Storia de la Republica del Congo

La Storia del Congo la xe ona de le pi conosude dal mondo ocidentale par i contati co el regno del Kongo e la formasion de na monarchia cristiana in tel mezo de l’Africa a i inizi de i tenpi moderni. La storia del Congo la scominsia, parò, tanto prima.

Mapa del Congo

Preistoria

I pigmei mbuti i ga abità el teritorio do ancò se cata el Congo fin dal 3 000 a.C. I primi popoli bantu i xe rivà inte la region verso el I secolo d.C. I bantu i ga portà co lori la tecnologia del fero. I kongo i se sa stabilio a la foce del fiume Congo e i ga formà na serie de picoli regni. El pi inportante el xe stà el Mbanza Congo, na sità stato che ora la se cata in tel nord de l’Angola, rente de la Republica Democràtega del Congo. El Mbanza Congo el xe cresù (XV secolo) fin a cuerzar n’area de 300 000 km². Sto regno el xera divixo in sie province: Mbemba, Soyo, Mbamba, Mbata, Nsundi e Mpangu. I regni de Loango e Mbundu, al nord e al sud rispetivamente, i xera regni vasali. Le notisie so sti regni le xe baxade so la tradision orale.

Portoghexi

La region del Kongo in tel XV secolo

En tel XV secolo, le potense eoropee le volea spacar l’egemonia del comercio co l’oriente che el xera in man a i paexi islamici e la Republica de Venesia. I portoghexi i ga scominsià a sercar na via diversa par rivar a le Indie. En tel 1482, el navigador Diogo Cão el xe riva a la boca del fiume Congo. El incontro co la popolasion locale el xe ndà ben e, manco diese ani dopo, la nobiltà del regno la se sa convertio al cristianeximo. Nzinga a Nkuwu, el re de i bakongo, el xe stà batezà el 3 magio 1491. El fiol, Afonso I, el ga governà dal 1506 al 1543 e uno de i so fioi el ga studià a Roma e el xe diventà vescovo de i bakongo.

Co i portoghexi i ga scominsià a sfrutar le colonie del Brasile, Cao Verde e São Tomé e Príncipe, i ga vù bisogno de s-ciavi par le piantagioni. I portoghexi i ga tacà a tor i scaivi dal re del Kongo.

Sciavitù

La pràtega de la s-ciavitù la ga creà insodisfasion tra i bakongo. I bakongo i se sa reoltà contro i portoghexi soto la guida de Tchimpa Vita, na suora congolexe che la gavea visto de le visone de San Antonio da Padoa che el la gavea dito de batarse par l’indipendensa del so popolo. El 25 otobre 1665, 20 000 bakongo i se sa scontrà co l’esercito portoghexe. Co la bataja la ga scominsià, el re Antonio I el xe stà copà subito e i congolexi i ga perso la bataja. I congolexi i xera anca divisa tra de lori par le lote par la sucesion al trono.

El regno del Kongo in tel XVIII secolo

Le lote interne le ga portà el regno de Loango a la secesion, così come el regno Téké, che gavea la cavedal rente de do ancò se cata Brazaville. Altri regni i se sa stacà fin che el regno del Kongo el xe diventà no enclave picenina al nord de l’Angola. I portoghexi i ga abolì el regno del Kongo in el 1914.

Colonialismo

Mercanti

L’industrializasion de l’Eoropa la ga portà la richiesta de materie prime. L’Africa la xera el serbatoio natural par sodisfare sta richiesta. I paexi che podea verghe na fornitura costante de oio, legname, avorio, goma, coton e altro, i podea sperar inte na produsion de masa e a baso prezo. El bisogno del marcà el ga portà a la division de l’Africa secondo i canpi d einterese a la Conferensa de Berlin. Prima oncora de le nasioni, i marcanti e i esploratori i xe rivà in Africa par verzar le strade comerciali. Francexi, portoghexi e belgi i ga conbatù par el controlo del fiume Congo. A la fine, i portoghexi i ga vù l’enclave de Cabinda, a nord de la boca del fiume; i belgi (ma saria mejo dir el re Leopoldo II, che la colonia la xera sua propietà privada) na strisia de tera a sud – sinistra Congo – tra el fiume e el confin de la colonia portoghexe de l’Angola; e i francexi el teritorio a nord – destra Congo.

Re Makoko de i Téké (so la portantina) a Brazzavile in tel 1905.

El uficiale d emarina francexe, ma de origini italiane, Pierre Savorgnan de Brazza el xe sbarcà in tel Gabon e el ga risalì el fiume Ogooué par rivar al regno de i Téké in tel 1880. Qi el ga firmà n’acorde de difesa so el re Makoko e meso le baxi par la fondasion de la cavedal del Congo a Mfoa, on vilagio so le rive del fiume Congo.

L’Africa Equatoriale Francexe in tel 1913.

I francexi i ga sercà de inpor el so controlo co la violensa, el laoro coato, e altre pràteghe poco umane. Le etnie locali le se sa ribelà pi olte. El governo francexe, che el no volea spendar schei par le colonie, el ga dato el Congo in concesion a na seie de companie private che le fermava tute le reolte co na represion violenta e brutale. La costrusion de la ferovia da Pointe-Noire a Brazzaville – 511 km – la xe costà la vita a 23 000 africani e dosento eoropei.

Aministrasion francexe

En tel 1886 i francexi i ga proclamà la colonia del Gabon-Congo. En tel 1991 i la ga ciamà Colonia del Congo Sentrale. En tel 1910 el teritorio el xe stà meso co el Ciad, l’Oubangui-Chari e el Gabon par formar l’Africa Equatoriale Francexe.

