Storia del Kenya
I paleontologi che i ga scavà in Kenya, i xe stà boni de catar dinosauri e altri animali fosili de 200 milioni de ani fa. Se sa che tuta l’Africa Orientale la gavea na fauna animale tanto vasta. In scavi a rente del Lago Turkana, in tel nord del paexe, Richard Leakey e Kamoya Kimeu – del Museo de Sciense Naturali de Nairobi – i ga catà osa de ominidi de 2,5 e 1,8 milioni de ani fa aparteneti ai generi Homo abilis e Homo erectus. Anca se i ricatamenti pi antichi de Homo sapiens (l’omo moderno) i xe stà fati in Etiopia, se sa che i primi omeni i vivea anca inte la Rift Valley in Kenya. I siti di Olorgesaile, tra Ongata Rongai e Magadi, e la Colina de i Iraci a Nakuru dimostra na continua presenza de ominidi e omeni.
Primi abitanti
canbiaI primi abitanti serti de l’area che la diventarà el Kenya i xe stà popoli simili a i pigmei. De lori se cata oncora de le trace inte i nomi de i posti. Do grupi etnici del Kenya – i elgeyo e i ogiek – i ga na streta parentela co sti grupi. I pigmei i xe stà parà via da i bantu e i nilotici co i xe entrà in tel Kenya. Popoli cusciti i xe entrà in Kenya fin dal 2 milenio prima de Cristo.
Se sa che marcanti fenici, egisiani, greci e romani i vegnea su le coste del Kenya par comprar spezie e animali esotici. Anca marcanti arabi i vegnea su ste coste fin dal primo secolo de la nostra era.
Influenza axiàtega
canbia
Grupi arabi e persiani, e forse anche indiani, i sa sistemà so la costa za dal VIII secolo d.C. Questi i xera marcanti che comprava roba da i neri locali e i le vendea in Arabia e Persia. I ga costruio sità so tuta la costa e se pol oncora vedar le roine de alcune de queste (Mwana Maryamu, Ghedi, Jumba la Mtwana, Shimoni e altre). I bantu i xera za rivà su la costa. Altri grupi bantu (kikuyu, kamba, luya) e nilotici (maasai, turkana, pokot, luo) i arivarà durante i ultimi oto - nove secoli. Ancò do terzi de la popolasion del Kenya la disende da sti grupi che i se sa postà longo la Rift Valley, rente al Lago Vitoria, ntorno al Monte Kenya, e ne i altipiani del centro sud del paexe.
Mombasa xera el porto dove se podea conprar avorio, oro e spezie. I ultimi studi su la trata de i s-ciavi i dixe che i porti interesà xera Malindi e Shimoni. No sembra che Mombasa fuse anca on punto de arivo de le carovane de sciavi. I grandi viagiatori arabi al-Idrisi (1151) e ibn Battuta (1331) i parla de Mombasa ne i so scriti. La spedision cinese de Zheng He la ga aprodà a Mombasa in tel 1415.
Colonialismo
canbia
I portoghexi i xe stà i primi eoropei a rivar su la costa in tel 1498, co Vasco de Gama che esplorava le coste de l’Africa par verzar la via par le Indie. I portoghexi ga sachegià la sità in tel 1500 e 1528, e i ga costruio on forte (Fort Jesus) che controla l’entrada del Tudor Creek, ono de i do trati de mar che separa l’ixola da la tera ferma. En tel 1638, Mombasa xera na colonia portoghexe soto el controlo de Goa (India) ma la xe pasà soto el sultanato de Oman in tel 1698, controlà dal sultan de Zanzibar. La fameja de i Mazrui xera i governatori (liwali) locali. I portoghexi i ga costruio na postasion a Malindi, ma i no se mai entrà ne l’interno.
I arabi de l’Oman i xe stà boni de metar insieme le sità stato su la costa – da la Somalia al nord Mozanbico – e a unificar el marcà de sciavi, oro, avorio e spezie. L’influensa omanita su la costa la xe stà granda. Anca se dal 1880 i omaniti i ga perso el control politego, i xe restai on grupo influente a livel cultural e econòmego.
