Stòria de ła Nizèria

I primi abitanti de el teritorio che ancò forma ła Nizeria i xe stà popolasion de caciatori-racoglitori, tra queste etnie pigmee, za verso el 9 000 a.C. Ricatamenti archeologici testimonia na cultura de pastoralisti che conosea ła tecnołogia de ła seramica za in tel IV milenio a.C. I primim segni de coltivasion i se cata ntorno al I miènio a.C.

Mapa de ła Nizeria

Primi segni

I ricatamenti archeologici i ne mostra che el pasagio da neołìtico a l’età del fero el xe vegnù diretamente sensa lo stadio del bronzo. I studiosi i pensa che la tecnologia del fero la xe rivà dal nord, altri i pensa che la sia vegnù co la emigrasion de popolasion sudaniche da la val del Nilo. Queste la xe la teoria pi probabile, parché la saria consistente co i ritrovamenti in tuta l’area del Sahel.

I regni

La storia de la Nizeria la xe contrasegnada da la storia de i regni che, par lo pi, i riflete le division etniche del paexe. I dati che vien da l’archeologia ne parmete de conosar l’esistensa de regni tra i yoruba, de i igbo, de i edo, de i efik, de i ibibio e de i annang. I popoli hausa i se sa organizà in sità stato prima del XV secolo d.C. El regno de i nri el xera za organizà in tel 900 e el xe ndà vanti fin al 1900. El xe stà el regno che ga dato vita a la cultura igbo.

Regni yoruba

I yoruba i se cata so la destra del Fiume Nizer. I xe on grupo etnico de origini miste, co i ga inglobà vari grupi che i xe rivà sol so teritorio. I yoruba i xera agricoltori che i se sa organizà in sità stato e che i xera governà da na dinastia de cai. Le sità le xera sentri de tecnologia rafinata: teracota, sculture, lavorasion dei metali, ecc.

I yoruba i xe de origine sudanica, ma la teoria che i xe vegnù da l’Arabia la xe el fruto de on laoro de studio superficiale de la cultura. Le afinità linguistiche le xe minime e quele culturali inesistenti. La sità de Ife la se pol considerar come la cavedal de la cultura yoruba.

Oyo e Benin

Da el secolo XV, le sità de Oyo e Benin le ga sorpasà Ife a livel politego e econòmego. Ife la tegnù el primato spirituale. A Oyo, i yoruba i ga scominsià a crear confederasion de picoli regni. El Consilio de Stato (Oyo Mesi) el nominava el re (alafin) e controlava el so operato. Oyo el ga presto inglobà Nupe e Borgu, verzendo nove vie de comercio co el nord.

El regno de Benin el xe scominsià come na colonia de Ife so la costa. En tel XV secolo, Benin la xe diventà indipendente e, tajando fora la sità de Ife da el comercio so la costa, pi forte de la sità madre. La sità de Benin la xe rivà a verghe pi de 100 000 abitanti e dal XV secolo la xera in contato co i portoghexi par el comercio de le materie prime e de i sciavi.

Hausa

Le sità hausa – Kano, Jigawa, Katsina e altre - le se sa svilupà in sità stato in tel XIV secolo. Le sità le gavea mura e le vivea inte la periferia de i grandi regni del tenpo. Le caraane che le pasava el deserto del Sahara le catava dei marcà proteti tra i hausa. Co le caravane, anca l’Islam e la scritura i xe rivà tra i hausa. Le Cronache de Kano le raconta l’influensa de i chierici maliani su la casa regnante a Kano.

Stati precoloniali

I regni hausa i xe finii soto el control del regno del Songhai in tel XVI secolo. A lo steso tenpo, anca el regno de Kanen-Borno (de la zona del Ciad) el se sa espanso a sud, fin a tocar el nord de la Nizeria, conquistando i teritori hausa che i xera scanpà al regno del Songhai. El regno de Songhai el xe cascà soto i atachi de le milisie marochine in tel 1591. I marochini i ga conquistà le sità de Gao e Timbuctù. El regno del Borno el xe riusì a torse tuto el nord de la Nizeria. El regno del Borno nol ga senpre vù la posibilità de controlar le etnie hausa parché el ga dovù controbatar i atachi de i tuareg.

I regni Ibibio, Efik e Annang i se sa formà longo la costa rente del Camerun. Sti regni i no xera unii, anca se la zente la parlava la stesa lengoa. I popoli de sta rejon i xe stà i primi a vegnar in contato co i eoropei.

I regni igbo

Le popolasion igbo le ga fondà vari regni a partir dal XVI secolo. El regno de Onitsha el conprendeva anca altre popolasioni. Dopo le tension etniche co i aro, se vede la cresita del regno Arochukwu (1630-1720) chel ga portà a la fondasion de la confederasion de Aro che la controlava el centro-ovest e l’est Nizeria.

La colonia

I inglexi i ga seguì portoghexi e olandexi ne lo sfrutamento comerciale de le coste africane. En Nizeria, i inglexi i ga organizà na rete comerciale fin a l’interno. En tel 1885, a la Conferensa de Berlin inglexi i se sa visto riconosù el dirito de colonizar la Nizeria. En tel 1900 el governo el ga consolidà la so presensa in tel nord e el ga proclamà el protetorato in tel 1901. La colonia la xera divisa in rejoni setentrionali, rejoni meridionali e colonia de Lagos.

