Storia del Sudafrica

La Storia del Sudafrica la xe ona de le pi interesanti de l’Africa moderna. La xe na storia de invasioni, lote, coragio e razismo. Ma anca na storia par el riconosimento de i diriti umani e de la costrusion de na società verta al futuro.

Mapa del Sudafrica

Preistoria

Rente de Johannesburg e in altre zone del Sudafrica, i ricatamenti paleontologici i ne dixe che ominidi e i primi omeni i vivea in Sudafrica. I xera i disendenti de i ominidi del primo Homo sapiens che el se sera svilupà inte la Rift Valley. I ricatamenti i mostra anca che ghe stà on periodo co el omo moderno nol xera presente in Sudafrica.

Pigmei

Grupi de pigmei (usemo sto nome par indicar zente de basa statura, no se pol usare sto nome par indicar na etnia spesifica) i ga visù in Sudafrica fin da i tempi pi remoti. Le piture rupestri che se cata in tuto el Sudafrica le xe stà datade da 25 000 a 2 000 ani fa. Da i ricatamenti e da lo studio del DNA, se sa che grupi de khoikhoi i xe vegnù zo da l’Africa Sentrale longo la costa atlantega 2 500 ani fa. I portava co lori el bestiame e le tecniche de alevamento. Co i sa incontrà co i popoli de la rejon del Cao – i san -, i se sa miscià co lori dando vita a i khoisan. La presensa de le vache la ga introdoto el conceto de propietà privada, chel no l’era presente tra i san. Anca la strutura de la società la xe cambià co l’introdusion de i cai. I san che vivea a l’interno i ga continuà co la loro cultura. I khoisan i xe restai su la costa inte la rejon del Cao e in quela che ancà la xe la Namibia.

Bantu

Dopo i khoikhoi, anca i bantu i xe vegnù zo da la zona del Nizer. I bantu i xe rivà co ondate diverse e i se sa stabilì in tuto el Sudafrica. Anca se no ghe prove serte, se pensa che anca grupi picinini de nilotici i sia vegnù zo da la rejon de i Grandi Laghi. I bantu i ga introdoto alcune bestie domestiche e l’agricoltura. El fato che alcune lingue bantu le ga incorporà el sistema de i clic (sciochi fati co la lengoa) tipico de le lengoe khoikhoi e san, e el ricatamento de ogeti san ne i resti de ilagi bantu, ne fa pensar che ghera on bon livel de scambio tra i do grupi.

Storia

Co l’arivo de i portoghexi se pol scominsiar a parlar de storia. I portoghexi i sercava na via par rivar a le Indie par el mar. I ga scominsià a navigar longo le coste de l’Africa in tel 1400. En tel 1486, i xe stà boni de pasar el Cao de Bona Speransa, che el xe el punto pi a sud ovest de l’Africa (el punto pi a sud de l’Africa el xe Cao Agulhas) e do i oceani Indiano e Atlantego i se incontra. I portoghexi i ga fondà de le colonie so la costa tuto in torno a l’Africa, ma i no ga mai meso su na colonia ne la zona del Cao.

I olandexi

El arivo de Jan van Riebeeck

I olandexi i xe rivà inte la rejon del Cao in tel XVI secolo. I vaseli i se fermaa qi par tor l’acqua e fruta. En tel 1647 na nave olandexe la xe afondà rente a la Baia de Table Mountain. I marinai i ga costruio on forte e i xe restai n’ano prima de esar salvai. La Compania Olandexe de le Indie Orientali, ona de le pi grandi companie de comercio del tempo, la ga deciso de costruir on porto ne la rejon del Cao par rifornir le navi de acqua, fruta e carne ne i so viagi da e par l’oriente.

El 6 avril 1652, Jan van Riebeeck el xe rivà a la Baia de la Table Mountain par scominsiar stà colonia. De i agricoltori olandexi i ga scominsià a laorar la tera ne le vali rente al Cao pra produsar gran, vin, agrumi e verdure. Dopo on pochi de ani, Ugonoti francexi, e calvinisti todeschi i xe rivà al Cao e i se sa unio a i olandexi. I olandexi i ga anca fato rivar de i s-ciavi dal Madagascar e da la Malesia. Tanti de questi i sa sposà o i ga vù fioi da i olandexi. I disendenti de sto grupo i vien ciamà ‘Cape Coloured’, i metici del Cao. Co l’aumento de la popolasion, la zona controlà da la colonia del Cao la xe diventà pi granda e la zente la ga scominsià a scontrarse co la popolasion locale, i khoisan. Dopo na guerilia che la xe continuà fin al XIX secolo, i khoisan i xe stà quasi tuti copà o integrà ne la colonia, dando vita al groso de la popolasion meticia (coloured) del Sudafrica de ancò.