Co i todeschi i ga atacà la Fransa in tel 1940, el maresialo Philippe Pétain el se sa areso e el ga formà el governo de Vichy. El general De Gaulle el xe scampà a Londra e el ga formà el governo in bando par combatar contro i todeschi. Quasi tuti i goernatori de le colonie francexi i sa meso co Pétain. De Gaulle el xe riusì a catar de i uficiali che el lo sostegneva, e così el xe stà bon anca de rovesiar i governatori fedeli a Petain e conquistar bona parte de le colonie. El governator del Ciad, Félix Eboué – on nero de la Guaiana Francexe – el ga sostegnù De Gaulle e el xe diventà el Governator Generale de l’Africa Equatoriale Francexe. En sta veste, el ga partecipà a la Conferensa de Brazzaville in tel 1944 do le linee guida de la politega coloniale francexe le xe stà riscrite.

Nasionalismo

El tratamento duro che i francexi i riservava a i africani el ga creà na forte reasion. André Matswa pol esar considerà el pare del nasionalismo congolexe. Nato in tel 1899 a Mandzakala, el ga scominsià a laorar par l’aministrasion francexe de Brazzaville in tel 1919. Dopo pochi ani, el xe ndà in Fransa e el ga combatù par i francexi in Maroco durante la rebelion del 1924-25. En tel 1926, a Parigi, el ga fondà la Asociasion de i Indigeni de l’Africa Equatorile Francexe e el ga vù el sostegno del partio comunista francexe e de i masoni. Co l’Asociasion la xe diventà ativa anca in Congo in tel 1929, i francexi i ga disolto el grupo, meso i dirigenti in prison e mandà Matswa in bando in Ciad.

Matswa el xe scampà in Fransa in tel 1935 e continuà el so laoro politego soto falso nome. El ga anca conbatù contro i todeschi e el xe stà ferio al fronte. Aresta na seconda olta, el xe stà mandà ndrio in Congo in tel 1941. Matswa el xe morto in prison el 8 genaro 1942. Dopo de lu, altri ativisti i ga seguì el so esenpio de laoro par el paexe.

Jacques Opangault el xe n’altro leader che el ga laorà par el Congo. Nato in tel 1907, el ga scominsià protestando contro la Cexa Catolega parché la usava la lengoa lingala. Opangault el volea che se usase el mbochi, chel xera la so lengoa. El xe stà arestà e mandà in Sentrafrica fin a la fin de la seconda guera mondiale. Al so ritorno el ga fondà el Movimento Socialista Africano. I socialisti francexi i no ga mia dato sostegno al so laoro par le so posision anticlericali e le so idee radicali. I francexi i preferiva sostegnar Felix Tchicaya del Partio Progresista Congolexe. Tchicaya el xera de la fameja reale de Loanga. Co el leader ivoriano Félix Houphouet Boigny el ga fondà el Grupo Democràtego Africano e el Partio Progresista Africano (1947). El 21 novenbre 1945 el xe stà el primo africano eleto alparlamento francexe. Tchicaya el ga perso el sostegno in Congo parché el no ga mia oposto la Fransa par verghe l’indipendensa subito dopo la guera. El xe morto in tel 1961.

I francexi i ga senpre mostrà interese par Fulbert Youlou, on ex prete catolego. Ordinà sacerdote in tel 1949, el ga dovù lasar la tonega co el sa meso rentro a la politega. Co l’autonomia del Congo in tel 1958 el xe diventà el primo ministro.

Indipendensa

I do ani prima de l’indipendensa xe stà turbolenti. Youlou el ga scominsià a far vedar le so tendense ditatoriali. El xe comunque diventà presidente del Congo a l’indipendensa el 15 agosto 1960. El ga dovù dar le dimisoni on ano pi tardi, co el ga dito che el volea crear el monopartiismo. La reasion de la popolasion la xe stà dura. I militari i ga tolto el potere e meso su on governo sivile provisorio. En tel 1963, Massamba-Débat el xe stà eleto presidente e Pascal Lissouba primo ministro. En tel agosto 1968, el caitano Marien Ngouabi el ga fato oncolpo de stato e el xe diventà presidente. Ngouabi el xe stà sasinà el 18 marso 1977. El colonelo Joachim Yhombi-Opango el xe stà nomina presidente, ma el xe stà rimoso do ani dopo. El vice presidente, Denis Sassou-Nguesso, el xe stà meso presidente provisorio.

Verso la democrasia

Dopo tanti ani de vita politega piena da tensioni, el paexe el sa moso verso la democrasia multipartìtega in tel 1992. Pascal Lissouba el xe stà eleto presidente in tel 1992. La politega de Lissouba la ga portà a varie somose e solo l’intervento de governi foresti el ga permeso de fermar la situasion prima che se svilpase la guera sivile.

En tel 1977, Soassou el se sa presentà a le elesionoi contro Lissouba. I militari, fedeli al vecio presidente, i ga ocupà la casa del presidente in carica. Lissouba el ga domandà l’intervento de altri paexi africani ma le trupe de Nguesso le ga caturà la cavedal e Pointe Noire el 16 otobre. Ngueso el ga tolto la presidensa e promeso el ritorno al governo sivile in tri ani. En tel 1988, altri grupi de guerilieri i ga tacà a conbatar contro el governo, blocando el proceso de ritorno a la democrasia. En tel 1999, el governo el ga firmà el cesate el fogo co quasi tuti i grupi de ribeli. Sassou el ga vinto le elesion del 2002 sensa oposision.

Portałi:
• Portałe de Africa
|

Controło de autorità	LCCN (EN) sh85031097