Colpi de stato

En te l’otobre 1960 la Nizeria la xe diventà indipendente e le tre rejoni del paexe le gavea l’autonomia aministrativa. El governo federal el gavea el control de l’esercito, de le relasion foreste, de le selte econòmeghe e fiscali. La regina de Inghiltera la xera el cao de stato uficiale, anca se el parlamento bicamerale el gavea potere legislativo soto la guida de on primo ministro. I partii pułìteghi i se ga coagulà su i grosi grupi etnici: El Congreso del Popolo Nizeriano rapresentava i hausa, musulmani del nord; el Congreso Naxionale de i Citadini Nizeriani rapresentava i igbo, cristiani del sud; e el Grupo de Axion el rapresentava i yoruba. Hausa e igo i se sa meso d’acordo par formar el primo governo soto la guida de Abubakar Tafawa Balewa.

En tel 1963, la Nizeria la se sa proclamà na repùblega federal e meso Nnamdi Azikiwe primo presidente. Aziki el xe durà fin al 1966, co on grupo de militari i ha fato on colpo de stato. El novo goveno el xe durà sie mexi, co altri militari i ga fato n’altro colpo de stato. El novo omo forte, Yakubu Gowon, el ga diviso el paexe in dodese Stati ma nol xe stà bon de fermar el masacro de i igbo che i xera ndà a vivare in tel nord del paexe. I igbo i ga domandà l’indipendensa e i ga proclamà la Republica del Biafra el 29 magio 1967. La guera sivile che la xe seguia la ga fato pi de on milione de morti.

El 29 lulio 1975, el general Murtale Mohammed el ga fato on colpo de stato e preso la presidensa. Dopo verghe dito che el governo sivile el saria tornà in tel 1979, Murtale el xe stà copà el 1 otobre 1976 durante on tentativo de colpo de stato. Olusegun Obasanjo el ga tolto el so posto.

Secondo tentativo

Obasanjo el ga organizà na Asenblea Costituente par riscrivar la Costitusion. En tel 1979 Shehu Shangari el xe stà eleto presidente. El xe stà riconfermà in tel 1983. Dopo pochi mexi, el magior generale Muhammadu Buhari el ga fato on colpo de stato e formà on novo governo. En tel agosto 1985, Ibrahim Babangida el ga fato on novo colpo de stato e preso el potere. Dopo verghe dato el permeso de stanpar i giornali, che i xera stà seradi, Babangida el ga provà a rinovar l’economia. Dopo vari rinvii, le prime elesion libare le se sa tegnù el 12 giunio 1993. I primi raporti i dixea che M. K. Abiola el xera stà eleto presidente. Babangida el ga girà i risultati in so favor e el ga anulà le elesioni. La zente la ga protestà e pi de 1.000 nizeriani i xe stà copà inte la protesta.

Abacha

Soto la presion de la piaza, Babangida el ga pasà el potere a Ernest Shonekan. El paexe el xera drio cascar in tel cos pi nero co el ministro de la difesa, Sani Abacha, el ga fato on colpo de stato e preso el potere.

I nizeriani i sperava che Abacha el podese darghe al paexe la stabilità necesaria par la cresita. Invese, Abacha el se sa dimostrà senpre pi totalitario. En tel 1994, el governo el ga istituì el tribunale speciale par giudicar i cai ogoni, che domandava pi autonomia. El tribunale el ga condanà a morte Ken Sro Wiwa, on leterato de fama mondiale, e altri leader ogoni.

El presidente Abacha el xe morto de ataco cardiaco el 8 giunio 1998. Al momento de la morte el xera drio entratener on grupo de balerine indiane. El general Abdulsalami Abubakar el ga preso el so posto e formà on governo de transision. Abubakar el ga fato libarar tuti i prisonieri politeghi e promoso de le riforme sociali. El 29 magio 1999 Olusegun Obasanjo el xe stà proclamà presidente.

Verso la democrasia

L’elesion de Obasanjo la ga meso fin a 16 ani de governi militari. La Nizeria la xera in terìbiłi condision econòmeghe, piena de corusion e sensa na infrastrutura valida. Obasanjo el ga promoso el ritorno a le libartà sivili, l’investigasion de i abusi del pasà, e le riforme econòmeghe.

Durante el governo de Obasanjo, i Stati de la confederasion i ga domandà pi schei e pi importansa inte le decision naxionali. Vari Stati i xe stà scosi da ribelioni de sfondo religioso e econòmego.

L’altro grave problema el xe quelo de la ribelion in tel delta del Fiume Nizer. Le popolasion del delta le vol che i schei del petrolio i serva anca par el loro svilupo, mentre che la majoria de i schei i va a finir inte le tasche de i politeghi. I ribeli i ga de frecuente rapì i laoradori de le baxi petrolifere par farghene ostagi da usar par le rivendicasion politeghe.

Obasanjo el xe stà rieleto in tel 2003 e volea canbiar la Costitusion par presentarse na tersa olta in tel 2007, ma nol ghe riusì. A le elesion del 2007, Umaru Yar'Adua el xe diventà presidente, anca se le oposision le ga dito che el voto nol xera valido.

Portałi:
• Portałe de Africa
|