Storia del Ruanda

La storia del Ruanda la xe in comune co quela del Burundi par quasi tuto el periodo pre-storico. Nol xe senpre ciaro che influensa el regno dei Bunyoro (Uganda) el gavese so el regno del Rwanda. Dal XVI secolo d.C. se scominsia averghe de le testimonianse storiche so sto regno e so la so relasion co i regni de la region.

Mapa del Ruanda

Preistoria

Anca se no ghe ricatamenti paleontologici de rilievo, se sa che i primi abitanti del Rwanda i xera i twa, ona etnia pigmea, che anca ancò i se cata in tel Ruanda. A scominsiar dal secolo VII de la nostra era, grupi de bantu i xe entradi in tel paexe e i ga formà na siviltà agricola. Altri grupi bantu i xe rivà a ondate inte i secoli sucesivi e i ga portà la metalurgia. I bantu i ga dato vita al popolo hutu. I primi segni de presensa tutsi i xe del XV sècoło. Da la leteratura orale se sa de l’esistensa de tri regni. Del primo se sa solo chel ghera e che querzea el Ruanda Ocidentale. El secondo el xe ciamà el regno Mubari, soto la guida del clan Zibaga. El terso regno el xe stà quel de Gisaka, in tel sud est del Ruanda. El xe sta on regno forte che el xe restà indipendente fin al XIX secolo.

Problema de le etnie

La società burundexe la xe divisa tra hutu e tutsi, i twa i xe na minoransa picinina. I colonialisti i ga sostegnù la teoria de do popoli de origine diversa, una superiore e l’altra inferiore. Sto schema el se sposava ben co la teoria che divideva i grupi umani so na scala de valori dal baso a l’alto, e che giustificava el predominio de i bianchi su i neri. Secondo sta teoria, i tutsi i xe de origine hamitica, e quindi pi nobile de i bantu. I sarea vegnù zo da i altipiani etiopici. Altri i dixe che i tutsi i vien dal sud.

I ricercatori moderni i xe contrari a vedar in hutu e tutsi do grupi etnici geneticamente diversi. Tanti fatori i fa pensar a on solo grupo che el se sa diviso longo tradision econòmeghe e sociali. I hutu i xe agricoltori e i tutsti alevatori. Le diferense fìsiche le se pol spiegar co la dieta e tipo de laoro. Tuti e do i parla el kinyarwanda, on fato difìsiłe da spiegar se i do grupi i gavese veramente na orìxene difarente. El saria el primo caxo de na clase dominante che tol ła łéngua de ła clase inferior. Altro fato che fa pensar a n’origine comune el xe l’importansa che tuti e do i ghe da a l’alevamento.

Prima del periodo coloniale solo el 15% de la popolasion la xera tutsi. La majoria de i tutsi i xera pori bacani. Ma la majoria de i nobili i xera tutsi. I xe stà i colonialisti che i ga dato a tuti i tutsi no status de superiorità sociale, metendo i hutu in na posision de sotomision a i tutsi.

La verità la xe che la majoria de le persone le xe uguali e se pol saver l’etnia soło dai nomi. Sicuramente inte el pasà grupi nilotici i xe rivà qûi dal nord, ma no ghe segni stòreghi de na migrasion hamitica traverso el Kenya. Anca i grupi nilotici i xera picinini e no ga łasià trace significative.

La formasion del Ruanda

El regno del Ruanda el xe nato da on picolo regno sorto sul lago Muhazi, rente de la sità de Buganza. Soto la guida del re Cyrima (secolo XV), el regno el ga inglobà i regni de Bumbogo, Buriza, e Rukoma. N’invasion de bunyoro (de l’atuale Uganda) la ga spacà sta prima formasion del regno e la so espansion.

El regno el se sa riorganizà e spostà l’espansion a sud, verso i altipiani de Nduga. En tel XVI secolo, el re Ruganzu Ndori el xe riusì a riconquistar Buganza. I so sucesori i ga continuà l’opera de espansion.

