Stòria de l'Angoła
L'Angoła, dopo èsar stà na colonia del Portogalo dal 1655, in tel 1951 l’Angola la xe stà incorporà come na division aministrativa del paexe eoropeo. L’Angola la xe rivà a l’indipendensa in tel 1975.
Preistoria
canbiaEn te i tenpi preistoreghi, l’Angola xera abità da popoli pigmei, i progenitori de i khoikhoi de ancò. Verso el VI secolo d.C., i primi grupi bantu i xe rivà dal nord. I bantu i gavea na cultura materiale superiore a cuela de i pigmei i i ga ciapà el soravento sensa fadiga. L’ocupasion del teritorio che ancò forma l’Angola la xe durà vari secoli. Co la formasion del regno del Congo, el nord de l’Angola el xe entrà ne la xona de influensa de sto regno.
Portoghexi
canbia
I portoghexi i xe rivà a la corte del re in tel 1482. El comercio tra i do paexi el sa svilupà ben e de i congolexi i xe stà mandà a Roma par studiar. I portoghexi i xe entrà in Angola solo in tel 1575 co l’arivo de Paulo Dias de Novais e on centenaro de fameje de coloni co na guarnizon de soldati. Sto grupo el ga fondà Luanda, che la xe diventà sità in tel 1605. I portoghexi i ga tentà de penetrar in tel interno del paexe ma i ga catà la resistensa de i vari regni bantu, specialmente cuela del regno de Ndongo. Dopo verghe decaità el re Kiluange, i ndongo i xe tornà a la carega co al rexina Jinga Mbandi. La rexina la xe stà bona de far n’aleansa co i regni de Matamba, Congo, Kassanje,Dembos e Kissamas. I portoghexi no podea resistar contro tuti i regni unii e i ga dovù ritirarse in tel forte de Massangano.
I olandexi i se n’à improfità e i ga ocupà Luanda par on pochi de ani. Co i portoghexi i ga risolvesto i problemi interni, i ga mandà n’armada dal Braxile (1648) che la ga regonxuistà Luanda e verto le porte a novi coloni par ndar in Angola. Dopo na serie de bataje, tuti i regni locali i xe stà concustadi. El regno de Ndongo el xe cascà in tel 1671. La seconda concuista la ga verto el marcà braxiliano a l’Angola. L’Angola la xe diventà come na colonia del Braxile, eso steso na colonia del Portogalo. I porti de Luanda e Benguela i xera sempre pieni de navi braxiliane. Par la metà del XIX secolo, Luanda la xe diventà ona de le sità pi moderne del continente.
La colonia angolana la provedeva avorio, goma, prodoti agricoli, oro, legname e altri prodoti e la se sa sempre mostrà de groso interese par el Portogalo. El clima inte la colonia el xera trancilo. Verso el 1950, i primim movimenti naxionalisteghi - el Movimento Popolar par la Liberasion de l’Angola el xera el pi importante - i ga scominsià a domandar l’indipendensa. El refudar portoghexe al dialogo el ga portà a la guera in tel 1961. Dopo ani de guera, l’indipendensa la xe rivà el 11 novembre 1975.
Guera sivile
canbiaI portoghexi, dopo el colpo de stato che ga meso fin al goerno Salaxar, i xera d’acordo de lasar el poter a i tri grandi movimenti de opoxision: MPLA, UNITA, e FNLA. La coalision no la ga tegnù e, prima oncora de l’indipendensa, UNITA e FNLA i ga scominsià a combatar contro el MPLA. El MPLA el ga subito ciapà el control de la costa, dove che ghe xera anca i novi campi petroliferi, e proclamà l’indipendensa el 11 novembre 1975. Agostino Neto el xe diventà el presidente, dopo de lu, in tel 1979, José Eduardo dos Santos ga ciapà el so posto. I movimenti de opoxision i ga formà on goerno par el control de l’interno del paexe co Jonas Savimbi e Holden Roberto a cao de la coalision. La guera le x continuà fin al 1991, co i acordi de Bicesse i do grupi in guera i ga deciso de fermar el conflito e darghe la posibilità a la xente de votar el goerno che i volea lori. El MPLA el ga vinto le prime elesioni. Savimbi el no ga volù sentir raxoni e el xe tornà a la guera. En tel 1994, on novo acordo de paxe el xe stà firmà. On goerno de unità nasionale el xe stà inaugurà in tel 1997, ma la guera la xe tornà in tel 1998.
Ancò
canbiaLa guera sivile no la podea andar vanti. Dopo la fin de la guera freda, i Stai Unii e el bloco Sovietego no gavea interese a continuar na guera inutile. En tel 2002, on grupo de soldadi portoghexe el ga tacà la baxe de Savimbi e i lo ga copà. Dopo de lori, l’esercito de l’Angola el xe entervegnù par darghe l’impresion che i xera stà lori a metar fin a la guera sivile. Dopo vari incontri tra UNITA e MPLA, on novo acordo el xe sta firmà. La guera sivile la ga creà 4 milioni de sfolai interni, distruto le infrastruture, diseminà 15 milioni de mine antiomo in tuto el teritorio e parmeso la corusion dilagante in tel goerno.