I boeri

Primi boeri

I ofisiali de la Compania Olandexe de le Indie Orientali i no volea che i coloni i ndese masa lontan e fora dal loro control. Ma alcuni de i bianchi de la colonia i ga scominsià a vivar na vita nomade. I gavea on caro cuerto, fusili, la Bibia e i ndava in giro co le so vache. I vivea secondo i detati calvinisti. De tanto in tanto i se faxea na casa de fango cuerta co la paia. I vegnea ciamadi trekboers – contadini vaganti – e presto el nome el xe stà scurtà in boeri. I boeri i parlava olandexe che el se stava svilupando inte na nova lengoa, el afrikaans.

I inglexi

L’Olanda, intanto, la xera drio perdar la so potensa navale. I inglexi i xe intevegnudi par tor el posto de i olandexi. En tel 1795 i xe rivà a la colonia del Cao e par el 1815 i xera i novi paroni. I inglexi i volea el control del Cao par la posision strategica e i no gavea interese a slargar la colonia. I boeri e i xhosa i xera a i feri corti par via de i confini. I inglexi i ga dovesto intervenir. I no xe stà boni de trovar na solusion, ma i ga rinforsà la so presensa e el so dirito su l’interno del paexe. Poco a la olta, i abitanti de le sità longo la costa i xe diventà inglexi o i parlava inglexe. A l’interno se catava i boeri, che i parlava afrikaans e i no gavea na educasion formale. Politega, finansa, marcà e controlo de le atività minerarie el xera inte le mai de la minoransa de lengoa inglexe. Co la fin de la s-ciavitù (1833), i boeri i se sa catà sensa na forsa laoro par mandar vanti le so fatorie e i xe diventà oncora pi poareti.

Difaqane e Mfecane

Shaka Zulu

A l’inisio del 1800, i popoli che parlaa lengoe nguni e che i vivea inte la rejon del kwaZulu Natal, i xera separà in clan tegnù insiema da tanti re. El cao Shaka Zulu, fiol de on cao poco importante, el ga scominsià quel lu el ciamava mfecane, schisar, ma che le altre etnie i ciama difaqane, migrasion forzada.

Shaka el ga cambià la società divisa in ono stato militare e sentralizà. I so grupi armati (impì') i ga scominsià a consquistar terea da i popoli rente de i zula par permetar la espansion del regno de Shaka. I sotho e i swazi i ga reagì formando i regni del Lesotho e del Swaziland.

I altri popoli i se sa spostà, co i tswana e i ndebele che i xe ndà a nord del fiume Vaal. Co la morte de Shaka in tel 1828, el regno zulu el ga perso forsa. La cresita de la potensa inglexe, la scoperta de oro e diamanti in varie zone del paexe e el movimento de i boeri i xe tuti fatori che portarà a la distrusion del regno de Shaka.

La Grande Migrasion

A lo steso tempo de la difaqane, i boeri de la rejon del Cao i se sa stancà de i inglexi. I no podea acetar la proclamasion de l’egualiansa de le raze e el control politego de la loro libartà. I boeri i ga deciso de spostarse a l’intero par catar novi posti do vivar secondo i loro gusti. Alcuni i volea andar in Tera Santa par poder vivar la religion in pace. I migranti (trekkers) i ga traversà el deserto del Karoo e i xe presto rivà in zone libare. Lori i no savea de la lota de i zulu, e che tante rejoni le xera vude parché le tribù iriginarie le se sera spostà par scampar a la guera. Na olta rivà oltre el fiume Orange – confin orientale de la Colonia del Cao – i boeri i sa tolto le tere che i catava, e i no fazea fatiga a copar i africani che i se oponeva. I boeri i no xe stà boni de vinsar contro i ndebele e i sotho del re Moshoeshoe I.

Guerieri Zulu

La grande migrasion de i boeri la sa fermà a Thaba Nchu, rente a Bloemfontein de ancò. Dopo on poco, i cai de i boeri igha litigà e on grupo el sa moso a est, al de la de i monti Drakensberg in tel Natal. El cao de i boeri, Piet Retief, el xe andà a visitar el re de i zulu Dingaan, el fratelastro de Shaka che lo gavea copà par tor el so posto. I zulu i no se ga fidà de Retief e i le ga imprisonà. Co i ga risevù le bestie par pagar la so libarasion, i zulu i ga atacà el campo de i boeri, copando 280 boeri e 250 lavoradori africani. I boeri i ga tentà de vendicar i morti co la batalia de Itala, ma i ga perso.

