Storia de l'Eritrea

La Storia de l’Eritrea la xe ona de le pi longhe del continente. La region che ciamemo Eritrea la se snoda longo la costa sud-ovest del Mar Roso, da cual el tol el nome (en greco Ερυθραία, roso) e la continua verso i altipiani etiopici del Tigré.

Preistoria

canbia

I paleontologi i ga fato ricatamenti importanti in Eritrea che i atesta la presensa de ominidi za on milion de ani fa, e de homo sapiens de 125 000 ani fa. Da l’Eritrea pasava ona de le vie utilixà da l’omo preistorico par espandarse fora da l’Africa. Strumenti de piera e de osidiana i se cata ne la baia de Zula e rente de Masaua. Inte el sentro e in tel nord del paexe se cata de le piture rupestri de l’era mesolitica.

Storia antica

canbia

Ntorno al 3.500 a.C., grupi umani che vivea in Eritrea i ga costruio picole sità che le vien ciamà cultura de Gash. I resti de sto tempo i xe simili a cuei catà anca inte la val de Nilo e in Nubia. Documenti egizi del XXV secolo i se riferise a sta region co el nome de Punt o de Ta Natjeru – la tera de i dei. En tel XV secolo la faraone femena Hatshepsut la ga mandà na spedision in Eritrea par conosar el posto da doe el incenso e la mira i rivava fin a l’Egito.

 
La stele de Matara, de la siviltà aksumita

Rente de Asmara, a Sembel, i archeologi i ga catà i resti de na sitàdina del IX secolo a.C. che la gavea conexioni co i sabei del Yemen e co la val del Nilo. L’Eritrea del nord la xe entrà soto el controlo del regno Damat, co cavedal a Yeha inte l’Etiopia del nord. Dopo i Damat, el regno de Aksum el ga tolto el control de sta zona, importante parché la controlava le vie caravaniere dal Mediteraneo a i regni yemeniti de l’Arabia. El cristianesimo el xe rivà da l’Etiopia. El regno de Aksum el ga perso el control de l’area verso el X secolo soto l’influensa de l’Islam.

Regni tribali

canbia

Co la forsa de Aksum la xe finia, la region la se sa diviso longo linee tribali. Al nord, i Beja, on popolo de origine kushitica, el ga fondà sincue regni - 'Naqis, Baqlin, Bazin, Jarin e Qata – islamici. I Beja i no xe stà boni de impor la so lengoa, e la zente la ga continuà a usar el ge’ez, da do se sa svilupà la lengoa tigrina de ancò.

Mentre che le coste le xera in man a i musulmani, ne i altipiani sentrali el se sa formà on regno cristiano, el Midre Bahri. Sto regno el ga vù na vita corta e el xe stà asorbido dal regno etiopico.

En tel sud, le etnie afar e saho i ga mantegnù na forte division tribale fin al XVI secolo, co i se sa unio par formar el sultananto de Adal, che el prendea rentro anca el nord de la Somalia e Gibuti.

I Otomani

canbia

Dal XVI secolo, el nord el xe finio soto el control otoman co cavedal a Masaua. Soliman el Magnifico el ga concuistà la sità de Masaua in tel 1577 e scominsià la costrusion de novi cuartieri. I otomani i xe restai a Masaua par tre secoli e i ga pasà el control de la region a i egisiani, che i lo ga perso co l’arivo de i italiani.

La colonia italiana

canbia
 
Mapa de le colonie italiane inte el Corno d’Africa

Giuseppe Sapeto, prete catolego, el ga comprà la baia de Assab dal sultan de Afar in tel 1869. La baia la xera par el armatore genovexe Raffaele Rubattino. L’Italia la volea verghe de le colonie in Africa e sora-de-tuto longa la costa che la stava diventando la pi importante par el trafico maritimo, co l’apertura del Canale de Suez. I italiani i ga scominsià n’opera de concuista longo la costa a nord, parando via i egisiani, e verso l’interno, scontrandose co l’imperator Yohannes IV. El 1 genaro 1890 la colonia la xera tuta in man italiana co el nome de Eritrea.

L’Italia la xe restada in Eritrea fin al 1941. Dopo la guera, l’Eritrea la xe stà mesa in una federasion co l’Etiopia. Ma l’imperatore Haile Selasie, in tel 1961, el ga dichiarà l’Eritrea na provincia etiopica e ridoto la so autonomia.

Liberasion

canbia

Dopo l’anexion de fato da parte de l’Etiopia, i eritrei i ga organisà el movimento de indipendensa. El Fronte de Libarasion Eritreo el ga scominsià a contrastar el potere etiopico. En tel 1970, on nomvo movimento, el Fronte de Libarasion del Popolo Eritreo el ga tolto el sopravento pułìtego e militare.

La lota par l’indipendensa la xe finia co la vitoria in tel 1991. En tel 1993, i eritrei i ga votà on referendum par vedar se la zente la volea rimaner co l’Etiopia o esar indipendente. El 24 magio 1993 l’Eritrea la vegnea proclamà nasion indipendente. El leader de la guerilia, Isaias Afewerki el xe diventà el primo presidente.

 
Soldai de l’ONU in Eritrea. Photo de Dawit Rezenè

En tel 1998, l’Eritrea la ga causà l’incidente de Badme, on vilagio longo la frontiera co l’Etiopia. La guera che la xe seguia la ga causà la morte de 20 000 soldati eritrei e miliari de sitadini. L’Eritrea la ga perso el conflito armato, ma l’Etiopia la xe stà fermà da l’intervento internasionale. Le trupe ONU le ga tolto el control de na fasia de 20 km a l’interno de l’Eritrea par tegnar i do eserciti stacai. La disputa su la linea de confine la gavea da esar discusa da na comision. L’Etiopia no la ga volù asetar la linea proposta da la comision e la xe restada in stato de guera.

L’Eritrea la ga perso econòmegamente. El presidente el xe diventà on ditatore. Tuti i eritrei i deve far el servisio militare e i no pol ndar fora dal paexe prima de 55 ani de età. L’università la xe serà e no ghe stampa libara. Tuti i giornalisti i xe in prison. El governo el ga espulso i misionari stranieri e meso in prison anca el vescovo ortodoxo. El livel de i diriti umani el xe el pi baso de tuta l’Africa. I servisi segreti eritrei i xe anca responsabili de rapimenti e asasini a l’estero, compresa l’Italia.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_de_l%27Eritrea&oldid=1035352"