L’espansion no la xera militare. La popolasion la conquistava novi teritori, esportava la tecnica agricola-pastorale, e la strutura sociale del regno. Co el re el podea, la centralizazion del regno la ga inglobà na nova zona e canpi militari i xe stà mesi a la difesa da le incursion de altri regni. El re, el Mwami, el ga direto conquiste militari solo verso i regni del Burundi, de Gisaka e Bugesera. El Mwami el xera a cao de on consilio de nobili, elbatware b'intebe . I cai locali i fasea parte de la nobiltà, e la majoria i xera de la cultura pastorale. La diferensa tra hutu (agricoltori) e tutsi (pastori) la xe diventà rigida. El 95% de i cai i xera tutsi.

La Colonia

La divixione de l’Africa a la Conferensa de Berlin del 1884-85 no la ga tocà la region de i Grandi Laghi de l'Africa. Sta region la xe stà divixa a la Conferensa de Brussel in tel 1890. I todeschi i sa tolto Ruanda e Burundi.

I todeschi i xe rivà in Ruanda in tel 1897. La popolasion la xera divixa tra quei che i volea la so presensa e quei che i volea conbatar. A la fine, i todeschi i xe stà boni de metar su on consilio che i li ssostegnea. Inoltre, i todeschi i xera ocupà co la colonizasion del Tanganica e i ga lasà na presensa picola in Ruanda.

I Belgi

Dopo la prima guera mondiale, la Germania la ga perso el control de le colonie in Africa. El Belzo el ga preso el controlo de la region, ciamada Ruanda-Urundi. I belgi i ga continuà a sostegner i tutsi par el control politego de la colonia. I belgi i ga anca mandà a scola tuti i tutsi, co el risultato che la majoria de i tutsti i gavea n’educasion superiore a i hutu, aumentando la diferensa sociale tra i do grupi. I belgi i ga favorio i tutsi in tute le maniere e i ga rinforzà l’idea de la superiorità raziale de i tutsi. Se prima de la colonia tutsi e hutu i ga barufà qualche olta, adeso l’idea che dominava la xera che i tutsi i gavea el dirito de comandar i hutu, che i xera inferiori. La nova stratificasion sociale sostegnuda da i belgi la gavarà gravi conseguense in tel futuro.

Dopo la seconda guera mondiale, le Nazioni Unie le ga dà on mandato al Belzo parché portase el Ruanda-Urundi a l’autonomia. El re Rudahigwa – on tutsi de vision democràtega – el ga abolio el sistema del "ubuhake", che ge dava el parmeso de tegnar animali solo che a i tutsi. Da senpre el poseso de vache el xera la misrua de l’inportansa sociale de na fameja. I hutu, che adeso i podea verghe de le vache, i sa sentii senpre pi indipendenti dal control tutsi. Sta riforma, bona inte el so contenuto, la ga rinforsà la tension sociale in Ruanda.

I Belgi i ga inposto on sistema de registrasion do tuti i dovea esar divixi tra hutu, tutsi e twa. La divixion la ga creà tenson sociale, ma la ga verto na posibilità insperata. Co l’avento de le votasion segrete, la majoria la gavea la posibilità de far valer el so dirito. I hutu i sa encorti che i podea votar i so rapresentanti, libarandose de i tutsi na olta par tute. El re Charles el ga tentà de pacificar i animi distribuendo la tera in modo democratico. I tutsi i se sa enrabià e i ga asasinà el re in tel 1959. El so sucesor, re Kigeri V, nol xe stà bon de portar la calma. La rivolta de i hutu la ga portà a la fin de la monarchia, e el re el xe scampà in Uganda. I tutsi i ga alora tentà de copar Grégoire Kayibanda, el leader del Movimento Democràtego Republicano. El resultato el xe stà el genocidio de 30 000 tutsi.

El 25 setenbre 1960, el referendum popolar indeto da le Nasion Unie el ga deciso par la fin de la monarchia in favor de la republica. Grégoire Kayibanda el xe diventà el primo ministro. Pi de 150 000 i xe scanpà in altri paexi. L’indipendensa la xe rivà in tel 1962.

