum, che da alora ga scominsià a perdar potenza. No se sa ben come sto regno xe finio parchè manca testi scriti. Se sa solo che Aksum ga perso la forza de coesion che gavea su la popolasion etiopica e che el paexe xe entrà in on tempo de division e lota interna.

Dopo secoli de incertese, Mara Takla Haymanot ga fondà la dinastia Zagwe in tel 1100 circa. El re pi importante de sta dinastia xe stà Gebre Mesqel Lalibela, durante el so regno le Ceze de Lalibela xe stà scavade ne la rocia, come se pol vedar oncora ancò, creando on caolavoro de architetura. Inte el 1270, l’ultimo re Zagwe l’è stà deposto da Yekuno Amlak che disea de desendar da i re de Aksum, e quindi de la dinastia de ogine salomonica, come voria la legenda. Durante sto regno, le tre procince del Tigray, Amhara e Shewa xera guidà da regenti, e el re se fasea ciamar nagusa nagast, re de i re, emperator de Etiopia.

I portoghexiCànbia

Durante el mèdio evo in Eoropa ghera na legenda. Se parlava de on regno cristiano potente a sud del Sahara, el re se ciamava Zuan Prester. I portoghexi, come altre potense eoropea, ga mandà na spedision a caracr sto regno. El portoghexe Pero da Covilhã l’è rivà em Etiopia in tel 1490 e ga pensà che quelo fuse el regno de la legenda. El re ga domandà a i portoghexi de iutarlo contro i musulmani. El portogal ga mandà na flota inte el 1520 e de i preti. Na seconda flota xe rivà inte el 1541 e 400 soldai portoghexi ga iutà i soldai etiopici ne la guera contro i invasori islamici. Dopo on par de vitorie, i portoghexi xe stà vinti ne la batalia de Wofla. La vitoria de i etiopici la rivò in tel 1543 co la batalia de Wayna Daga. El cao de i portoghexi ga domandà al imperatore de profesar l’obedienza a la Ceza de Roma (i etiopici segue on rito orientale che non el xe in comunione co i catolice de Roma), ma l’imperator ga rifiutà. I portoghexi ga alora lasà el paexe. I preti gesuiti che gavea seguì la spedision xe restai inte el paexe fina al 1633, co i xe stà espulsi.

Zemene MesafintCànbia

Anca se el imperator gavea vinto la guera contro i musulmani, questi xera oncora in control de na parte del teritorio. El teritorio xera anca diviso tra signori feudatari, che no sempre scoltava la casa reale. Co l’asasinio de Iyasu I scominzia la Zemene Mesafint, el tempo de i principi. I sioroti locali, che no volea perdar el loro poder, ga scominsià a metarse d’acordo par elezar on re pitosto che n’altro, a copar quei che no ghe andava. A la fine, i ga selto uno de lori, Yostos I, come re, metendo da parte i pretendenti al trono de origine salomonica. En sto periodo, l’Etiopia xe restada isolà dal resto del mondo. Anca el poder econòmego del regno el sa spento. I imperatori vivea de frecuente ne le macerie de i palazi reali de na olta, senza verghe schei par metare a posto la cavedal. Pochi eoropei xe stà boni de rivar fin in Etiopia in sto periodo che durarà fin a la metà del XIX secolo.

Età modernaCànbia

Soto i imperatori Tewodros II (1855 - 1868), Yohannes IV(1872 - 1889), e Menelik II (1889 - 1913), l’Etiopia ga scominsià a vegnar for a dal so medioevo par entrar de novo in contato co paexi estari. Tewodros ga riorganizà l’aministrasion del regno, contro el parer de i so feudatari. El raporto co le potense eoropee xe stà negativo. Co la regina Vitoria no ga risposto a na so letara, Tewodros ga fato metar in prison i inglexi che vivea in Etiopia. I inglexi ga mandà na spedision par salvarli, e el re – co ga savesto che gavea perso – el sa copà. En tel marso 1870, na compagnia comerciale italiana ga comprà el porto de Asab inte el sud de l’Eritrea da un sultan locale. Dopo verghe comprà altra tera inte el 1879 e 1880, la compagnia ga vendù tuto al governo italian inte el 1882. En tel 1888, 20 000 soldadi italiani xe rivà a Asab. Dopo na negosiaxion co i etioipici, 5 000 soldadi xe restai a Asab.