La guera tra boeri e zulu la xe rivà al so culmine el 16 dicembre 1838. I boeri i ga costruio on campo provisorio longo el fiume Ncome, dove ghera on gomito co le rive sabiose. CO i zulu i ga atacà, i boeri i sa difeso sparando inte el mucio. Dopo na giornata de guera, i boeri i gavea on centinaro de feriti, i zulu sete mila morti. El color de l’aqua el xe divantà roso par i tanti morti e la batalia la xe conosuda come la Batalia del Fiume de Sangue [Bloody River Battle]. (I numari esati i no xe sicuri. I boeri i ga sempre vù el interese de far vedar sta batalia come on segno divino al loro dirito a la tera, i zulu i no ga mai avù la posibiltà de lasar na testimoniansa storica. Studi recenti i dixe che ghe stà morti anca tra i boeri e che i zulu no poda esar setemila). La vitoria de i boeri no la xe durà tanto. I inglexi i ga aneso el teritorio del Natal in tel 1843.

Natal

I inglexi i gavea bisogno del zucaro e i ga deciso de far le coltivasion in Natal. El nome vien dal portoghexe e vol dir 'Nadal, el dì che i portoghexi i xe rivà inte la baia de Durban. I zulu i no volea i inglexi e i sa difeso da sta invasion. En tel 1879, i inglexi i ga perso la batalia de Isandlwana. 1400 soldati inglexi i xe morti anca se i gavea i fusili moderni e tute le munision che ghe volea. I zulu i ga continuà la guera ma a la fin i inglexi i ga vinto. Visto che i zulu no volea laorar inte le piantagioni, i inglexi i ga ciamà lavoradori indiani. 150 000 indiani i xe vegnù in Sudafrica in 50 ani, dando vita a la pi grande comunità indiana fora da l’India. Tra de lori anca el Mahatma Gandhi.

Guere boere

El posto do i ga scoperto l’oro for a de Johannesburg.

I boeri i ga stabilio do repùbleghe la Republica Sudafricana, o Transvaal; e l’Orange Free State, el Stato Libaro de l’Orange. En tel 1869, i diamanti i xe stà catà rente a Kimberley. La zona la xera de i griqua, ma i boeri de le do repùbleghe i dixea che la xera loro teritorio. I inglexi i xe intervegnù e i ga aneso la rejone. En poco tempo, eoropei e africani i xe rivà a Kimberley par laorar a la ricerca de i diamanti. I vivea in sitadine, misciadi su sensa problemi. I boeri i gavea on risentimento par stà situasion parché i gavea perso i schei ma anca parché i no asetava che bianchi e neri fuse mesi a lo steso livel.

Done e putei boeri inte i campi de concentramento.

En tel 1880, la prima guera boera la ga scominsià in Transvaal. I boeri i ga vinto la batalia de Majuba el 27 fevrar del 1881 e i ga subito eleto el primo presidente de la so republica, Paul Kruger. I inglexi i ga deciso de crear la federasion de le varie colonie sudafricane par contrastar i boeri, che i xera bianchi e i xera la majoria inte le loro republiche. En tel 1886, l’oro el xe stà catà in tel Witwatersrand, na zona poco fora Johannesburg. La popolasion de la sità l’è cresuda de 100 000 persone in pochi mesi. I boeri i sa catà par la seconda volta mesi da parte ne la corsa a la richeza. I xera anca rabià a vedar i neri che guadagnava schei, e lori che i no gavea niente. Co inte el 1895 on grupo de soldati inglexi rinegati i ga tentà de conquistar el Witwatersrand, el presidente Kruger el sa n’acorto che i boeri i no pdea resistar a i inglexi e el ga fato n’aleansa co l’Orange Free State.

En tel 1899, i inglexi i ga domandà che i bianchi che vivea in tel Traansval i gavese el dirito al voto anca se i no iera boeri. Kruger el ga dito de no e el ga dichiarà la seconda guera boera. Le sità principali le xe cascà tute in mano inglexe inte el primo ano de guera. L’ultima la xe stà Pretoria. La guera la xe ndà vanti par altri do ani co la guerilia. I inglexi i ga serà su done e putini inte i campi de concentramente do 26 000 de lori i xe morti de fame, malatia e fredo in do ani. El 31 magio 1902, i boeri i ga firmà la fin de la guera riconosendo la sovranità inglexe so la republiche.

Union del Sudafrica

Johannesburg in tel 1890

Dopo la guera, i inglexi i ga ricostruì le infrastruture e fate de le nove. En tel 1907, el Sudafrica el produsea on terso de l’oro del mondo. I boeri i sa visto mesi da parte, sensa la posibiltà de frutar da le miniere del so teritorio e a combatar par conservr la so identità. I inglexi i sercava de imor el inglexe come lengoa da usare sol laoro. El risultà el xe stà na società polarizada tra boeri e altri bianchi. I neri, i indiani e i metici i no xera tolti in considerasion.

