Storia del Sudan

La Storia del Sudan la xe sempre stà influensà da i popoli vicini. Anca co el Sudan el ga avù el control politego e ecomico de l’Egito, la cultura egisiana el lo influensava. Ancò el Sudan el xe sempre tirà da corenti religiose, politeghe e finansiarie che vien da diresion diverse.

Preistoria

I primi omeni che i ga abità el Sudan i xe rivà qi in tel paleolitico. Ricatamenti archeoligici del neolitico i dimostra che la zente la vivea in vilagi fortificadi. I xera pescadori, caciatori, alevatori e i racoglieva granalie par vivar. En tel nord del Sudan – Nubia – la popolasion la xera culturalmente identica a quele de l’Alto Egito. I do popoli i ga svilupà el sistema faraonico a lo steso tempo za inte el 3300 a.C.

Kush

Piramidi de Meroe

I pi veci documenti sul Sudan i vien da l’Egito. I egisiani ciamava Kush el teritorio fin a la prima catarata del Nilo. Dopo la caduta del vecio regno, par do mila ani, i egisiani i ga controlà sta rejon a livel cultural (par esempio, ghe pi piramidi in Sudan che in Egito) e religioso. I egisiani i vendea gran a Kush e i comprava sciavi, oro, avorio, incenso e carneliana – na piera usada par far le ponte de le frece. I egisiani i ga costruio de i fortini longo tuto el Nilo par controlar el fluso de le merci.

En tel 1720 a.C. i hyksos i ga invaso l’Egito e taja i contati co Kush. Co l’emergere del nuovo regno (1570-1100 a.C.) el faraone Ahmose el ga invaso Kush e lo ga fato na provincia de l’Egito. El control de l’Egito el rivava fin a la zona dove ancò ghe Khartoum. Co la fin del nuovo regno anca l’influensa egisiana la xe diminuida. No ghe xe documenti dal XII al IX secolo. En tel VIII secolo a.C. el regno de Kush, co cavedal a Napata, el xe stà bon de conquistar l’Egito del sud. El re Kashta el ga conquistà Tebe, so fiol Piankhy el ga esteso el control fin al delta del Nilo. Par pi de on secolo, i faraoni neri de la XXV dinastia i ga controlà l’Egito. La dinastia de Kush in Egito la xe terminà co l’invasion asira (688 a.C.), ma la xe continuà in Sudan, do la controlava la Nubia e i teritori a sud e a est de la cavedal.

Meroe

I egisiani i ga provà a conquistar Kush in tel 590 a.C. I ga ataca la cavedal, Napata, e i xe stà boni de sachegiarla; ma i kushiti i xe stà boni de parar via i invasori. I kushiti i ga isteso spostà la cavedal a Meroe, rente de la sesta catarata del Nilo. Mentre el Egito el pasava a le dominasion straniere (Persia, Grecia, Roma), el regno de Meroe el ga continuà a sviluparse par conto suo.

A Meroe se cata i resti de i sistemi de irigasion che permetea la coltivasion intensiva d ei tereni, costrusion che dimostra l’abilità de i architeti e de i artisani, piramidi e steli. En tel I secolo a.C. se scominsia a catar iscrision in lengoa meroana. I re de Meroe i pasava el poder a i fradei o ale sorele. Co la morte de tuta na generasion, el poder el pasava ai fioi, secondo el merito e la linea matriarcale, no l’età. I contati co el Mediteraneo el ga parmeso a elementi elenici de rivar fin qi, così come el contato co l’Arabia el ga parmeso a elementi culturali arabi e hindu de entrar ne la cultura kushita. Da i ricatamenti archeologici el par che la cultura metalurgica de Meroe la sa difondesto a ovest fin su la costa Atlantega del continente.

En tel II secolo d.C. i nobati i xe penetrà in tel nord de Kush e i ga fondà el loro regno. A sud, el regno de Meroe el ga perso teritorio par l’espansion del regno de Aksum. El re Ezana el ga distruto Meroe in tel 350 e el ga incorporà i teritori inte el so regno.

Cristianesimo

Nubia cristiana

Dopo on periodo de asestamento, tre regni i xe emersi in tel VI secolo: Nobazia, co cavedal a Faras in tel nord; Muqurra, co cavedal a Dunqulah (150 km a sud de la moderna sità omonima) in tel sentro; e Alwa, co cavedal a Sawba in tel sud. Tuti e tre sti regni i gavea contati co el mondo bizantino. I re de i tri regni i se sa convertio al cristianesimo monofisita (che crede in ona natura divina-umana de Gesù Cristo) verso el 540. El cristianesimo el ga verto la comunicasion co l’Egito e co el mondo Mediteraneo. La Cexa la ga spinto l’educasion e la ga verto scole tacà a le catedrali. De sto perioso, se cata documenti scriti in greco, copto, meroitico e arabo.