El imperator Yohannes IV ga dovù far combatare co i dervishi. En tel 1889, a la batalia de Gallabat, i etiopici ga vinto, ma el imperator xe stà colpio da na palotola e el xe morto (9 marso). Sahle Maryam, sior de Shawa, el sà proclamà emperator co el nome de Menelik II, e i sioroti locali xe stà d’acordo. Menelik ga firmà el tratato de Wuchale co i italiani (2 magio, 1889) dàndoghe l’Eritrea a i italiani in cambio del 30 000 fuzili, palotole e canoni. I italiani ga subito dito che el tratato ghe dava a lori el protetorato su tuta l’Etiopia, anca se el testo no dixe niente de sto genere. El problema se ga risolto co la batalia de Adua co i italiani ga perso contro i etiopici (1 marso 1896). En tel 1894, Menelik ga dato el parmeso a i francexi de costruir la ferovia da Gibuti a Adis Abeba. A la morte de Menelik, so neodo Lij Iyassu l’è saliò al trono par esar deposto inte el 1916. Zaudito, la fiola de Menelik, l’è salia al trono e so cusin Ras Tafari Makonnen nomià regente. En tel 1930, a la morte de Zaudito, Ras Tafari l’è diventà imperatore co el nome de Haile Selassie I.

Colonia italianaCànbia

El regno de Haile Selassie xe stà interoto da l’invasion italiana del 1935. I italiani ga costruio tute le infrastruture che mancaa: scole, strade, ponti. Ma el controlo italiano xe durà poco. Co la seconda guera mondiale, i italiani ga perso l’Etiopia e l’Eritrea, e l’Etiopia ga anexo l’Eritrea al regno. L’Influenza italiana in Etiopia no la xe stà granda, e se pol dir che l’Etiopia no la xe stà veramente colonixà.

Dopo la guera, Haile Selassie ga laorà par modernisar el paexe, ma no ga mai tentà de cambiar radicalmente el sistema feudatario. En tel 1963, l’Etiopia xe stà tra i fondatori de l’Organizasion de l’Unità Africana, che ga sede a Adis Abeba.

DERGCànbia

Mentre el paexe patia par la carestia, Haile Selassie stava el so palazo ne la cavedal sensa incorserse de la situasion de la zente. Inte el febraro 1974, i militari ga fato on colpo de stato e ga deposto el imperator. Eò 12 setembre 1974, i militari ga costituio el DERG, on comitato che dovea governar el paexe. El imperatore xe morto el 22 agosto 1975, l’acusa xe che el xe stà stofegà da i militari. El colonelo Mengistu Haile Mariam xe divenà el presidente de l’Etiopia e el ga subito ordinà l’asasinio de i so coleghi pi forti e quelo de migliara de opositori. Soto Mengistu, el governo ga nasionalizà tute le tere. En tel 1977, la Somalia ga invaso l’Ogaden, na region de l’Etiopia co l amajoria d ei bitanti de origine somala. Dopo verghe vinto la guera, el governo etiopico no ga iudà la zente de l’Ogaden a ricostruir la so region. Ancora ancò sta region xe la pi povera del paexe. El primo de febraro del 1987, la popolasion la xe stà ciamà a le urne par aprovar la costitusion del paexe. L’Etiopia la diventava così na Republica Democratica, e Mengistu el so primo presidente.

La represion de la rivolta del Tigray e la guera de autodeterminasion de l’Eritrea ga disanguà le case del paexe. En pi, na serie de carestia e la morte de pi de on milion de persone par la fame, ga portà el governo al colaso. En tel magio del 1991, le forse de oposision xe entrà a Adis Abeba e el ditator xe scapà in Zimbabwe. En tel 2006, co on proceso legale, Mengistu l’è stà condanà par genocidio. Mengisto l’è oncora nascosto in Zimbabwe.

I ultimi aniCànbia

Dopo la caduta del DERG, l’Etiopia xe stà governà da on comitato de transision. Le prime elesion democratice xe stà in tel 1995 e Meles Zenawi xe diventà el primo Primo Ministro eleto democraticamente, Negasso Gidade el primo Presidente. Le seconde elesion xe stà inte el 2000, co Meles rieleto e Girma Wolde-Giorgis novo Presidente (dal 2001).

En tel 1998, na disputa su le frontiere co l’Eritrea se trasformà in conflito armato. La guera xe finià co el Tratato de Algeri (2000). Na comision internasional dovea ridisegnare el confin. L?Etiopia no la ga acetà el novo disegno e la disputa continua, anca s eno ghe stà scontri armati dal 2000.

Durante le elesion del 2005, l’oposision ga vinto vari segi, e quasi tuti i governi locali. El governo ga mantegnù el controlo del parlamento co brogli e sospendendo i comuni pi grosi, metendo so omeni al posto de i sindaci eleti da la zente. En tel 2007, trupe etiopiche le xe entrade a Mogadisho par metar fin al governo de le Corti Islamiche, sostegnù da l’Eritrea.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_de_l%27Etiopia&oldid=1036349"