Storia del Togo

La Storia del Togo la xe recente. Quantomeno, no ghe testimonianse paleontologiche par dir co la region la xe stà abità da l’omo. Le prime trace de presensa umana le xe de le fornaci par la lavorasion del fero, che vol dir na tecnologia za bastantemente avansata. Ste fornaci le par esar del XI o XII secolo d.C. No se pol esar pi sicuri al momento.

Mapa del Togo

Le popolasion bassari, tamberma e kabiyé le xera inte la region dal XI secolo. En tel nord de paexe, le popolasion gourmà, kotokoli e tyokossi le xe imigra co i arabi i ga scominsià la cacia a la zente par far s-ciavi (XIV secolo). Anca grupi de bariba del Benin e i ashanti del Ghana i xe imigrà in tel Togo e i se sa sistemà in tel sentro del paexe. En tel secolo XVI i ewe i se ga stabilì rente de Tado.

Colonizasion

L’arivo de i portoghexi so la costa in tel XV secolo el ga volù dir lo svilupo del marcà de le risorse locali (avorio, oro, fero) ma anca la trata de i sciavi. Dopo i portoghexi, i danexi, i olandexi e i todeschi i ga scominsià a visitar le coste par cronpar sciavi. En tel 1883, Otto van Bismarch, canselier de la Germania, el ga inposto el protetorato sol Togo.

Caxe tradisionali taberma

El 5 lulio 1884, el esplorator todesco Gustav Nachtigal el ga firmà on tratato de protetorato co M’lapa III, el cao de la zona del Lago Togo. En tel 1885, la Conferensa de Berlin la ga ga dato el Togo a la Germania. I todeschi i ga costruio el porto de Lomé e scominsià la coltivasion de piantagioni de cacao e café.

Le popolasion locali le ga resistio a la colonizasion. I tratati i xe stà firmà da le popolasion de la costa. Le etnie de l’interno le ga resistio a lapenetrasion todesca. I kabiyé i se sa rivoltà in tel 1890, e i konkomba in tel 1897-98. Anca se i todeschi i ga risposto co la violensa, le rivolte no le mai stà dominà conpletamente. I todeschi i ga comunque costruio de le infrasttrutre inportanti: on porto, la linea feroviaria, strade e ponti. I todeschi i ga volù far del Togo na colonia modelo, ma i noga inposto la lengoa todesca, che par qualcuno i locali i no xera degni de parlar n’idioma così elevato. Le scole le xe stà afidà a i misionari catoleghi e protestanti. Za in tel 1913, in tel Togo gera 163 scole protestanti e 196 catoleghe, e on sentro par la preparasion de maestri de la Cexa catolega. A scola se insegnava in lengoa locale, e a le superiori la scola la xera in inglexe. A lo scopio de la Grande Guera, na spedision franco-inglexe la ga catirà la cavedal del nord – Atakpamé – e i todeschi ga dovù lasar el paexe. Co la fin de la guera, la Liga de le Nasion la ga dato a la Fransa e al Regno Unio el protetorato su la region. El Togo francexe el xe diventà pi tardi el Togo de ancò, el Togo inglexe el xe stà tacà al Ghana.

I francexi i ga tolto tuti i riferimenti a la Germania, inposto el francexe a scola e ne l’aministrasion publica e proibì a i misionari todeschi de parlar todesco. Tute le lengoe locali le xe stà mese in secondo pian.

Indipendensa

Co la seconda guera mondiale el Togo el finise soto el governo de Vichy. El confin co el Ghana el xe stà serà su ele provision par el paexe le xe diventà scarse. Dopo la fin de la guera, el Togo el ga scominsià a domandar l’autodeterminasion. El Comitato pa l’Unità Togolexe (CUT) e el Partio Togolexe par el Progreso (pi tardi Movimento Popolare Togolexe), i ga domandà l’indipendensa za inte i primi ani 50.

En tel 1956, el Togo inglexe el xe stà unio al Ghana, co la protesta de la popolasion ewe che la s’a visto spacar in do da on confin fitizio. El CUT el ga vinto le elesion del 1958 e Sylavanus Olympio el xe diventà primo ministro de la republica. En tel febraro 1959, el presidente ganeano Kwame Nkrumah el ga oferto a Olympio de unificar i do paexi, Olympio el ga rifiutà.