Co i arabi i ga conquistà l’Egito in tel 640, i regni cristiani i se sa catà tajà fora dal mondo cristiano. I arabi i no xe riusidi a conquistar i regni cristiani, ma i ga penetrà la Nubia co i marcanti.

Islam

L’influensa de l’Islam sul nord Sudan la xe cresuda on poco a la olta. Tra la fin del XI secolo e el XIV secolo, i regni cristiani i se sa disolti sensa atachi militari esterni e la zente la xe pasà a l’Islam. I contati co l’Egito i xe sempre stà de comercio e vari sultanati locali i controlaa la rejon. I marcanti arabi i controlava el marcà de i s-ciavi che dal sud del Sudan i vegnea portadi in Arabia e in Egito.

Sudan Moderno

La storia moderna del Sudan la scominsia in tel 1820, co le trupe turche e egisiane del impero Otomano le ga conquistà el nord del paexe. Le trupe otoman le xe stà bone de rivar a sud de Khartoum, ma no le ga poduo pasar le paludi del Sudd. Anca el mondo cristiana el ga provà a penetrar ste rejoni. I misionari catoleghi e protestanti i xe vegnù in Sudan e i ga costruio varie mision longo el Nilo, so i monti Nuba e ne la cavedal Kartoum. Importante la xe la presensa de Daniele Comboni e de i so misionari (come Giovanni Losi, quasi tuti veneti. I misionari comboniani i gavarà na grande importansa ne lo svilupo de le scole, de i ospedai e de l’evangelizazion de tuto el Sudan. Le forse eoropee le xe intervegnù in Sudan par fermar la trata de i sciavi. La società arabo-sudanese la ga perso la principal fonte de sostentamento e la zente la xera pronta a ribelarse a l’intromision straniera. El primo periodo de la storia moderna del Sudan el xe terminà co la rivolusion del Mahdi.

La Mahdia

En tel 1881, Muhammad ibn Abdalla, on eremita islamico, el se sa proclamà el Mahdi, el mesia promeso da Maometo. El Mhdi el ga ciamà tuti i musulmani del Sudan a la rivolta. La zente, stufa de la cativa aministrasion de i egisiani, la ga risposto formando subito on esercito ben de tegnar testa a le trupe governative. La cavedal la xe stà conquistà el 26 gianaro 1885, el governator del Sudan, el inglexe general magiore George Gordon, elxe stà decaità e tanti de i 50 000 abitanti de la sità i xe stà masacrà da i ansar, i guerieri del Mahdi.

El Mahdi el xe morto in tel 1885 e Khalifa Abdullah el ga tolto el so posto. I inglexi i ga mandà na forsa de invasion al comando de Horatio Kitchener, che el sarà ricordà come el macelaro del Sudan par le atrocità comese qi e in Sudafrica durante le guere boere. EL Sudan el xe presto tornà soto l’influensa inglexe in condominio co i egisiani.

La colonia

Anca se oficialmente ghera on condiminio anglo-egisian in tel Sudan, i egisiani no i ga mai contà masa. Dop verghe risolto de le beghe de frontiera co i belgi (enclave de Lado) e i francexi (area de Fashoda), i inglexi i controlava tuto el Sudan che el xera aministrà come do colonie separate (nord e sud). Co le Close Districts Ordinances (Regole de i Distreti Separati) del 1920, i inglexi i ga imposto l’uso del pasaporto par pasar da na zona a l’altra e de parmesi speciali par el comercio. Anca i misionari i sa visto costreti a laorar in aree decise da la colonia, che no permetea a i cotoleghi de laorar ne le aree de i protestanti. Al nord se usaba l’inglexe e l’arabo, al sud inglexe, denka, bari, nuer, lotuku, shilluk, zande e lafon. I inglexi no i ga laorà mas par lo svilupo del sud, ma i ga iutà el nord.

En tel 1946, i inglexi i ga cambià vision par el Sudan. Se prima i pensava de metar el sud co l’Africa Orientale, adeso i ga volù tacar el sud al nord Sudan. A la conferensa de Juba del 1947, le autorità del sud le sa visto cambiar tute le regole de governo. I sudisti i xe stà traditi da i inglexi. El governo el xera a Khartoum e funsionava in arabo, mentre che lori i savea l’inglexe. Co i inglexi i ga lasà i ufici governativi, de 800 posti solo 4 i xe andà a zente del sud.. I inglexi i ga unificà el Sudan metendolo inte le mane de i nordisti, visti da i sudisti come musulmani, arabi e nemici del sud.