El colonialismo se pol far scominsiar co l’arivo de i todeschi a Zanzibar in tel 1885. I todeschi i ga creà on protetorato su tuti i teritori controlà dal sultan de Zanzibar, che el controlava anca la costa del Kenya. I inglexi i xe rivà in tel 1888 co la Compania Imperiale de l’Africa Orientale. I todeschi i ga lasà la costa kenyana a i inglexi in tel 1890. I inglexi i volea costruir na ferovia da Mombasa a Kampala, in Uganda. No ghera proeti de colonizar el Kenya. La colonizasion del Kenya la xe diventà na realtà parché no se podea verghe la ferovia sensa el control del teritorio. Par costruir la ferovia, i inglexi i ga portà i operai da l’India, altri indiani (tanti da quele rejoni che le diventarà pi tardi el Pakistan) i seguia sta costrusion come comercianti. Quasi tuti i xe restai in Kenya anca dopo che ga finio de costruir la ferovia. Vari grupi locali i no volea la costrusion de la ferovia. En particolar, i nandi i ga combatù. I inglexi i ga dovesto metare i nandi in riserve par inpedir i atachi.
Za da i primi ani del XX secolo, inglexi, danesi, e sudafricani i xe entrà su i altipiani del Kenya par torse le tere e far fatorie o alevamenti de bestie. Nairobi la xe stà fondà in tel 1905. En tel 1930 ghe xera za 30 000 bianchi in Kenya.
En 1952, la principessa Elizabeta de Inghiltera la xera in visita a la colonia. Co la stava al parco de Aberdare, a l’albergo costruio su i albari Treetops, la ga sentio de la morte de so pare Giorgio V. La nova regina Elizabeta la xe subito tornada in Inghiltera.
Da l’otobre 1952 al dicembre 1958, el Kenya el ga visù i momenti pi bruti de la so storia. Se trata del periodo de l’emergensa. I Mau Mau – on grupo de kikuyu ma anca de altre tribù che gavea fato on giuramento de sangue contro i colonialisti – i ga tegnù la polisia e l’esercito soto tension. I inglexi i ga mandà quasi tuti i kikuyu ne le riserve o inte i campi de concentramento. I ga ancà copà o causà la morte de miliari de inocenti, done e butini, ma anca veci e zente che no ghe centrava niente.
Dopo na serie de falimenti, i inglexi i ga caturà Warũhiũ Itote (15 genaro 1954), conosù da i Mau Mau come Generale Cina. El cao de i Mau Mau, Dedan Kimathi co ga savesto che i inglexi no gavea na foto sua de lu, el ga mandà na fotografia par aiutarli a ciaparlo. Kimathi el xe stà caturà el 21 otobre 1956. Da alora i Mau Mau i ga perso forsa e i ga dovesto rivar a la fin de le ostilità.
Indipendensa
canbiaI inglexi i ga vinto contro i Mau Mau ma i ga perso la colonia. Durante l’emergensa, i cai politeghi i xe stà mesi in prison. Prima intrà tuti, Jomo Kenyatta el xe riusì a farse la fama de cao de l’oposision, anca se ghe n’era altri e lu no l’era el cao de i Mau Mau. Co la fin de l’emergensa, i inglexi i xe stà costreti a contratar con lu par el pasagio de l’aministrasion a i neri. Kenyatta el ga fondà el partio Union Africana Nasional del Kenya (KANU) e co stà formasion el ga vinto le elesion aministrative del 1957. El 12 dicembre 1963, el Kenya el xe diventà indipendente e Jomo Kenyatta el xera el primo presidente e cao de governo. Subito dopo l’indipendensa, el Kenya el ga dovesto combatar la guera contro i shifta, on grupo de guerilieri de origine somala. La guera la xe finia in tel 1967.
Kenyatta el xe morto in tel 1978 e el so vice presidente Daniel Toroitich arap Moi el ga tolto el so posto. En tel 1982 Moi el ga soferto on tentativo de colpo de stato. Dopo che l’esercito el xe riusì a caturar i oficiali de l’aviasion che gavea scominsià el colpo de stato. Moi el xe pasà da on governo quasi democràtego a la ditatura. Anca dopo el pasagio al multipartiismo, Moi el xe stà bon de controlar la vita politega del paexe fin al 2002.
El tel 1991, 1993 e 1996 el paexe el xe stà scoso da guere tribali. I conflii i xera causà da i pułìteghi che sostegnea Moi e che volea dimostrar che no se podea far sensa del vecio presidente. Almanco 100 000 persone le xe morte durante sti confliti.
En tel 2002, l’oposision la ga vinto le elesion e el nove prsidente eleto el xe stà Emilio Mwai Kibaki, sostegnù da la Coalision Nasional de l’Arcobaleno (NARC). Soto el governo Kibaki, el Kenya el xe avanzà econòmegamente, co na cresita anuale del 5-7%. La crescita demografica la xe calada soto el 2%. Rimane el problema de la division de la richeza. El 2% de la popolasion el ga el 60% de la richeza del paexe, e el 60% el vive soto i liveli de povertà. El livel de la corusion del governo el xe restà alto.