En tel 1909, le colonie del Cao, del Natal e i do Stati boeri del Transvaal e de l’Orange i x stà mesi insieme par formar l’Union Sudafricana. I boeri i gavea autonomia governativa. Le lengoe ufisiali le xera l’inglexe e el olandexe Fin al 1925), e solo i bianchi i podea votar e esar votadi. I neri podea poseder tera solo in serte zone (7% de l’area totale). Co el Canada, l’India e la Nova Zelanda el Sudafrica el xera el quarto teritorio a verghe no stato paritario co el Regno Unio. Sto raporto el xe stà confermà durante le do guere mondiali. I sudafricani i ga partecipà in tute e do le guere a fianco de l’Inghiltera.

Diriti

Fin da l’inisio, solo i bianchi e – pi tardi – i coloured (metici) del Cao i podea votar. I neri i xe sempre stà lasadi fora, così come anca i axiatici. El primo governo de l'Union Sudafricana el xera ne le mane de Louis Botha, Jan Smuts el xera el so vice. El Partio Nasional del Sudafrica (SAP) el xera alineà co i interesi inglexi. A l’oposision ghera el Partio Nasional (NP) che difendeva i interesi de i boeri e de i altri bianchi sudafricani e i volea l’indipendensa da l’Inghiltera.

I neri, anca se i xera el 75% de la popolasion, i no gavea diriti. En te i primi ani el governo el ga fato pasar le legi opresive che vietava a i neri de votar, de scioperar, de verghe laori de on bon livel, e altre limitasioni. En tel 1913 el parlamento el ga aprovà la lege su le tere par i africani (Native’s Land Act). En sto modo, i bianchi, che i xera el 20% de la popolasion i gavea el 90% de le tere del paexe. I neri no podea poseder, afitar o anca solo condividare la tera fora da le riserve.

I neri e i metici i ga scominsià a protestar. En tel 1923, i leader neri i ga fondà el Congreso Nasionale de i Nativi Africani, che poi el diventarà el Congreso Nasional Africano (African National Congress – ANC). Mahatma Ghandi el ga organizà la popolasion indiana del Natal par domandar pi diriti sivili.

A lo steso tempo, i boeri – che i se fasea ciamar afrikaaner – i ga spinto par continuar la segregasion de le raze, co i neri costreti a vivar in sità satelite a quele de i bianchi. Dopo la seconda guera mondiale, in tel 1948, el National Party, partio nasional, el ga pasà le legi che fasea de l’apartheid (svilupo separà) la strutura portante de la società. L’apartheid la durerà fin al 1994. La popolasion nera, ma anca i metici, i axiàteghi e parte de la popolasion bianca, la se sa oposto a l’apartheid. I leader neri, Nelson Mandela, Oliver Thambo, e altri, i ga asetà la prison o l’esilio par lotar contro la mancansa de libartà.

Democrasia

Dopo deceni de presion politega, de sansion internasionali e de lota interna, el governo del Sudafrica el ga deciso de pasar a la mediasion politega par rivar a la democrasia. El presidente F.W. de Klerk el ga libarà Nelson Mandela el 2 fevrar 1990. El 17 marso 1992 i sudafricani i ga votà el referendum par metar fin a l’apartheid. El 26 – 29 avril 1994 tuti i sudafricani i gavù la posibilità de votar a le elesion nasionali. Mandela el xe diventà el primo presidente e Thabo Mbeki vice presidente co F.W. de Kleerk. La nova Costitusion la xe stà aprovada in tel 1996.

Comision Verità e Riconciliasion

En tel 1995, soto la diresion del arcivescovo angliacano Desmond Tutu, la Comision Verità e Riconciliasion la scominsià a investigar el passà par metar fin a le ingiustisie e aprire la strada a on novo Sudafrica. Le vitime le podea dir la so esperiensa, e i colpevoli i podea confesar le so colpe. La Comision la xe stà on modo par portar el paexe a l’unità.

Ancò

En tel 1997 Nelson Mandela el se sa ritirà a vita privada e ancò el vive a Maputo, Mozanbico, co la so mojere, Graça Machel. Thabo Mbeki el xe diventà presidente al so posto. L’ANC el xe el pi importante partio, ma la popolasion la xe stanca e a le ultime votasion locali, 2005, la majoransa la xe stà risicata. El Sudafrica el ga on groso problema co la disocupasion e la criminalità. L’AIDS la xe estesa sora-de-tuto inte le sità. En tel 2010, el Sudafrica el ospitarà la Copa del Mondo de Calcio.

Portałi:
• Portałe de Africa
|