Guera sivile

En tel 1956 el Sudan el xe diventà indipendente co la promesa de formar na federasion. I arabi del nord, parò, no i ga mantegnù la promesa. I soldai del sud i sa ribelà e ha scominsià la guera sivile che la xe durà 17 ani. Al nord, el governo el xe cascà in man a na serie de pułìteghi che i pensaa pi a manovre de partio che al ben del paexe. En tel 1958, el generale Ibrahim Abboud el ga organizà on colpo de Stato e ga tolto el poter sensa violensa. Ma anca el so governo no el xe stà bon de afrontar i problemi del paexe e, in tel 1964, el ga dovù rinunsiar. Fin al 1969 el Sudan ga visto na serie de governi, tuti mia boni de aprovar la Costitusion del paexe o de afrontar i problemi co el sud. El 25 magio 1969, el colonel Gaafar Nimeiry el ga fato on colpo de Stato e tolto el poter. En tel 1972, el governo el ga firmà l’acordo de Addis Abeba co le milisie del sud e la guera sivile la sa fermà, anca se le brase de la rivolta le xera oncora vive soto l’aparensa de la paxe.

Islamizasion

Nimeiry el ga soferto do colpi de Stato. Ono inte el 1971 chel xe durà sete di, e n’altron tel 1976 preparà da i ansar, i seguaci del Mahdi. En tel 1983, Nimeiry el ga aprovà la sharia, el corpo de legi islamiche che faxea del Sudan on paexe solamente islamico. La guera sivile la xe scominsià na seconda olta. En tel 1985 on colpo de Stato el xe stà organizà dal general Abd ar Rahman Siwar adh Dhahab e Nimeiry el ga dovù scapar in Egito.

En tel giunio 1986, Sadiq el Mahdi, neodo del Mahdi e cao de i ansar, el ga formà on governo de coalision co el programa de islamizar el Sudan. En tel 1989, el militare Omar el Bashir – conosù par la so vita poco aderente al Corano – el se sa convertio e el ga organizà on colpo de Stato che la meso al poter. Bashir el ga continuà la guera col sud e el ga scominsià anca a combatar co altri grupi etnici marginali al nord. Dopo na longa serie de tratati de paxe, el acordo el xe stà firmà a Nairobi (Kenya) el 9 genaro 2005. El tratato prevede che el sud el sia autonomo par sie ani; che dopo sie ani ghe sia on referendum par vedar se el sud el vol star co el nord o se vol far la secesion par formar on novo Stato; che la sharia la rimane valida al nord, ma che el sud el pol farghene a meno; che i schei del petrolio – che el xe tuto al sud – i sarà divixi tra nord e sud.

Efeti de la guera

Durante i ani de la guera, 4 milioni de sudanexi i xe scapà da le loro case par trasformarse in rifugiati interni o rifugiati internasionali in Uganda, Kenya, Ethiopia e Egito. Pi de on milion de sudanexi el xe morto par colpa de la guera. I sudisti che i xe scapà in tel nord i xe stà tratà da sitadini de secondo grado e i vive in baracopoli rente de la cavedal. I no ga diriti sivili e i no pol laorar a la pari co i altri sudanexi. Co John Garang – cao de la guerilia sudanexe – el xe morto in on incidente aereo, i sud sudanexi che i vivea a Khartoum i ga atacà la sità e meso in pericolo la tregua. El sucesor de Garang, Salva Kir, el ga tolto el so posto. Salva Kir el xe el presidene del sud e vice presidente del paexe. El sud el stà provando a vegnar fora da deceni de distrusion ma la coruzion e la mancansa de competensa de i leader no lasa ben sperar.

Darfur

Mapa del Darfur

El governo de Bashir el ga acetà la tregua co el sud parché el no podea vinsar la guera e mantegnar el esercito el costava masa. Bashir el ga continuà la so lota contro i grupi marginali al nord. Da el 2003, el confito in tel Darfur el xe rivà al sentro de l’atension internasionale. El Darfur le xe grando come la Francia, i abitanti i xe grupi etnici musulmani ma neri. Soto la sabia del Darfur se cata petrolio e altre risorse importanti. El governo el sostien na campagna de genocidio contro i darfuriani par poder usar la rejon come i vol lori. El governo el ghe da le armi e el sostegno logistico a i janjaweed, grupi de guerilieri de origine araba. L’Union Africana la ga mandà de i oservatori par controlar la situasion, ma el genocidio el continua. A lo steso tempo, el governo del Ciad el ga dichiarà la guera co el Sudan el 23 dicembre 2005 in risposta a atachi de guerilieri che se nascondea in Sudan. No se de dismentegar che tuti i governi del Ciad i xe rivà al poter co de le asion militari a partir dal Sudan.

Portałi:
• Portałe de Africa
|