Ruanda moderno

Co l’indipendensa, Grégoire Kayibanda el xe stà eleto presidente. Kayibanda el ga proposto na politega de distension, de rispeto de i diriti de tuti e de svilupo par la popolasion. A lo steso tenpo, la corusion la ga slargà la so presensa e el governo el ga boicotà le clasi pi alte de i tutsi. La tension sociale la xe salia n’altra olta e el sistema giudisiario nol difendva i diriti de i tutsi. I hutu i ga tacà a ciamar i tutsi inyenzi, scarafagi. Miliari de tutsi i xe scampà in Tanzania e i altri paexi de la region.

El 15 lulio 1973, Juvenal Habyarimana el ga fato on colpo de stato contro Grégoire Kayibanda e disolto el parlamento. En tel 1974 la tensio sociale la xe salia fin a provocar somose co la morte de vari tutsi. En tel 1975, Habyarimana el ga fondà el Movimento Republicano Nasionale par la Democrasia e lo Svilupo. A le elesion del 1978, el presidente el ga vinto. Habyarimana el xe stà rieleto in tel 1983 e 1988. Soto la presion sivile in tel 1990 el presidente el ga fato n’apertura verso el multipartitismo.

Guera sivile e genocidio

I tutsi che i ga lasà el paexe inte i ani 50 e 60, i ga domandà de esar riconosudi come ruandexi e de poter votar in tel paexe. El 1 otobre 1990, i guerilieri del Fronte Popolare Ruandexe – grupo sostegnù da i tutsi, da i governi de l’Uganda e de i Stati Unii, e co l’apogio de la Fransa – i ga invaso el Ruanda a partir dal sud de l’Uganda.

I tutsi i no ga calcolà ben le so mose. I ga volesto rivar subito a Kigali, la cavedal. I hutu i ga ciapà paura, pensando che i tutsi i volea tor el poter e reinstaurare el sistema feudale. El presidente Habyarimana el ga subito aprovà i programi par el genocidio de i tutsi e de i hutu che colaborava co lori.

Paul Kagame

El 6 aprile 1994, on aereo che portava Habyarimana e Cyprien Ntaryamira, presidente del Burundi, a Kigali, el xe stà tirà zo co de i misili de costrusion francexe che i militari americani i gavea catura durante le prima guera del Golfo e pasà a i guerilieri tutsi. I do presidenti i xe morti e el genocidio el xe scominsià subito. A la fin de la guera sivile, almanco mezo milion de hutu e de tutsi i xera morti. La cifra uficiale de 937 000 morti no la xe realistica. Inoltre, el goerno nol ga mai volù che se controlase el numero de i hutu copà da i guerilieri. El cao de la guerilia, Paul Kagame, el ga conquistà la cavedal e el ga tolto el potere, prima come primo minstro e dopo come presidente.

Paul Rusesabagina, che ga scrito la so testimoniansa del genocidio in tel libro Hotel Rwanda, el ga domandà che Paul Kagame el sia giudicà da on tribunal internasionale par crimini contro l’umanità. L’invasion del Zaire (ancò Congo) ne la prima e seconda guera del Congo le ga portà la morte de pi de 4 milioni de persone. L’invasion le xe stà organizà da Kagame.

Normalizasion

Dopo la fin de la guera sivile, el governo el ga sominsià a giudicare quei che i ga participà al genocidio. On grupo el xe stà giudicà dal tribunal internasional in Tanzania, i altri i xera prisonieri in Ruanda. En tel 2004, Kagame el ga parmeso che a giudicare i sospeti genocidari i fuse i tribunali tradisionali, i gacaca (se leze ghaciacia). Kagame el ga rifiutà a i giudici del tribunale internasionale de far investigasion so la condota sua e de i so uifciali durante el genocidio. El proceso democràtego nol xe oncora scominsià e el Ruanda el xe de facto on paexe controlà da i tutsi. Ancora ancò, basta no esar dacordo co la version governativa par esar dichiarà genocidari.

Portałi:
• Portałe de Africa
|