El Togo el xe diventà indipendente el 27 aprile 1960 e Olympio el xe stà eleto presidente. Olympio el ga scrito la Costitusion e scominsià a governar in maniera ditatoriale. Le popolasion del nord le xe diventà inpasienti co on governo ewe che el ga dominà da subito tuti i aspeti de la vita del paexe. Olympio el ga anca rifiutà d eintegrar inte l’esercito i soldati togolexi che i ga conbatù ne la Guera d’Algeria co i francexi. La note tra el 12 e el 13 genaro 1963, sti soldati – quasi tuti de etnia kabiyé, del nord – i ga fato on colpo de Stato, i ga asasinà Olympio e i ga domandà a Nicolas Grunitsky de tor in mano el paexe.

Grunitsky el xe stà eleto presidente e el ga parmeso l’esistensa de l’oposision e governà in maniera pi liberale. Ma el paexe el ga continuà a verghe de le difarense de sensibilità politega tra nord e sud. El 13 genaro 1967, Gnassingbé Eyadema el ga organizà n’altro colpo de Stato e preso el potere. Eyadema el xera del nord, e del nord i xe sta eleti la majoria de i ministri del so governo.

Regno de Eyadema

Eyadema el ga meso fora lege tuti i partii vial che el suo, l’Asenblea del Popolo Togolexe. El presidente el ga scominsià a laorar par lo svilupo del paexe e el Tog el ga visù on momento de calma e stabilità. Le conferense internasionali Lomé 1, 2 e 3 le xe sta fate la parché el Togo el xero ono de i pochi paexi africani che el xera libaro da violense.

Eyadema el ga nasionalizà l’industria de i fosfati e spinto par l’autosuficensa alimantare. En tel 1986, dopo ani de calma, el clima politego el xe diventà pi difisile. On comando co na baxe in Ghana el ga tentà de copar Eyadema. LA popolasion la ga reagì co de le manifestasion violente. I studenti universitari i ga scominsià a protestar la politega de Eyadema. La zente del sud la ga anca protestà la presensa de etnie del nord in tel governo. Le popolasion del nord le xe el 20% del paexe, contro i ewe che i xe el 45%. Soto la presion de le manifestasioni, el presdiente el ga dovù verzar le porte al multipartiismo. La Conferensa Nasionale par el multipartiismo la ga eleto Joseph Koffigoh primo ministro el 28 agosto 1991 par formar on governo de tranzision e preparar le elesion del 1992.

I militari i ga caiò che l’apertura a la democrasia la saria diventà la fin de la supremasia de l’esercito. El 27-28 novenbre 1992, i militari i ga caturà i sentri pi inportati del paexe e costreto Koffigoh a scrivar n’acordo co Eyadema par far on governo che el fuse pi rente de le popolasion del nord del Togo. Le proteste de i operai in tel genaro 1993 le xe stà fermà co la violensa e pi de 50 manifestanti i xe stà copà da i soldati togolexi. 250 000 togolexi i xe sanpà in Ghana e BeninLa Comunità eoropea la ga subito fermà i juti al governo del Togo.

Eyadema el ga scominsià a governar co pi forsa e a disfarse de i membri de l’oposision. Amnesty International la scominsia a parlar de “regno del teror”. Eyadema rifiuta le acuse, ma el ga da verzar n’altra olta la porta del dialogo co l’opozision. En tel 1999 el firma n’acordo co i partii de opozision. En tel 2003 el xe sta rieleto. Eyadema el xe morto el 5 febraio 2005 dopo esar stà presidente par 38 ani. La so morte, che nesuno se spetava, la ga meso paura al governo, chel ga subito domandà a so fiol de prendare el posto de so pare. Faure Gnassinbé el xe diventà presidente, verzendo così na nova crisi nasionale.

Novi svilupi

La notisia de la morte del vecio presidente la ga fato contenti tanti togolexi. La speransa de rivar a la democrasia vera la xe subito morta co l’anuncio che el nove presidente el xera el fiol de Eyadema. Le manifestasion violente che ga distruto vari quartieri de Lomé le xe terminà co el novo presidente el ga promeso nove elesion democratiche.

Gnassingbé el xe stà eleto co el 60% de i voti e le oposision i lo ga acusà de brogli. Tra le potense eoropee solo la Fransa la ga considerà le elesion libare. El presidente francese Jacques Chirac el xera on amico de longa data de la fameja de Eyadema. Le manifestasion violente in la cavedale le xe continuà, portando almanco 800 pesrone a la morte. Gnassingbé el ga formà on governo de unità nasionale metendo Edem Kodjo primo ministro. El paexe continua a verghe problemi de svilupo e la sicuresa sociale la xe senpre so l’orlo de la violensa politega.

Portałi:
• Portałe de Africa
|